Toza

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Una toza d'árbol tronzau.

A toza ye a parte mas baixa d'o tronco d'os árbols y atras plantas lenyosas, chusto por alto d'a superficie d'o suelo, y por aon s'achunta con as venas que i son debaixo. De regular ye a parte que queda fincada en tierra cuan l'árbol se tronza u se talla. Tamién s'ha documentau atros nombres, como choca en Viello Sobrarbe, que coesiste con a cheneral «toza», y chueca en aragonés cheso.

A parola toza tamién puede fer referencia a un segmento de tronco tallau mas amplo que largo, como por eixemplo os que s'emplega de base pa remallar en bellas fayenas u pa partir a lenya con a estral.

Toza y cabeza

De forma figurada, a «toza» tamién puede estar a cabeza d'una persona que no la emplega guaire pa pensar. En aragonés i ha un grupo d'acepcions que emparentan a «toza» con a cabeza. Por eixemplo, «tozar» u «toceyar» ye la forma que tienen de luitar os bovidos, tozuelo contra tozuelo (a propia parola «tozuelo» ye un diminutivo de «toza»), «dar una tozada» u «tozolada» ye propinar un golpe con a cabeza, un «tozolón» ye un coscorrón: «Catorce escaleras, quince tozolons», u tamién puede estar una persona testaruda, «Estozar-se» ye meter-se un tastarrazo firme contra bella cosa que sía dura; P. ex. correndo dar-se contra una paret u un árbol, salir-se d'a carretera con l'auto y estrellar-se, «partirse la crisma», etc. Una persona «tozuda» u «tozoluda» ye una persona cabezuda, tanto fisicament como testaruda. O «chubo de toza» ye l'aparello con que se chunye a os bueis por os cuernos, «Labrar a toza» u «labrar a toz» ye como se labra con os bueis con este tipo de chubo, etc.

Se veiga tamién

• Tronco.
• Percullo (plantas).
• Tizón.

• Datos: Q811646
• Multimedia: Tree stumps / Q811646