Polje
Un polje ye una depresión gran situata en un macizo karstico.
A suya demominación ye presa de luengas eslavas on significa campo, ye muito recurrent en a toponimia (por eixemplo en o toponimo Polska), y tien a mesma radiz indoeuropea que l'aragonés plan, plana y l'anglés field. Polje se lei en serbocrovate /polie/. En aragonés d'as comunidatz aragonesas y castellán gosa coincidir, no siempre, con toponimos en nava, porque a vechetación y uso d'o suelo ye diferent.
Tien forma de val luenga, zarrata, con fondón plan, d'escala kilometrica y contornos irregulars.
As suyas marguins son empinatas y i aflora a roca calsinera. I gosa haber rigachuelos que lo trescruzan y pueden desapareixer de sopetón por un forato que fa de sumidero (ponor).
O polje puet estar embadinato temporalment, ser una zona paulenca u tener augua siempre, constituindo un laco, si l'augua superficial rebasa a capacidat de desaugüe d'o ponor.
O fondón, plan, puet estar cubierto de terra rossa, suelo con archila de descalcificación d'a roca calsinera. Gosan estar por ixo vals muito fértils, y muito diferents d'os terrenos calsinosos d'arredol sobre calsineras masivas.
[editar] Poljes en a Peninsula Iberica
En o Prepireneu bi ha presencia de Poljes en a Baixa Ribagorza, por eixemplo en Estanya.
En o Sistema Iberico bi ha sectors con poljes por tener amplas zonas calsinosas. En os Monts Universals bi n'ha en l'aria de Guadalaviar, Villar d'el Cobo, Fridas d'Albarrazín y naixedero d'o Tacho, (en un texto d'a Senyoría d'Albarrazín de 1278 se menciona una nava seca a man d'o Tacho). A l'este d'a fosa de Teruel bi n'ha en Torrillas, en Mosqueruela y en Fortanet. Un polje de Torrillas se diz La Nava.[1]
Un d'os poljes mayors d'a Península Iberica ye o plan de Zafarraya (Granada), en o interior d'o macizo de Sierra Gorda.
En a Serranía de Ronda destacan por lurs grans midas os llanos de Líbar, entre os municipios de Benaoján, Montejaque, Cortes de la Frontera y Villanueva del Rosario.
En Cabra bi ha un polje en un puesto dito La nava dentro de lo Parque Natural de las Sierras subbeticas
En Cantabria son o polje de Matienzo (Ruesga) y o polje que conforma a Val de Liendo en o termin municipal de Liendo, en as desembocaduras de l'Asón y l'Agüera.
[editar] Atros poljes
Talment o polje més extenso siga Livanjsko polje en Bosnia occidental, con 405 km².
[editar] Referencias
- ↑ Jose Luís Peña Monne et al. "Geomorfología de la Provincia de Teruel". Instituto de estudios turolenses, 1984.
|
|
||
|---|---|---|
| Endokarsticas | Canyo · Espluca · Estalactita · Estalagmita · Sima | |
| Exokarsticas | Dolina · Lenar · Polje · Toscar · Val karstica | |
| Fluvio-karsticas | Foz fluvio-karstica | |
