Mosqueruela

Ta atros emplegos d'o toponimo Mosqueruela se veiga Mosqueruela (desambigación).

Mosqueruela
Municipio d'Aragón
Entidat  • País  • Provincia  • Comarca	Municipio Aragón  Teruel Gúdar-Chabalambre
Superficie	265 km²
Población  • Total	608 hab. (2010)
Altaria	1.471 m.
Distancia  • 99 km	enta Teruel
Codigo postal	44410
Ríos	Linars
Coordenatas	40°21’46’’N 0°26’56’’U
Mosqueruela Situación de Mosqueruela en Aragón

Mosqueruela (Mosquerola en catalán) ye un municipio de la provincia de Teruel, situato en la comarca de Gúdar-Chabalambre. La suya población yera de 608 habitants (2010), en una superficie de 265 km².

En 1982 Mosqueruela fue declarato Conchunto Historico Artistico.

Cheografía

Ye situato en la costera oriental de la sierra de Gúdar en un polje karstico, a 1.471 metros d'altaria, a una distancia de 99 km de Teruel. Lo termino de Mosqueruela ye muito gran y i naxe lo río Mallo, que va ta l'este pasando a man de lo Castiello del Mallo, y lo río de las Truitas, que va ta lo norte y ye afluent d'o río Alcherez.

Lo termin de Mosqueruela ye tan gran que ya dende antigo se dividió administrativament en Cuartos u Partidas, que dimpués no n'estioron quatro sino cinco: Valdelamadera, Las Canyadas, Los Carrascales, El Pinar Plano y La Estrella u Peñas Abajo. Las quatro primeras son particions radials arredol lo nuclio de población y bi ha muitos mases, la cinquena ye especial porque correspone a lo historico termin de lo Castiello del Mallo, y ye a lo costato de Los carrascales.

Cadaguna de las cinco partitas poderba haber estato lo terreno d'una población si s'hese concentrato l'habitat, pero esto nomás se desvinió con lo vico de la Estrella, dito La Villeta en Mosqueruela, hereu de l'anterior poblamiento islamico, y dende on se chestionó tota la partita, con un aldalde pedanio ya en epoca contemporania. En la resta de las partitas floreixió la dispersión de nuclios d'habitat: los mases u masadas.

Mugas

Lo suyo termin muga con Puertomingalvo, Nogueruelas, Val de Linars, Fortanet, Cantaviella y La Iglesuela en la provincia de Teruel, y con Villafranca y Vistabella en a provincia de Castellón.

Fortanet	Cantaviella	La Iglesuela, Villafranca
Val de Linars		Vistabella
Nogueruelas	Puertomingalvo

Historia

Lo poblato iberorromán de San Antonio encara yera poblato en la Edat Meya musulmana. Los musulmans andalusís costruyoron lo castiello del Mallo en l'este de lo termin talment pa aturar l'abance cristián.

Seguntes Cheronimo Zurita, Alifonso II lo Casto reconquerió en 1181 la zona de l'actual nuclio urbán, y dimpués tendrá importancia como muga con los musulmans, como lugar de paso pa las cabalgatas de saqueyo cristianas que de camín ta la costa, y como un punto de referencia en la conquista de Valencia. De fuents historicas se conoix lo trazato d'un vial, dito calçada de Meder, que mugaba lo termin en l'aria noreste. N'esta parte de lo termin i heba chicotz asentamientos ditos Las Posadas de Atorella, Las Casiellas u Las Covas de Petro Exameneç. Las noticias d'este periodo son escasas, Pero II concedió en octubre de 1203 a Arnal Palaciano lo lugar hue desconoixito de Bos, que los moros diciban Val de Ursera, y que se crei que mugaba con Mosqueruela. Tamién sorprende la donación de lo castiello del Mallo a Gastón de Castellot en chinero de 1204, que no pareix que lo rei controlase.

Pareix estar que en 1234 los mesmos habitants de Mosqueruela conquerioron lo castiello del Mallo. La fundación de Mosqueruela estió en 1265 por orden de Chaime I d'Aragón, pero lo toponimo ya existiba enantes. Perteneixió a la Comunidat de Teruel, dentro a Sexma del Campo de Montagut. En 1286 se concede a Mosqueruela o dreito a celebrar ferias.

En 1333 s'adhibió oficialment a Mosqueruela lo Castiello del Mallo, dimpués d'un pleito con los de Villafranca. Estió lo primer lugar d'esta comunidat que consiguió la categoría de Villa, en 1366 como premio a la fidelidat a Pero IV d'Aragón.

Toponimia

Las primeras referencias documentals presentan lo nombre latinizato: Mosquerola en 1203, la fuente de la Mosquerola en 1204, Castelli de la Moschorola en 1208. A forma con diftongo tamién la trobamos en lo sieglo XIII.

Agustín Ubieto Arteta diz que la referencia más antiga de Mosqueruela ye de 1248. En 1270, Chaime I d'Aragón establió:

quod vos, habitatores de Mosqueruela predicti et vestris sucesores in perpetuum heredis hereditatis et posideatis dictos terminos et dicta carta contentos.

No ye la unica Mosquera en lo dominio nabarro-aragonés, porque tenemos microtoponimos como Mosquera en Tudela y Nobiellas, Mejana de Mosquera en Tudela, Mosqueruela en Tudela y Fontellas, Corrales del Mosquero en Exarc de Moncayo. En l'aria de lo Sarrablo y Tierra de Biescas las Guías Prames situan un microtoponimo pareixito y con a pronunciación teorica d'o diftongo dezaga d'a r: Mosquergüela.

En la Ribera Nabarra y Taust Mosquera significa lugar con arbols on sesteya o ganato, significato que se troba tamién en bells lugars de l'Alto Aragón. Rafael Andolz replega la palabra mosquetera con lo significato de puesto fresco, sombra de berano, sombra de bel árbol. En lo caso tudelán podemos pensar en una pervivencia de lo toponimo vascón prerromán Muscaria.

Las Sierras de Teruel son zona historicamén ganadera. En Mosqueruela bi ha paraches amán de fuents y ríos con selvetas d'arbols de fuella caduca (triemols, acirons, tilers) entre meyo d'a pineta y o carrascal predominants; podemos pensar que Mosqueruela significa lugar con sombra on los pastors feban descansar lo bestiar.

Bi ha microtoponimos con component catalán, como por eixemplo mases que prenen lo nombre por l'apellito de lo suyo propietario y con component aragonés. Entre los segundos son intresants Las Gerusías/Las Celosías ("Las Chelosías"), Pinar Plano, La Villeta, Barranco de Val Tuerta, Mas Sargantanas, y Val de r'agua, (un caso d'articlo ra importato de lo Pireneu).

Demografía

Evolución demografica

1992 1994 1996 1997 1998 1999 2000 2001 2002 - - 719 - - - 693 711 721

2003 2004 2005 2006 2007 2008 2009 2010 - 722 726 703 694 686 631 625 608 -

1990- : población de dreito. Fuent: Intercensal en l'INE, Series de población en l'INE y Relación d'unidatz poblacionals en l'INE.

Administración

Reparto de concellers

Eleccions municipals
Partito	1979	1983	1987	1991	1995	1999	2003	2007	2011
Partido Popular								3	4
Partido Aragonés								2	2
Izquierda Unida								2	1
Total								7	7

Alcaldes

Lista d'alcaldes

Lechislatura	Nombre	Partito politico
1979–1983
1983–1987
1987–1991
1991–1995
1995–1999
1999–2003
2003–2007
2007–2011	Ángel Fabregate Castillo	Partido Aragonés Regionalista

Molimentos

• Casa d'a Villa, d'o sieglo XVII.
• Ilesia parroquial de l'Asunción, d'o sieglo XVIII.
• Muralla con las suyas puertas.

Fiestas

• 29 d'abril, Sant Per Mártir.
• Zaguer domingo de mayo, Fiestas de la Estrella, bi ha una romería ta lo Santuario de la Estrella
• Feria ganadera lo primer domingo de septiembre, que existe dende que Martín I lis concedió lo privilechio de celebración de ferias.

Vinclos externos

• (es) Pachina web municipal.
• (es) Torismo Mayestrato.
• (es) Mosqueruela en www.CAIAragon.com.