Pinus pinaster

*Pinus pinaster*
Pinus pinaster
Denominacions populars
pinastre, pinatón
Clasificación cientifica
Dominio:	Eukaryota
Reino:	Plantae
División:	Pinophyta
Clase:	Pinopsida
Orden:	Pinales
Familia:	Pinaceae
Chenero:	Pinus
Especie:	P. pinaster
Descripción
Pinus pinaster Ait., 1789
Distribución cheografica
Distribución de Pinus pinaster

O pinastre^[1] u pinatón^[1] (d'o latín <pinaster; nombre cientifico Pinus pinaster (Ait. 1789)) ye una especie de pin d'o chenero Pinus, en a familia Pinaceae, natural d'a cuenca mediterrania occidental. Se'n troba poblacions naturals cuasi que exclusivament en Portugal, Espanya, Italia, Francia, Marruecos y Archelia.

En Aragón no yera una especie guaire abundant (anque ye autoctona) dica que con os prochectos de repoblación forestal d'a primera metat d'o sieglo XX se'n emprencipioron a plantar grans extensions. Como ye un árbol que s'adapta bien a lo clima aragonés, y enantes se trobaba restrinchito per a presencia de carrascals y caixigars en a mes gran parte d'o territorio, se ye distribuito per gran parte d'a cheografía aragonesa en substitución d'ixas formacions de planifolios que ya en heban desapareixito. En cualques zonas d'a Comunidat Autonoma, como en Sobrarbe, Sarrablo u en as sierras de Teruel, o pinastre fa parte d'extensas formacions chóvens (50-70 anyos d'antigas) que son producto d'as repoblacions masivas en o sieglo pasato.

En a Peninsula Iberica, substituye a o pinarro (Pinus halepensis) en altitut (dillá d'os 200 m) y tamién en continentalidat, estando mes sofridera que no ixa especie con o frido y las chelatas d'hibierno.

O pinastre tiene as fuellas d'una color verda mes vitarisca que no en P. halepensis, anque la suya mida y lonchitut podesen fer-las pareixer. A crosta sole estar grisa anque la suya coloración en as zonas chóvens ye mes royisca que en altras especies de pins (treito, lochicament, d'o pin royo, Pinus sylvestris, que tamién abunda en Aragón). As pinyas, sin guaires particularidaz, son mes chaparretas que no en P. halepensis, y las flors mes que mes as femeninas, son amariellas u naranchencas prou visibles cuan son brostadas.