Secale cereale

Segal
Segal
Clasificación scientifica
Dominio: Eukaryota Reino: Plantae División: Magnoliophyta Clase: Liliopsida Orden: Poales Familia: Poaceae Chenero: Secale
Nomenclatura binominal
Secale cereale
M. Bieb.

O segal (en benasqués selga (femenino)) u centeno (Secale cereale (M. Bieb.)) ye una planta graminia monocotiledonia de creiximiento anyal, caultivata en bells puestos como cerial domestico, u como pastura ta lo bestiar (en os ferranyals). En l'Alto Aragón no i tiene guaire tradición de caultivar-se, y sobretot i ye coneixito como planta espontania en os campos de trigo u hordio, espreciato per a menor calidat d'o suyo grano.

Campos de Segal en Rusia. Ivan Shishkin, 1878.

En os zaguers anyos se son itas proliferando diferents manieras de posar-lo en consumo, y en l'actualidat tienen reputación os pans que se'n elaboran, sobretot perque s'ha gosato considerar-lo un complemento dietetico con riqueza en fibra y l'aporte de gusto singular que i fa. O suyo caultivo extensibo i ye tradicional en bells paises, anque no en a Peninsula Iberica. Tolera las sequeras y las baixas temperaturas millor que no lo trigo u l'hordio, gosando manifestar actividat vechetativa (ixo ye, creiximiento) tamién en os días d'hivierno, cosa que l'ha feto d'estar emplegato en paises fridos més que no los altros cerials tradicionals; A lista d'os prencipals paises productors d'este cerial en o mundo encluyen Rusia, Alemanya, Polonia u Canadá. En a Edat Meya en Aragón as zonas productoras de segal se concentraban en o Sobrarbe, Ribagorza y Comunidat de Daroca.

As espigas tienen una forma caracteristica, son baixas per cuentas d'estar rectas como en os altros cerials, y tienen lo nombre popular de benciellos per pareixer-se a os beciellos tradicionals. A palla ye més fina que en altros cerials, y puet emplegar-se fendo parte d'o fen, en chunto con l'alfalz y altras hierbas, ta paixentar las bestias.

Vinclos externos

• Biquiespecies tiene un articlo sobre Secale cereale.
• Se veigan as imáchens de Commons sobre segal.