Prepireneu
Lo Prepireneu ye una part de l'orocheno pirenenco que ye arredol de tot lo Pireneu axial, tenendo menor altaria y uns materials més recients d'edat mesozoica u cenozoica, deformatos en la orochenia alpina.
Lo prepireneu meridional consiste en cabalgamientos y napas tectonicas con verchencia enta lo sud y que la placa euroasiatica empentó y puyó dencima de la placa iberica.
Muitas de las sierras prepirenencas son calsinosas porque representan materials que sedimentoron en plataformas continentals (como las calsineras de Guara).
En bells puestos bi ha sierras prepirenencas exteriors en contacto con lo semontano pirenenco y sierras prepirenencas interiors, en contacto con lo Pireneu axial. En bells libros de cheografía dicen Prepireneu només que a las sierras exteriors, en oposición a los Pireneus que los constituirían las sierras interiors y lo Pireneu axial.
Contenius |
[editar] Sierras prepirenencas interiors
En l'Alto Aragón son sobre tot rocas calsinosas (calsineras, dolomías y arenitas con components calsinosos no siempre clasificables como "piedra d'arena"), d'edatz entre lo cretacico superior y lo Eocén. Las sierras prepirenencas interiors tienen las altarias mayors en las napas de Cotiella (2.912 m) y las Tres Serols (3.355 m), competindo en altaria con lo Pireneu Axial.
[editar] Depresión meya intrapirenenca
Entre las sierras interiors y exteriors bi ha a vegatas individualizata una depresión (depresión meya intrapirenenca), representata en la Chacetania por la Canal de Berdún, en lo Sobrarbe por la Ribera de Fiscal y la suya prolongación por l'Ara ta Boltanya y L'Ainsa, y en la Ribagorza por la fondata u depresión de Campo. La edat de los materials ye entre lo Eocén y l'Oligocén.
Las altarias mes grans d'esta depresión se troban en lo flysch representato en la marguin septentrional plegando dica poco mes de 2000 m,[1] en contacto con sierras de calsinera.
[editar] Sierras prepirenencas exteriors
Tienen altarias menors. Son sierras con materials cenozoicos molasicos. Ixos materials molasicos pueden tener un modelato en forma de mallo. La Sierra de Guara ye un eixemplo de sierra prepirenenca. Bi ha rocas de diferents edatz: chesos de facies Keuper de lo Triasico, calsineras de lo Cretacico, calsineras y sallagons de lo Eocén, piedras d'arena y archilas de lo Eocén superior y l'Oligocén inferior, y almendrons de l'Oligocén superior y lo Miocén inferior.
[editar] Referencias
- ↑ Ánchel Belmonte Ribas, Guía geológica del Pirineo, Editorial Pirineo, 2003.
[editar] Bibliografía
- Ánchel Belmonte Ribas, Guía geológica del Pirineo, Editorial Pirineo, 2003.
