Paisache Protechiu d'os Pinars de Rodeno

Pinars de Rodeno

Pinars de Rodeno
Datos chenerals
Tipo	Paisache Protechiu
Establiu	1995
Superficie	6829,05 ha
Situación
Situación	Sierra d'Albarracín (Teruel)
Latitut
Lonchitut
Mapa

O Paisache Protechiu d'os Pinars de Rodeno ye un paisache protechiu d'Aragón. Se troba situau en a sierra d'Albarracín en a provincia de Teruel, o primero en estar declarau en a provincia de Teruel, en l'anyo 1995. Con una superficie total de 6.829,05 ha protechidas, os pinars se troban entre os 1.095 m. d'altaria, en o barranco de Tobías, y os 1.602 m. en o Cerro d'a Cruz de Montoyo. S'estendilla por os termins municipals d'Albarracín, Exea d'Albarracín y Bezas.

Vechetación

A prencipal especie de pin que i habita ye o pinastre (Pinus pinaster), que se caracteriza por tener una altaria meyana y una crosta aspra de color royenca. Tradicionalment s'han emplegau ta quitar rasina.

A mas se i pueden trobar atras especies d'árbols como os Quercus (Quercus faginea, Quercus pyrenaica y eixemplars relictos de Quercus petrea). Entre os arbustos trobamos os chinebros u os bruecos entre atros.

Fauna

As especies que se troban en os pinars son as tipicas d'a selva mediterrania como os chabalins, corzos, ciervos, rabosas, fuinas, llebres y esquiruelos.

Cheolochía

O suelo d'os pinars ye formau sobre un substrato de piedra panal roya, dita "rodeno" en o Sistema Iberico. Entre as formas que han modelau os achents atmosfericos podemos destacar as foces excavadas por os cursos d'augua, os taffoni (uecos semiesfericos en a paret rocosa) u as gnammas (grans depresions circulars en a superficie d'a roca).

D'atra man tamién bi ha un aria a on que a roca calsinera ye predominant, con un relieu mas suau y zonas altas y planas. En istas zonas trobamos atras especies de pins y carrascas.

Arte rupestre

Bi ha diferents espelungas entre os pinars a on se pueden trobar importants muestras d'arte rupestre levantín, entre as que destacan o Prado del Navazo, Doña Clotilde u a Cocinilla del Obispo. As feguras que se i gosan representar son humans cazando u cullindo y escenas d'animals (mas que mas toros) en colors roya y blanca. Istas pinturas son consideradas como Patrimonio d'a Humanidat per la Unesco dende 1998 per estar incluyidas en l'arte rupestre levantín que s'extiende per tot lo levante espanyol.