La Puebla d'Íxar

Iste articlo trata sobre La Puebla d'Íxar. Ta atros emplegos d'o toponimo Puebla se veiga Puebla (desambigación).

La Puebla d'Íxar (La Puebla de Híjar en castellán) ye un municipio aragonés de la provincia de Teruel, situato en la comarca de lo Baixo Martín.

La suya población ye de 1.006 habitants (2010) en una superficie de 60,78 km² y una densidat de 16,55 hab/km².

Cheografía

La Puebla d'Íxar ye situato en un plan, a 254 metros d'altaria dencima de lo ran de la mar y a una distancia de 163 km de Teruel, la capital de la suya provincia, y de 78 km de Zaragoza, la capital d'Aragón, con abundants auguas sotorranas. O suyo termin municipal ye trescruzato por o río Martín

La gara de lo tren (Ferrocarril de la Val de Zafán) se fació a bells centenars de metros de lo nuclio més antigo de lo lugar. Actualment una carrera luenga une la estación con lo nuclio antigo.

En lo suyo termin, pero más a mán de Zaila y La Zaida ye lo despoblato de La Romana, que se menciona en textos de principios de lo sieglo XII. Atros nuclios de población tamién hué deshabitatos son La Romaneta, Torre la Sorda, Torre L'Ausín y Fabrica Salitraría. A man de La Romaneta trobamos la LIC de Val de Mesón con una important presencia d'aus esteparias.

Muito en las afueras de lo lugar bi ha un poligono industrial situato en la marguin de la carretera nacional N 232 en dirección Zaragoza dito Venta del Barro con la fabrica de Prenavisa, un hostal y lo club Shangai-Lilí. En a Guerra Civil Espanyola estió un campo d'aviación.

Mugas

Binazeit, Zaila	La Zaida	Sastago
Almochuel		Exatiel
	Íxar	Sant Per de Calanda

Parla

L'aragonés residual de La Puebla ye uno de los primers que s'estudeoron. Felix Monge, profesor d'a Universidat de Zaragoza, que ye naixito en Mainar, vivió de nino en La Puebla y publicó un estudeyo incompleto en 1951. La parla de La Puebla teneba ya n'ixas envueltas de Felix Monge menos aragonesismos que las parlas d'Íxar u Sant Per porque la zucrera y la estación trayoron muita población d'atros lugars de la redolata, como a familia de l'actriz Sara Mora Romeo y tamién de muit luent. Los factors socioculturals yeran prou diferents a los de la redolada, car yera un lugar industrializato. Manimenos encara rechistró los imperfetos traiban y saliban y muito vocabulario.

La embotada de los de La Puebla ye en aragonés: los d'Íxar lis dicen bachanos probablement porque son auguas ta baixo de lo río Martín (Baixanos > Bachanos por cheada). Los de Binazeit (pronunciato en a redolata Binazai) tamién dicen asinas a los de Zaila, auguas ta baixo de lo río Aguas. La mesma embotada tienen los de Muniesa.

Toponimia

Lo nombre feba referencia a un poblato anterior a la repoblación dito Gayén, asinas por eixemplo en la decada de 1450 Juan Fernández de Íxar escribiba:

Anuezco e perpetua, indivisible e inseparable unión fago de los castillos, villas e lugares de Ixar, Urrea, la Pobla de Gayen e la Pobla de Benalfajar, de Belchit, Almonezir e la Pobla d'Albortón, e de Lezera e de Binazeit, con toda la jurisdiccion civil e criminal

Con lo tiempo s'imposará l'apelativo d'Íxar, en especial quan son forachitatos los moriagos. Podemos veyer l'alternancia en Pobla de Izar de lo Fogache de 1495 y Pobla de Gayén u Puebla de Gayén en un texto de 1502.

Encara bi ha toponimos en aragonés u con trazas aragonesas: Valletas, El Bochar, Espartosa, Ferrada, Ferraduras, Fila Badía, Fila del Pino, Fila Jordana, Fila Ráfales, Fila Rilla, Foguera, Foladaza, La Presquera, La Torraza, Loma el Coleto, Los Valellos, Mayuelos, Molino Rafel, Ojo Ferrerón, Plana San Antón, Planas, Basales, Val de Zaila, etz... Foladaza ye una zaica que riega lo que enantes se diciba Foya de la Daza u Suelto de San Per, y perteneixeba a lo termin de Sant Per de Calanda que mugaba con La Romana. Mayelos ye una trascripción yeista de Malluelo que significa "vinyero chóven" en aragonés meyeval y testimonia la tradición viticultora de la redolada enantes de las grans plagas de Filoxera.

Curiosos son los toponimos El Chárif, una plaza con una fuent a la entrata de lo lugar, y Val de Zafán. En lo primer caso ye quasi seguro que siga d'orichen arabe, en lo segundo podría estar un caso de metatesi dende l'adaptación aragonésa de Hassán: *Val de Fazán > Val de Zafán. Val de Zafán dió nombre a un tren, o Ferrocarril de la Val de Zafán y la suya linia ferria que trescurzaba las comarcas de lo Baixo Aragón, Matarranya y Tierra Alta dica arribar en Tortosa, on li diciban Lo Banyero.

Apellitos

Son caracteristicos los apellitos Artal, Bordonaba, Gareta, Mugüerza, Pina, Pellicena, Polo, Sierra y los d'orichen occitán Guallar (derivato de Guallart) y Lambea (derivato de como se diz en gascón Lembeye y castellanizato como la zaica Gayén en Gaén y foyeta en foeta por perduga de -y- epentica).

Demografía

Evolución demografica

1362 f 1495 f 1842 1857 1860 1877 1887 1897 1900 - - 2.321 2.343 2.274 2.150 2.152 1.900 1.934

1910 1920 1930 1940 1950 1960 1970 1981 1991 2.276 2.790 2.837 2.328 2.651 2.506 2.105 1.534 1.256

1992 1994 1996 1997 1998 1999 2000 2001 2002 - - 1.145 - 1.117 1.105 1.089 1.078 1.074

2003 2004 2005 2006 2007 2008 2009 2010 2011 1.035 1.013 1.015 1.016 1.005 1.018 - 1.006 -

2012 2013 2014 2015 2016 2017 2018 2019 2020 - - - - - - - - -

2021 2022 2023 2024 2025 2026 2027 2028 - - - - - - - - - -

1717-1981: población de feito; 1990- : población de dreito. Fuent: Intercensal en l'INE, Series de población en l'INE y Relación d'unidatz poblacionals en l'INE.

Administración

Reparto de concellers

Eleccions municipals
Partito	1979	1983	1987	1991	1995	1999	2003	2007	2011
Izquierda Unida									5
Partido de los Socialistas de Aragón									2
Partido Popular									1
Partido Aragonés									1
Total									9

Alcaldes

Lista d'alcaldes

Lechislatura	Nombre	Partito politico
1979–1983
1983–1987
1987–1991
1991–1995
1995–1999	Juana María Barreras Falo	Partido de los Socialistas de Aragón
1999–2003	Juana María Barreras Falo	Partido de los Socialistas de Aragón
2003–2007	Juana María Barreras Falo	Partido de los Socialistas de Aragón
2007–2011	Juana María Barreras Falo	Partido de los Socialistas de Aragón

Puestos d'Intrés

Molimentos relichiosos

• Ilesia parroquial de la Natividat de la Virchen, una ilesia de lo sieglo XVIII.
• Ermita de Nuestra Sinyora de las Dolors y de lo Santo Sepulcre, una ermita de lo sieglo XVII.

Obras hidraulicas

• El Charif, fuent-abrevador en a plaza homonima.
• La Torica, un gallipuent de piedra picata construito en o sieglo XIX.

Fiestas

• 17 de chinero: Sant Antón.
• 20 de chinero: Sant Fabián y Sant Sabastián.
• 15 de mayo: Sant Isidro Labrador.
• 25 de chulio: Sant Chaime o Mayor.
• 15-16 d'agosto: Asumpción de la Virchen y Sant Roque.

Veyer tamién

• Lista de municipios de Teruel.

Enrastres externos

• Se veigan as imáchens de Commons sobre La Puebla d'Íxar.
• (es) Pachina web no oficial sobre La Puebla d'Íxar.

Imáchens

• 
  Gara de la Puebla d'Íxar en abril de 2006.
• 
  Anviesta de la Puebla d'Íxar, abril 2006.
• 
  Fuent del Chárif, abril 2007.
• 
  Frontera de la escuela, 2007.