Aragonés de Sobrepuerto

Aragonés de Sobrepuerto
Variedat de l'aragonés
Localización cheografica
Territorios	Sobrepuerto
Lugar(s) principal(s)	Ainielle, Basarán, Otal, Escartín
Sociolochía
Charradors	?
Vitalidat	Muit baixa
Literatura
Escritors principals	Chusé María Satué

L'aragonés de Sobrepuerto u sobrepuertano ye a parla local aragonesa que se charra en o Sobrepuerto, parzana de l'actual Sarrablo que buega con o Sobrarbe. Ye muito pareixito a l'aragonés d'a Tierra de Biescas, pero tiene bells rasgos comuns con o polo oriental de l'aragonés, (aragonés oriental y aragonés centro-oriental). Se conoixe gracias a os triballos lexicografitos y literarios de Jose Mª Satué.

Fonetica

Eixemplos de xordas intervocálicas conservatas:

• capeza, crapazín, amullatar, fusata, caxico, sarrato

Casos de perduga de –o final:

• plan, tabán, fraxín

En a toponimia bi ha casos d'evolución d'a -LL- cheminata latina enta sonitos cacuminals analogos a la che vaqueira de l'asturián occidental: -ch- en Ainielle, Basarán y Otal, -t- en Escartín:

• Batiecho, Cundiacha
• Batella, Batellón, Castetillo, Ostatiás

Casos d'evolución de –ND- enta –ny-

• Baranya, fonyada, canyabla

Esto ye un feito curioso que mos aduya a interpretar a evolución fonetica de l'aragonés pirenaico preliterario:

• A ny en aragonés y lenguas d'arredol ye una evolución d'a –NN- cheminata latina y de –NY-. (PENNA > penya, Hispania > Espanya).
• Existen referencias meyevals de toponimos con –NN- cheminata, (Lanna, Panno), que provienen d'o grupo –ND- y que huei se troban con –n- simpla, (Lana, Pano).
• Baranya, fonyada, etz… tienen –n- en atrás parlas aragonesas, (y mesmo –nn- en belsetán).
• A deducción lochica ye que en o Sobrepuerto a evolución d'a –ND- latina enta –nn- se dio quan encara no heba rematato de tot a evolución d'a –NN- latina enta ny, y que a –nn- que veniba de –ND- continó evolucionando, como venise de –nn- latina, enta ny, (en atrás zonas, más orientals, a –nn- no evolucionó enta ñ, y remató en –n-, (plegando os casos de ny dende fuera en tiempos más recients).

Morfolochía

• Complento bi/i perdito, solo lo veyemos fosilizato en i hai.
• Articlo ro, ros, ra, ras perdito en a parla viva, pero con repuis en a toponimia.
• Se rechistra prou, tipico d'o polo oriental de l'aragonés (aragonés oriental, aragonés centro-oriental y aragonés d'o Semontano de Balbastro), estando muga ueste d'esta forma.

Lexico

• Como representazión de lexico occidental tenemos:
  • catirón, a ormino y xorruntar
• Como representación de lexico oriental tenemos:
  • guambra y rebasto.
• Coexisten formas orientals y occidentals:
  • ovella con uella
  • lurte con esliz
  • calderizo con cremallo
• Existen palabras comuns con Vallivió, Broto y Tena:
  • sisatera, trusa, marueño, fenal
• Y palabras tipicas d'o Sobrepuerto como:
  • musal, xolorar, xurrumido u esperringlero

Vinclos externos

• (an) Vocabulario de Sobrepuerto en a revista d'Amigos de Sarrablo
• (es) Nombres de lugar de Sobrepuerto