Combinacions de pronombres febles en l'aragonés

As combinacions de pronombres febles en l'aragonés presentan en bells casos aspectos pareixitos a las luengas circunvecinas y en o caso d'as combinacions de pronombres de tercera presona d'acusativo y dativo presentan formas exclusivas d'a luenga aragonesa y diferents d'as luengas circumvecinas.

Combinacions de pronombres de dativo y acusativo

Primera presona de dativo con primera presona d'acusativo

O pronombre nos (modernament mos en zonas de l'aragonés oriental coincidindo con variants vicinas d'o catalán y determinatos usos populars castellans) se combina d'una traza simpla con os pronombres de complemento directo u acusativo lo, los, la, las.

Dativo	Acusativo	Resultato
me	lo	me lo
me	los	me los
me	la	me la
me	las	me las
nos	lo	nos lo
nos	los	nos los
nos	la	nos la
nos	las	nos las

Manimenos en cheso (aragonés occidental), aragonés de valle de Vio, aragonés d'a valle de Puértolas (aragonés centro-oriental), y en bells textos meyevals trobamos a construcción invertita coincident con l'occitán, francés y atras luengas romanicas no peninsular. Ye posible que en o pasato estasen as formas chenuínas en aragonés.

• no lo nos diciés (cheso)
• as me dejón fer (aragonés d'a valle de Puértolas)

Segunda presona de dativo con tercera presona d'acusativo

O pronombre vos (modernament tos en l'aragonés oriental) se combina d'una traza simpla con os pronombres de complemento directo u acusativo lo, los, la, las.

Dativo	Acusativo	Resultato
te	lo	te lo
te	los	te los
te	la	te la
te	las	te las
vos	lo	vos lo
vos	los	vos los
tos	la	vos la
vos	las	vos las

Manimenos en cheso (aragonés occidental), aragonés de valle de Vio (aragonés centro-oriental) y en bells textos meyevals trobamos a construcción invertita coincident con l'occitán, francés y atras luengas romanicas no peninsular. Ye posible que en o pasato estasen as formas chenuínas en aragonés.

• mia que la te crebo (cheso)
• m'olvidé de dicir-lo-vos (cheso)
• mete-lo-te en a capeza (aragonés de valle de Vio)

Tercera presona de dativo con tercera presona d'acusativo

Estas combinacions presentan a particularidat que dimpués de fer-se a combinación desapareixe a indicación de chenero y numero de l'acusativo pero se mantién a indicación de numero en o dativo.

En a tabla figura o pronombre de dativo le, les reflexando a pronunciación més extendillata. Pa la variant li, lis propia de l'aragonés occidental y que antigament tamién estió més extendillata valen as mesmas combinacions.

Eixemplo d'oración sin pronombre	Dativo	Acusativo	Resultato	Eixemplo d'oración con pronombres
Doi a la yaya o paquet	le	lo	le'n, le-ne	le'n doi
Doi a la yaya os paquetz	le	los	le'n, le-ne	le'n doi
Preparo a la yaya a infusión	le	la	le'n, le-ne	le'n preparo
Preparo a la yaya as infusions	le	las	le'n, le-ne	le'n preparo
Preparo a la yaya infusions	le	En/ne	le'n, le-ne	le'n preparo

Eixemplo d'oración sin pronombre	Dativo	Acusativo	Resultato	Eixemplo d'oración con pronombres
Doi a los yayos o paquet	les	lo	les ne, les-ne, les n'	les ne doi
Doi a los yayos os paquetz	les	los	les ne, les-ne, les n'	les ne doi
Preparo a los yayos a infusión	les	la	les ne, les-ne, les n'	les ne preparo
Preparo a los yayos as infusions	les	las	les ne, les-ne, les n'	les ne preparo
Preparo a los yayos infusions	les	En/ne	les ne, les-ne, les n'	les ne preparo

Esta construcción a parte de fer-se servir en l'aragonés de tot l'Alto Aragón (de fueras d'a Ribagorza) se troba documentato en os restos d'aragonés d'os Monegros, en a parla caspolina y chipranesca (Baixo Aragón-Casp). Tamién lo trobamos como aragonesismo en o "Libro d'Aleixandre" (aplegaron a el algunos muchos y diéronle ende), que lende habia porparado).

Orichen y variants

En aragonés meyeval si que bi heba indicación de chenero y numero en los pronombres d'acusativo presents en la combinación, como encara se fa en belsetán.

• di-le-lo.
• le'l trayen.
• les-la trayen.
• les-le trayen.

A variant orichinal que conserva o belsetán se documenta en a versión A d'o "Poema de Yuçuf" (dio les le, a que le l tornase, no le l consentiba, el les lo atorgó, pues ellos lo quisieron), en a "Cronica de Sant Chuan d'a Penya" (si non lel quiries soltar) y en dos libros d'a obra de Chuan Ferrández d'Heredia.

As parlas ribagorzanas presentan unas combinacions de pronombres relacionatas con o catalán con o que muga, ye un orden de pronombres tamién coincident tamién con o francés (les lui):

• lo + li > lo-i
• los+ li > los-i
• la + li > la-i
• las+ lis > las-i

L'aragonés d'as comunidatz aragonesas presentaba unas combinacions ge lo, ge los, ge la, ge las y ge les pareixitas a las d'o castellán contemporanio.

Dativo	Acusativo	Resultato
le	lo	ge lo
le	los	ge los
le	la	ge la
le	las	ge las
le	En/ne	?

Dativo	Acusativo	Resultato
les	lo	ge les
les	los	ge les
les	la	ge les
les	las	ge les
les	En/ne	?

As combinacions de pronombres presonals en aragonés y luengas romances circumvecinas
Aragonés | Castellán | Catalán | Occitán

Bibliografía

• Anchel Conte et al. "El aragonés: identidad y problemática de una lengua". Librería General (1982).
• Francho Nagore "Gramática de la lengua aragonesa". Mira Editores. (1989).
• Chabier Tomás Arias El aragonés de Viello Sobrarbe. Instituto de Estudios Altoaragoneses. (1999)
• Juan Zonaras. Libro de los Emperadores (Versión aragonesa del compendio de historia universal patrocinada por Juan Fernández de Heredia). Edición de Adelino Álvarez Rodríguez. Larumbre Clásicos aragoneses.
• Ramón Menéndez Pidal Poema de Yuçuf: Materiales para su estudio, Granada, Universidad de Granada, 1952, págs. 62-63