Karst

De Biquipedia
Ir ta: navego, busca
Lenar, resultato de l'acción de l'augua de plebia en as calsineras disolvendo a suya superficie.

O Karst ye un tipo de modelato que se forma por disolución de rocas solubles, a vegatas tamién con precipitación, tanto en superficie como en o interior, fendo formas peculiars. O modelato karstico ye tipico d'as calsineras, dolomías y d'as evaporitas (chesos y atras).

O carbonato calcico ye insoluble en l'augua pura, pero soluble en l'augua acidificata. L'augua de plevia ye un poco acida por a presencia de dioxido de carbonio, y d'esta traza puet disolver o carbonato, tanto en superficie como quan circula por as crebazas y canyos dentro d'a masa rocosa. A seqüencia de reaccions embrecatas en a karstificación d'as calineras ye:

H2O + CO2 → H2CO3
CaCO3 → Ca2+ + CO32–
CO32– + H2CO3 → 2 HCO3
CaCO3 + H2CO3 → Ca2+ + 2 HCO3

Como resultato d'a disolución d'a superficie se formarán formas exokarsticas, y como resultato d'a circulación d'as auguas sotorranyas por canyos y crebazas se formarán as formas endokarsticas. Os chicotz canyos esdevendrán esplucas y simas.

A reacción de disolución ye reversible y en os puestos on se produga perduga de dioxido de carbonio por desgasificación u por l'acción d'organismos fotosinteticos o carbonato tornará a precipitar formando-se as calsineras travertinicas. A precipitación en puestos on goteya l'augua fará que se formen as estalactitas y estalagmitas.

O Karst en o noreste d'a Peninsula Iberica[editar | editar código]

Os fenomens karsticos son muito habituals en a Peninsula Iberica por a presencia de calsineras en os materials mesozoicos plegatos en o ciclo alpín. D'esta traza en Prepireneu, en as Cordeleras Costeras Catalanas, y en o Sistema Iberico o modelato karstico acompanya a las calsineras.

En os materials terciarios d'a Val de l'Ebro bi ha tamién fenomens karsticos por a presencia d'importants volumens de cheso en un clima semiarido. A karstificación d'os chesos relacionada con l'augua de l'Ebro y o Galligo y as suyas canalizacions pa os reganos como a Canal Imperial d'Aragón representa un risgo cheolochico por subsidencias y formacions de dolinas en a redolada de Zaragoza,[1] representando un karst aluvial.

Terminolochía[editar | editar código]

A denominación de Karst provién de Carso o nombre eslavo d'una meseta entre Italia, Eslovenia y Croacia, que incluye buena part d'a peninsula d'Istria. Ye un d'os primers puestos on fue descrito este modelato, d'astí que a denominación de muitas formas karsticas en o luengache scientifico tals como dolina, polje, ponor u uvala sigan d'orichen eslavo, u en concreto crovate. En os diferents países con zonas karstificatas bi ha atras denominacions tradicionals.

En aragonés as formas karsticas han recibito diferents denominacions que podemos trobar encara en a toponimia de l'Alto Aragón y que fa poco que s'han recullito en publicacions, por o que no bi ha encara garra prebatina de fixación. En l'aragonés d'as comunidatz aragonesas a denominación d'as formas karsticas yera probablement diferent. En a Sierra d'Albarrazín as dolinas encara reciben a denominación de celadas, y bi ha un lugar d'a Comunidat de Teruel que se diz asinas. As navas corresponden en muitos casos a "poljes" en o Sistema Iberico.

Referencias[editar | editar código]

  1. (es) Eumenio Ancochea Soto, Francisco Anguita Virella, Fernando Moreno Serrano: Geología Procesos externos. Editorial Edelvives, 1990. p 90-91

Bibliografía[editar | editar código]


 
Formas de terreno karstico
Endokarsticas Canyo · Espluca · Estalactita · Estalagmita · Sima
Exokarsticas Dolina · Lenar · Polje · Toscar · Val karstica
Fluvio-karsticas Foz fluvio-karstica