Metro
De Biquipedia
- Iste articlo ye sobre una unidat internazional de mida. Ta atros usos se beiga Metro (desambigazión).
O metro (d'o griego μέτρον metron, mida) ye una unidat de mida de longaria d'o Sistema Internazional d'Unidaz (en ye a unidat basica de mida de longaria). A suya definizión autual ye a longaria d'o recorrito en o bazío por a luz mientras un tiempo de 1/299 792 458 de segundo (arredol de 3,34 nanosegundos).
En 1791, mientras a Reboluzión Franzesa, l'Academia de Zenzias de Franzia establió o metro ta uniformizar as unidaz de mida franzesas, con muitas esferenzias entre as probinzias franzesas, en o marco d'a creyazión d'un sistema de midas más razional. Definioron a unidat como a diezmillonesima parte d'a distanzia que bi ha entre o Polo y a linia d'o ecuador terrestre. Espresato como se define a milla nautica, ye a longaria d'un meridián terrestre que forma un arco de 1/10 de segundo de grado zentesimal.
Dimpués se fazioron bellas probanzas, que remataron en 1889 cuan se depositó en a seu en París d'a Ofizina Internazional de Pesos y Midas un metro-patrón construyito en platín iridiato.
