Verbos irregulars acabaus en -ducir

De Biquipedia
Ir a la navegación Ir a la búsqueda
Verbos irregulars
en aragonés

Por diftongación d'a radiz

Acabaus en -iar (no freqüentativos)
Acabaus en -iar (freqüentativos)
Acabaus en -nyer u -nyir
Acabaus en -uir
Acabaus en -ducir

Con epentesi antihiatica
Acabaus en -yer
Acabaus en -yir

Participios fuertes
Pasaus perfectos fuertes

Os verbos irregulars acabaus en -ducir son derivaus de verbos latins derivaus de DUCERE y presentan diferents trazas d'irregularidat derivadas d'a presencia d'a sonorización d'a C xorda oclusiva intervocalica latina u d'a palatalización d'a C en as silabas CE, CI. A irregularidat d'estos verbos ye pareixida a la d'o verbo decir/dicir. Tamién influyen o pareixiu con a terminación de verbos d'a tercera conchugación como nocir y as conchugacions incoativas en -eixer y en -ir. No bi n'ha estudios profundos sobre esta clase de verbos irregulars, ni dende a filolochía tradicional espanyola ni dende a filolochía que estudia l'aragonés como una luenga romanica. L'academia de l'aragonés considera que son verbos irregulars que actualment siguen o modelo de lucir y que en aragonés medieval teneban formas diferents en o present d'indicativo, en o present de subchuntivo y tamién en o participio y o pasau perfecto simple fuertes.

Verbos d'este modelo son:

  • aducir, conducir (muito freqüents en o lexico propio d'os textos medievals), circumducir, introducir, deducir, inducir, reducir, traducir, producir, reproducir y tecnicismos scientificos prou modernos como subducir y obducir.

Infinitivo[editar | editar código]

Estos verbos presentan un infinitivo acabau en -ir, por lo que perteneixen a la tercera conchugación aragonesa, encara que deriven d'o verbo latín DŪCERE acabau en -ERE, d'a tercera conchugación latina. A palabra latina DŪCERE ye relacionada con a palabra duque, que tamién deriva d'a radiz indoeuropea *dewk-. Tamién derivan d'esta radiz indoeuropea as palabras anglesas tow y team.

En benasqués como ye natural estos verbos presentan una pronunciación seseyada y sin -r final: /condusí-se/ y /redusí/ por eixemplo.[1] Esta parla de transición n'este aspecto s'alinia con l'aragonés y muestra un comportamiento diferent d'o catalán con o que muga, que pierde a consonant intervocalica por o que fa a estos verbos: conduir, reduir.

Participio[editar | editar código]

Ye bien documentau l'uso medieval de participios fuertes -eito como adueito, indueito, u redueitos como aduito, conduito, que tienen una continación en benasqués: conduta. Resto d'este uso de participio en -ueito tenemos a forma mezcliza doecho (con trazas evolutivas castellanas -it- > -ch-) en Echo, Aragüés de lo Puerto y Embún, que ye una part d'un aladro caracteristica d'o viello aladro román.[2] As formas regulars en -ido son tamién bien documentadas en aragonés medieval y en aragonés actual corresponden a la forma més arcaica -ito de l'aragonés central y -iu de l'aragonés cheneral.

Present d'indicativo[editar | editar código]

En aragonés medieval ye

Present d'indicativo
Adugo[3]
Aduzes
Aduze
Aduzimos
Aduzid(e)s
Aduzen

S'escriben con -z- en aragonés medieval como plazer y fizo talment indicando una pronunciación sonora.

En aragonés actual se conchugan d'una traza influita por o castellán

Present d'indicativo
Conduzco
Conduces
Conduce
Conducimos
Conducitz
Conducen

Pasau perfecto simple[editar | editar código]

En aragonés medieval se troban quasi siempre as formas correspondients a los pasaus fuertes con xe: ell aduxo; d'a mesma traza se forma l'imperfecto subchuntivo: aduxies. No bi ha estudios que confirmen a persistencia d'estas formas actualment en l'Alto Aragón, pero podrían existir en o semontano pirenenco u Prepireneu d'una traza castellanizada como as formas dihe, dihes y diho d'o verbo dicir y as formas trúhes, trúho d'o verbo trayer. En o Libro d'el Trasoro amaneix conduzió.

Present de subchuntivo[editar | editar código]

En aragonés medieval ye

Present de subchuntivo
Aduga
Adugas
Aduga
Adugamos
Adugad(e)s[4]
Adugan

En aragonés actual se conchugan d'una traza influita por o castellán

Present de subchuntivo
Conduzca
Conduzcas
Conduzca
Conduzcamos
Conduzcatz
Conduzcan

Futuro simple[editar | editar código]

L'aragonés medieval presenta formas regulars sobre l'infinitivo (aduzirá) y formas con sincopa (adurán).

Referencias[editar | editar código]

  1. (es) Ángel Ballarín Cornel: Diccionario del Benasqués. Institución Fernando el Católico, Zaragoza, segunda edición 1978. p 269, p 419
  2. (es) KUHN, Alwin, El Dialecto Altoaragonés (traducción de l'orichinal de 1935); Xordica Editorial. Zaragoza, 2008. ISBN 978-84-96457-41-6
  3. (an) Cronica de los Conquiridors
  4. (es) María Bonet Donato: La Orden del Hospital en la corona de Aragón: poder y gobierno en la Castellanía de Amposta (ss. XII-XV) Volumen 22 de Biblioteca de historia, Consejo Superior de Investigaciones Científicas (España). Consejo Superior de Investigaciones Científicas, 1994 [1]

Bibliografía[editar | editar código]