Vía Verda de Uellos Negros

De Biquipedia
Ir a la navegación Ir a la búsqueda
Tramo d'a Vía Verda de Uellos Negros.

A Vía Verda de Uellos Negros, tamién conoixida como Vía Minera, ye una vía verda que parte d'as antigas minas de fierro d'a localidat de Uellos Negros, en a comarca de Xiloca (Teruel, Aragón), y finaliza en Algímia d’Alfara, en a provincia de Valencia. A vía trascruza as comarcas de Gúdar-Chavalambre, Comunidat de Teruel y Xiloca en Aragón, y las de Campo de Murviedro y l'Alto Palancia en o País Valencián. Tiene una longaria de 161 kilometros y ye a vía verda acondicionada mas larga d'Espanya, que se gosa recorrer caminando, a caballo y especialment en bicicleta.

Orichen y historia[editar | editar código]

A vía ferria de Uellos Negros-Murviedro estió un ferrocarril construiu ta transportar o mineral de fierro dende Sierra Menera dica o Puerto de Sagunto. En un primer momento, ta a suya exportación, y a partir d'o 1923 ta a suya transformación en acero en os altos fornos de Murviedro.

Periodos historicos[editar | editar código]

Os chacimientos de fierro de Sierra Menera, en as localidatz aragonesas de Uellos Negros y Villar d'el Salz y las castellanas Setiles y Tordesilos, han estau dende antigo a fuent de riqueza mas important en a zona, mesmo antes d'a Edat Meya, en epocas celtiberica, romana y musulmana[1]. Seguntes estudios feitos por os arqueologos Clemente Polo y Julián Ortega, miembros d'o Seminario d’Arqueolochía y Etnolochía de Teruel, ya se realizaban procesos metalurchicos en a zona: extracción, transformación y forchau[2].

A explotación minera[editar | editar código]

A explotación d'as minas se plantió a ciel ubierto porque o mineral afloraba a la superficie. Estió considerada a mayor explotación de mineral de fierro a ciel ubierto d'Espanya. En os primers cinquanta anyos d’explotación s'extrayioron mas de 13.550.000 toneladas de mineral ta tresladar-lo a o Puerto de Sagunto[3].

Cartel informativo sobre as minas en Uellos Negros

A zaguers d'o sieglo XIX se concedió a explotación d'os chacimientos de fierro a la localidat aragonesa de Uellos Negros, a dos interpresarios bascos que fundoron a Companyía Minera de Sierra Menera S.A. o 3 de setiembre de 1900.

O ferrocarril minero[editar | editar código]

A causa d'a cantidat y calidat d'o mineral extraito, deciden solicitar a licencia ta la construcción d'un ferrocarril economico (de vía estreita) ta transportar o mineral dica o Puerto de Sagunto. Decidioron construir ixa linia a causa de quantas diverchencias con os dirichents d'o ferrocarril central d’Aragón, que cubriba l'actual linia entre Murviedro y Teruel y que escurre de traza quasi paralela y a vegadas a menos de cient metros de distancia.

O 10 de chinero de 1902, a reina rechenta María Cristina d’Austria atorga, por una Reyal Orden, a licencia ta a construcción d'un ferrocarril economico que transportase o mineral dica a placha de Murviedro; tamién concede a licencia ta a construcción d'un embarcadero en a placha de Murviedro[4].

A esleción d'o camín d'a vía ferria ofriba quantas alternativas. As ciudatz de Valencia, Castelló de la Plana, Burriana y Vinaroz compitioron ta aconseguir que l'embarcadero s'instalase en os suyos puertos. A companyía trigó Murviedro, descartando trazaus mas complicaus como o d'a salida en Vinaroz pasando por Utriellas u o recorriu por a cuenca d'o río Guadalaviar ta salir a Valencia.

Antiga locomotora en o vico minero de Uellos Negros

Iste ferrocarril teneba una longaria de 205 kilometros, y entre o suyo funcionamiento contaba con 27 locomotoras y 600 tolbas d'acero. Os trens yeran formaus por un numero de tolbas que variaba entre 24, 26 u 33 remolcadas por una locomotora. Dende Teruel dica o Puerto de Casedón caleba usar a dople tracción. L'obra mas important d'este ferrocarril estió o viaducto d'Albentosa, formau por siet arcos con una longaria de 160 metros que salvan una altura de 48 metros.

Aparición y creiximiento d'o Puerto de Sagunto[editar | editar código]

Asinas pues, empecipió un gran libel d'actividat en este embarcadero, arredol d’o qual creixió un incipient nuclio de población de treballadors, de traza semellant (encara que a mayor escala) a os vicos miners de Sierra Menera. Por ixo, a Companyía Minera de Sierra Menera estió a responsable que hue exista o Puerto de Sagunto. En 1917 s’instaló a Companyía Siderurchica d’o Mediterranio (CSM), que s’aprofitaba d’o mineral de fierro ta fabricar acero. Alavez se produció un desembolique economico substancial: en nueu anyos, a zona urbana aumentó dica ueito vegadas a suya población a causa d’a cantidat de chent que veniba de toda Espanya ta trobar treballo.

Cierre y reconversión en vía verda[editar | editar código]

O cierre d’a vía ferria estió alcordau por os nuevos propietarios, que adquirioron a sociedat a zaguers d’os anyos 60, y lo suyo cierre definitivo se produció en 1972. A sociedat minera crebó y mas tardi se desmanteló a siderurchica de Murviedro. Andoni Sarasola, director dende 1947 a 1967 d’a Companyía Minera de Sierra Menera, siempre s’oposó a ixa decisión[5].

En mayo de 2001 o gubierno valenciano fació a devantadera de l’acondicionamiento de l’antigo trazau ferroviario ta que estase usau como vía verda. Posteriorment, o gubierno aragonés y lo Ministerio de Meyo Ambient facioron lo mesmo con a parte aragonesa d’o recorriu. O 26 de febrero de 2008 se metió en servicio a totalidat d’a vía verda.

Cheografía[editar | editar código]

O ferrocarril partiba d'a localidat de Uellos Negros. Dende allí continaba ent'o sudeste puyando por la fuesa de Xiloca dica plegar a Teruel. Dende allí s'internaba en a Sierra de Chabalambre dica penetrar en o País Valencián. Dimpués de trascruzar o Paramo de Barracas dentraba en a sierra de Caudiel u Sierra de Pina, o Monleón en Viver y, en cheneral a mesma plataforma central d'a val d'o río Palancia, a partir d'Exerica, baixando en dende os aproximadament mil metros d'altaria dica la marguin d'a mar, en Murviedro. Manimenos, agora solament plega acondicionada como vía verda dica Algímia d'Alfara.

Recorriu d’a Vía Verda[editar | editar código]

A vía verda acondicionada empecipia en a zona de carga d’o mineral de fierro, en as minas de Uellos Negros, y acaba en plegar a o vico d’a estación de Uellos Negros, dimpués de poco mas de 2 kilometros. Ixo se debe a que a os 25 kilometros entre Uellos Negros y Santa Olalia encara remaneixen as vías orichinals, asperando un posible ferrocarril turistico (atras iniciativas proposan que pueda usar-se tamién como que ciclo-raíl). No se descarta un trazau ta viandants y ciclistas en paralelo.

Dende Santa Olalia lo itinerario ye contino dica plegar a Algímia d'Alfara, con tendencia descendent ent'o mar, tot y que s'ha de salvar o puerto de Casedón, a 1.240 m d’altura.

En total tiene un recorriu d'un poquet mas de 160 kilometros de distancia. Ye a vía verda mas larga d'o Estau.

Itinerario en o País Valencián[editar | editar código]

Algímia d'Alfara (Campo de Murviedro) - Alfara d'Algímia - Algar de Palància - Sot de Ferrer (Alto Palancia) - Segorb - Altura - Navachas - Exerica - Caudiel - Benafer - Viver - Torás (cruce con o GR 7) - Barracas - Lo Toro.

Itinerario en Aragón[editar | editar código]

Albentosa (Gúdar-Chavalambre) - Rubiuelos de Mora - Sarrión - La Puebla de Valberde - Teruel (Comunidat de Teruel) - Caudet - Cella - Villar Cremato - Santa Olalia - Almofalla - Peracens (Xiloca) - Villar d'el Salz - Uellos Negros (cruce con o GR 24)[6]

División actual d'o trazau[editar | editar código]

A vía verda de Uellos Negros amaneixe dividida en dos segmentos atendendo o territorio sobre o qual pasa y l'administración que s'encarga d'o suyo mantenimiento:

  • Uellos Negros I, que ye o zaguer tramo de l'antiga vía ferria, poseye uns 70 kilometros y va dende a estación d'Algímia d'Alfara en o Campo de Murviedro, sobre uns 200 metros sobre o libel d'a mar, dica o limite autonomico con Aragón en o termin municipal de Barracas, zaguera localidat de Castellón, a uns 1.000 metros d'altaria, antes de dentrar en Teruel. Estió acondicionada por a Dirección de Transportes de la Cheneralidat Valenciana. A lo largo d'este tramo existen quince túnels y ueito puents.
  • Uellos Negros II, estió acondicionada por o Gubierno d'Aragón entre 2006 y 2007, y en 2008 por o Ministerio de Medio Ambient. Tiene 91 kilometros y va dende Barracas dica Santa Olalia, a uns 1240 metros sobre o libel d'a mar, pasando por o Puerto de Casedón. A lo largo d'este tramo existen cinco túnels y 13 viaductos.

Coincidencia con o trazau orichinal[editar | editar código]

O recorriu d'a vía verda s'esbarra en quantos puntos d'o trazau orichinal d'o ferrocarril, que ha estau ocupau por edificacions, basas de riego u carreteras. Por eixemplo, a travesía d'Exerica, Altura, zonas de Segorb, Soneja, Algar de Palància, Barracas y bell punto en Albentosa, Casedón u Cella.

Prolongación dica Murviedro y connexión con a Vía Churra[editar | editar código]

As obras de l'autovía Mudéchar ocuporon una parte important d'o trazau orichinal d'a vía verda y a suya recuperación no estió posible. Ta connectar con o suyo orichen inicial, o Puerto de Sagunto, a Consellería d’Infrastructuras y Transportes pretendeba habilitar, en 2009, os 17 kilometros d’o tramo entre Algímia d’Alfara y Murviedro, ta posteriorment plegar a o Puerto de Sagunto. Iste nuevo tramo emplegaría 7,85 kilometros de camins agricolas, 1,15 de carrils-bici existents, 2,68 d’o trazau orichinal y 5,32 de nuevo trazau. O nuevo tramo disposaría de 4 pasarelas, 3 d’ellas d’uns 35 metros y l’atra d’uns 10 metros de longaria y 2 túnels, amás de 2 nuevas arias de descanso, una en a salida d’o primer túnel y l’atra en Albalat dels Tarongers. Amás, ye previsto connectar a vía verda de Uellos Negros entre Murviedro y Pozuel, dende an enlazaría con a Vía Churra. Asinas, se disposaría de mas de 200 kilometros de vial no motorizau entre Uellos Negros y Valencia[7][8][9].

Acondicionamiento[editar | editar código]

Equipamientos[editar | editar código]

A creyación d'a vía verda ha suposau a millora y l'acondicionamiento de quantos equipamientos, mantenendo-se eixemplarment a mayoría d’obras de fabrica, entre ellas los túnels. Podemos trobar:

  • Arias de descanso u miradors con mesas y cadieras de fusta, aparcaders ta bicicletas y arbols ta dar uembra. Seguntes o nombre y lo punto kilometrico, son as siguients: El Palancar (118.90), Plano de Barracas (125.10), Estación de Torás (130.90), Mirador d'El Rodeno (135.70), Masadas Blancas (137.10), Estación de Caudiel (144.70), Novales (150.30), CN-234-Exerica (154.10), Estación d'Exerica (156.45), Mirador d'El Regacho (159.20), Pedrera de Navachas (159.60), Parque d'Altura (163.90), Rambla de Monteros (165.70), Estación de Segorb (169.80), Mirador de Sot de Ferrer (175.70), Autovía Algímia-Torres Torres (184.90).
  • Túnels. A lo largo d'o recorriu s'han recuperau a totalidat de los túnels por an pasaba o tren cargau de carbón, fueras d'o de Gilet.
  • Iluminación. A mayoría de túnels s'han equipau con iluminación que se connecta de forma automatica en o momento que os usuarios se i adentran. Manimenos, ye recomendable levar una lanterna, porque beluns túnels son largos u fan curva, y ixo fa periglosa a circulación a foscas.
  • Puents. Os 21 puents d'a vía verda s'han recuperau.
  • Estacions y garitas de guarda-agullas. S'han recuperau qualques estacions, por eixemplo, a d'El Palancar en Barracas, que actualment funciona como aria recreativa, cubilar con 25 plazas y zona d'acampada ta 120 personas[10] que depende d'a Cheneralidat Valenciana[11], a garita de Santa Barbara en Exerica, etc.
  • Augua potable. A lo largo d'a vía verda son tasos os puntos an provedir-se d'augua a piet de vía. Por tanto, ye necesario ir a las poblacions cercanas ta cargar augua, amás d'ir equipaus con cantimploras. Sí que bi ha augua potable en a estación de Santa Olalia, augua no clorada en a estación d'El Palancar y fuents en o parque d'Altura, a pocos metros d’a vía.
  • Sinyalización. A vía verda tiene abundant sinyalización ta indicar os puntos kilometricos seguindo o kilometrache orichinal d’o ferrocarril (de ueste a iste). Tamién indican l'adreza y distancia d’os lugars d’a redolada con os suyos servicios disponibles, as distancias a las estacions u arias de descanso mas cercanas, as adrezas ta plegar a os puestos cercanos d'a vía verda, y panels informativos con información chenerica: perfils, distancias, accesos y salidas, asinas como sinyals informativos en ciertos viaductos.
Sinyal d'adreza enta Algar de Palància
Túnel d'a Via Verda

Firme[editar | editar código]

O firme d'a vía verda ye diferent seguntes as zonas. En a parte valenciana predomina o firme mixto de tierra comprimida y engudrono, encara que en qualques casos son tramos compartius con a resta d'o transito y bi ha diversidat de pavimentos. En o trazau aragonés predominan os tramos d'engudrono; amás, son abundants as cletas laterals de fusta ta protecher os puntos an una salida de vía puede estar periglosa.

Patrimonio y turismo[editar | editar código]

A vía verda pasa por numerosas localidatz d'intrés arquitectonico, natural y cultural, como Teruel (ciudat mudéchar, declarada Patrimonio d'a UNESCO), Segorb (con a suya seu y ilesias, muralla y gallipuent, l'arco de Verónica y las torres del Botxí), Exerica (con torre mudéchar y un entibo), Altura (con a suya Cartuixa Vall de Crist, d'o sieglo XIV), Albentosa (con a suya ilesia d'estilo gotico tardano y renaixentista), Sarrión (con a suya ilesia parroquial y las trincheras d'a Guerra Civil), La Puebla de Valberde, Cella (con o suyo pozo artesián), Navachas (con o salto d'augua clamau Salto de la Novia). A vía tamién ye trascruzada por l'antiga linia defensiva XYZ de trincheras d'a Guerra Civil.

Bibliografía[editar | editar código]

  • ARRIBAS, Diego (1999), Minas de Ojos Negros, un filón por explotar, Centro de estudios del Jiloca, ISBN 84-609-5134-0
  • HERNÁNDEZ VILLAPLANA, Ricardo (2007), Las Vías Verdes de la Comunitat Valenciana y el trazado turolense de la vía de Ojos Negros, Carena editors, ISBN 978-84-96419-30-8.
  • La Fundación de los Ferrocarriles Españoles (2006), Guía de Vías Verdes (volum 1), Anaya Touring, ISBN 84-8165-761-1.
  • La Fundación de los Ferrocarriles Españoles (2006), Guía de Vías Verdes (volum 2), Anaya Touring, ISBN 84-8165-690-9.

Vinclos externos[editar | editar código]

Referencias[editar | editar código]

  1. «Sierra Menera», Descubre Jiloca.
  2. «Poblados mineros, Sierra Menera», Celtiberia histórica.
  3. «El mítico tren Ojos Negros-Sagunto, de la mina y la siderurgia a la Vía Verde», Paco Huguet, Las Provincias 31/03/2015 (en castellán)
  4. HERNÁNDEZ, Ricardo: Vías verdes de la Comunitat Valenciana (y el trazado turolense de la vía de Ojos Negros). Carena Editors, 2007. ISBN 978-84-964 19-30-8. Pachina 104.
  5. «El sueño de Andoni Sarasola» Información.es 8/07/2008 (en castellán)
  6. GR-24 - Sendero del Jalón y el Jiloca (en castellán)
  7. «La vía verde de Ojos Negros completará su trazado hasta Sagunto» Levante-EMV, 12/7/2008 (en castellán)
  8. «La via verda d´«Ojos Negros» arribarà en 2009 fins a Sagunt», Levante-EMV, 5/1/2009 (en valencián)
  9. LEY 16/2008, de 22 de diciembre, de Medidas Fiscales, de Gestión Administrativa y Financiera, y de Organización de la Generalitat. (en castellán)
  10. «Plan de prevención de incendios forestales de la demarcación de Segorbe» (en castellán)
  11. Aventura't - Guia de turisme actiu (información sobre o cubilar d'El Palancar) (en castellán)