Comunidat de Daroca

De Biquipedia
Ir ta: navego, busca
Este articlo ye sobre l'antigo districto medieval de Daroca. Ta l'actual comarca se veiga Campo de Daroca.
Comunidat de Daroca
Comunidat d'o Reino d'Aragón
Comunidat de Daroca.svg
En royo situación en as comunidatz aragonesas
Capital No bi'n heba
Idioma oficial
 • Luenga propia
Aragonés
Aragonés d'as comunidatz aragonesas
Entidat
 • Estato
 • País
Comunidat
Siñal d'Aragón.svg Corona d'Aragón
Siñal d'Aragón.svg Reino d'Aragón
Subdivisions Sexma de Barrachina
Sexma de Gallocanta
Sexma de la Honor de Uesa
Sexma de Langa
Sexma de Trassierra
Sexma de Xiloca

La Comunidat de Daroca estió un districto churisdiccional adintro de la estructura descentralizata de la Corona d'Aragón.

Historia[editar | editar código]

Sexmas primitivas de la Comunidat de Daroca

   Sexma de Langa

   Sexma del río Xiloca

   Sexma de Barrachina

   Sexma de Gallocanta

   Sexma de Trassierra

Lo territorio de lo que dimpués será la Comunidat de Daroca amaneixe ya mentato en lo fuero de 1142; n'este s'atorga a Daroca unas mugas que plegaban ta las actuals provincias de Teruel, Castellón, Cuenca, Valencia, Guadalachara y Zaragoza.

Podemos leyer las mugas n'una versión de lo fuero de 1142, concedito por Remón Berenguer IV de Barcelona:

Ego, comes Raymundus Barcilonensis et princeps Aragone, concedo et otorgo istam cartam et istum forum et quidquid boni invenerint de his decem annis et do illis istos terminos de Villa Feliç ad Atea, a Cemballe, a Cubelo, a Cubellego, a Çafra, a Rodenas, a Sancta Maria, a Castiel Savib, a Demuz, a Serreilla, ad Alpuent, a la Cirab, a Tor Alba, a Montan, a Linares, a Rio de Martin, ad Vesa, a Fonte de Tosos, a Villa Nova, a Longares, a Consuelda, a Codo, a Miedes, istas prenominatas cum suis terminis.

Como se puet veyer incluiban muitos territorios que alavez yeran en poder de los moros (y que teoricament os habitadors de la Comunidat heban d'aduyar a conquerir). Manimenos encara que los exercitos aragoneses los reconquirioron, no quedoron en la comunidat. De feito, en 1177 se creyó la Comunidat de Teruel en la parte sudeste de lo gran territorio que lis heban concedito, en haber perdiu Daroca lo suyo paper estratechico en la defensa de la muga con los musulmans.[1]

En l'anyo 1205 ye quan se cita por primera vegata la més gran part de las localidatz que dimpués constituirán la Comunidat de Daroca. Ye un texto d'asignación de diferents rendas y decimas a las ilesias de Daroca por part de lo Bispe de Zaragoza, Remón de Castrocol. Las ilesias de Daroca yeran diez: Santa María, Sant Per, Sant Andreu, Sant Chuan, Santo Domingo, Sant Miguel, Sant Chaime, Sant Martín, Sant Lorient y Sant Valero.

En lo documento se van dicindo que aldeyas perteneixen, en la qüestión de las decimas y primicias, a las diferents ilesias y los clerigos suyos. Pero s'ha de dicir que no totas las aldeyas de Daroca hi son rechistratas, car no perteneixeban encara a la Comunidat (como la Honor de Uesa) u por tener un estato especial por razons estratechicas como Cutanda, Peracens, Mont-reyal y atras. Se mentan quasi totas las aldeyas de la sexma de Barrachina y muitas aldeyas huei despoblatas, lo que indica un rete de colonización prou denso y talment creiximiento de población.

La Comunidat de Daroca existe como institución por lo menos dende 1248, quan consiguiron la suya independencia con respecto a la villa a cambio de pagar a lo rei 10.000 sueldos anyals.

En la primera mitat de lo sieglo XVII la Comunidat compró la Honor de Uesa y la Baronía de Segura por 60.000 escutos d'archent. Los 11 lugars d'estas entidatz territorials formoron una seisena sexma.

Organización administrativa[editar | editar código]

As 6 sexmas de la Comunidat de Daroca

   Sexma de Langa

   Sexma del río Xiloca

   Sexma de Barrachina

   Sexma de Gallocanta

   Sexma de Trassierra

   Sexma de la Honor de Uesa

La historia politica se desembolica con la historia de la capital suya, Daroca, pero egual que con atras comunidatz aragonesas se produce una desaparación de las aldeyas y la capital con lo paso de lo tiempo, con disputas chudicials.

Asinas las aldeyas consiguioron una independencia churisdiccional de lo chusticia de Daroca dimpués d'encarar-sen muitas vegatas, quedando reservata a lo chusticia nomás que las causas criminals y furtos importans u con violencia.

Las plegas u reunions de los aldeyans se feban a part de los de la ciudat, los impuestos se pagaban por deseparato, ninviaban representants diferents debant lo rei, y mesmo tenioron un escanyo propio en las Cortz.

La ciudat no siempre respetó esta independencia de las aldeyas, pero con lo tiempo lo rei dio lo mesmo privilechio a la ciudat y las aldeyas.

Los suyos organos de gobierno yeran la plega u reunión cheneral, lo consello y las plegas extraordinarias.

  • La primera se reuniba una vegata a l'anyo en un puesto no fixo de la Comunidat que no podeba estar Daroca.
  • La composición de lo consello tamién evolucionó, pero los oficios prencipals, de duración anyal u d'elección dreita yeran: l'escribán, (cargo de més gran importancia, que replegaba los impuestos de la comunidat), un sexmer de cadaguna de las sexmas, que administraban chusticia chunto con dos churatos, dos por aldeya, quatro hombres buenos por sexma, y lo procurador cheneral.

En las aldeyas amás de los dos churatos lo rechimen yera de concello ubierto. La población yera de cristians, chodigos y moros, como en Daroca, pero en numero muito mas baixo d'estos zaguers. No mas existioron alchamas que en Carinyena, Baguena y Burbaguena. Estió tipico en lo rechimen democratico de la Comunidat la oposición a los habitadors nobles u infanzons, por lo sentito egualitario de los pobladors, y doncas los cargos publicos lis yeran betatos.

Yera dividita en sexmas u sesmas:

Organización eclesiastica[editar | editar código]

Seguntes lo establito por Remón de Castrocol en 1205, catorze de las aldeyas heban d'entregar antes de lo día de Sant Martín una contribución (collacionum) de dos fanegas d'hordio y dos de trigo a beluna de las parroquias de Daroca.

Lo reparto quedó asinas seguntes se deduce de lo texto adhibito a lo Libro vermello de l'Archivo Colechial de Daroca:

Ilesia de Ferrera de los Navarros en a sexma de Trassierra

La distribución de decimas y primicias estió:

Bi ha unas dotze aldeyas de lo espacio cheografico de la Comunidat de Daroca que no se mencionan en lo reparto, seis d'ellas s'adhibiron a la Comunidat dimpués (Tornos, Burbaguena, Mont-reyal, Almofalla, Peracens y Villar del Salz), y atras seis las fundoron u refundoron dimpués, tenendo la radiz villa: Villafranca, Villarroya, Villafermosa, Villadolz, Villarreyal y Lo Villarello.

Referencias[editar | editar código]

  1. (es) Antonio Gargallo Moya El Concejo de Teruel en la Edad Media volumen I. Instituto de Estudios Turolenses, 1997 isbn=84-86982-64-2.

Bibliografía[editar | editar código]


 
Comunidatz d'aldeyas d'o Reino d'Aragón
Armas del soberano de Aragón.svg
Comunidat d'Albarrazín | Comunidat de Calatayú | Comunidat de Daroca | Comunidat de Teruel