Azerís

De Biquipedia
Ir ta: navego, busca
Azerís
Azərbaycanlılar, Azərilər
آذربایجانلیلار ,آذری لر
Azerigirls.JPG
Mesachas azerís
Población total
35 millons-45 millons
Rechions con comunidatz importants
Flag of Iran.svg Irán 23.500.000 [1]
Flag of Azerbaijan.svg Azerbaichán 8.172.800 [2]
Flag of Turkey.svg Turquía 800.000
Flag of Russia.svg Rusia 622.000
Flag of Georgia.svg Cheorchia 284.761
Flag of Germany.svg Alemanya 120 000 - 140 000
Flag of Ukraine.svg Ucraína 45.200
Flag of the Netherlands.svg Países Baixos 17.000
Flag of the United States.svg Estatos Unitos 400.000
Flag of Canada.svg Canadá 275 000[3]
Flag of Austria.svg Austria 1.000
Flag of Estonia.svg Estonia 880
Flag of Australia.svg Australia 290
Flag of Denmark.svg Dinamarca 116
atras rechions 30.000
Idiomas
Azerí
Relichión
Principalment xiismo; minorías de sunnismo, cristianismo, bahaísmo, y zoroastrismo
Pueblos relacionatos
Pueblos turquicos, caucasicos y iranios

Os azerís habitan en a republica d'Azerbaichán, y en o norte d'Irán (Azerbaichán Iraní), habendo-ie minorías azerís en l'antiga provincia iraní de Corastén, en as ciudatz de Teherán, y Qom y en o sud de Daguestán, en l'este de Cheorchia y en Armenia. Parlan una luenga turquica d'a branca oguz y son musulmans xiitas en a suya mayoría con minorías sunnitas d'a escuela xafí en o norte.

A traza de vida tradicional ye l'agricultura, cría de vacumen, artesanía y comercio. Bi ha cautivos de regano de cotón. Tamién bi ha ganadería transuant con migración estacional dende as planas ta os monts. Os zaguers pastors purament nomadas estioron os airum, padar y shahseven y se sedentarizoron en o primer cuarto d'o sieglo XX.

Luenga[editar | editar código]

A luenga azerí s'escribe tradicionalment con alfabeto arabigo, que encara fan servir en l'Azerbaichán iraní. Dende 1929 as autoridatz sovieticas cambeoron l'alfabeto arabigo por l'alfabeto latín, pero lo cambeoron por l'alfabeto cirilico en 1939. Actualment bi ha una tendencia que aboga por tornar a l'alfabeto latín.

Historia[editar | editar código]

A etnochenesi d'os azerís ye principalment en a fusión d'os pueblos turquicos d'a branca oguz con os indichenas de luenga irania principalment en o sieglo XI. Manimenos o proceso de turquización d'Azerbaichán s'aceleró muito en o contexto d'as guerras entre os otomans contra os safavidas que fació que muitos turquicos nomadas de l'este d'Anatolia fuyesen ta Persia y s'establisen a man d'a Mar Caspia esdevenindo os turquicos mayoritarios debant de poblacions iranias como os talixes y tatz u d'atros orichen como os udis u os armenios.

O Imperio Ruso conquirió a parte norte d'Azerbaichán a Persia, feito que se consumó en 1828. O gobierno ruso favoreixió a plegata d'armenios dende Persia y o Imperio Otomán pa asegurar a suya posición a lo sud d'o Caucas. Os azerís encomenzoron a estar minoritarios en bellas comarcas y ciudatz debant d'os armenios recient plegatos. Bells azerís se facioron panturquistas y colabororon en a segunda fase d'o chenocidio armenio pero con menor importancia porque teneban menos meyos y porque a posición de l'Armenia Oriental yera més solida que la de l'Armenia Occidental en poder turco. En 1918 l'Azerbaichán ruso proclamó a suya independencia, pero en 1920 fue conquiesto por o exercito royo y encomenzó a suya sovietización esdevenindo a Republica Socialista Sovietica d'Azerbaichán, dende on o exercito royo conquirió y esclafó l'Armenia independient d'entreguerras. Stalin adchudicó a rechión etnicament armenia de l'Alto Karabakh u Nagorno Karabakh a Azerbaichán, y dica se pensó adhibir tota l'Armenia sovietica en l'Azerbaichán sovietico.

Mapa d'ubicación d'os azerís.

En a Segunda Guerra Mundial os aliatos invadioron Irán pa evitar que s'aliniase con l'eixe, y o exercito royo ocupó l'Azerbaichán iraní promovendo un movimiento autonomista. Dimpués d'a retirata en 1945 se creyó una autonomía que no duró que una anyata.

En a segunda metat d'o sieglo XX se formó una clase intelectual azerí con educación rusa u europea pero d'inspiración nacionalista. As siet decadas de dominio sovietico creyoron un profundo cambeyo social en Azerbaichán, con nuevas ciudatz, nuevas industrias, nuevas institucions. En 1988 encomenzó o conflicto entre armenios y azerís por a qüestión de l'Alto Karabakh. As mesmas autoridatz d'a Republica Socialista Sovietica d'Azerbaichán demandoron a los azerís de matar armenios, se facioron pogroms en tot o territorio. En conseqüencia a población azerí d'Armenia fue perseguita por os nacionalistas armenios incontrolatos que tamién facioron mortaleras pero de muita menor mida. O exercito sovietico intervinió quan encomenzo a haber-ie amenazas xenofobas contra a población rusa d'Azerbaichán. A población armenia d'Azerbaichán emigró t'Armenia y atros países y se concentró en l'Alto Karabakh y 200.000 azerís d'Armenia fuyoron t'Azerbaichán.

En 1992 Azerbaichán se separó d'a comunidat d'Estatos independients (CEI). O conflicto contra os armenios continó, Azerbaichán continó con a campanya de deportacions y mortaleras d'armenios en as zonas a man d'Armenia a lo norte de l'Alto Karabakh, que no controlaba de tot. Finalment a población armenia de l'Alto Karabakh prenió o poder d'a suya rechión, forachitoron a las poblacions azerís, y amés ocuporon una zona de seguridat fuera de l'Alto Karabakh fendo un corredor con Armenia, ocupando dica 10 % d'o territorio d'Azerbaichán.

Bibliografía[editar | editar código]

  • Amiram Gonen, Diccionario de los Pueblos del Mundo. Anaya&Mario Muchnik 1996.

Referencias[editar | editar código]