Vall de Lierp

De Biquipedia
Ir a la navegación Ir a la búsqueda
Start hand.svg Esta pachina ye escrita en aragonés ribagorzano.
Vall de Lierp
Municipio d'Aragón
133.Valle de Lierp.jpg
Paisache de la vall de Lierp dende Sarrat.
Entidat
 • País
 • Provincia
 • Comarca
Municipio
Flag of Aragon.svg Aragón
Flag of Huesca (province).svg Uesca
Ribagorza
Superficie 32,41 km²
Población
 • Total

48 hab. (2018)
Altaria 1.012 m.
Distancia
 • 122 km

enta Uesca
Codigo postal 22451
Coordenatas 42°22’48’’N 0°29’20’’E
Vall de Lierp en Aragón
Vall de Lierp
Vall de Lierp
Situación de Vall de Lierp en Aragón
http://www.vallelierp.es/

Vall de Lierp (oficialment Valle de Lierp en castellano, La Vall de Lierp en catalán[1]) é un municipio aragonés de la provincia de Uesca, a la comarca de la Ribagorza. Los suyos habitants en dicen simplement la Vall.[2]

La suya población é de 48 habitants (2018)[3] a una superficie de 32,41 km² y una densidat de población d'1,51 hab/km². Llingüisticament, el municipio se troba en pllena zona de transición entre l'aragonés y el catalán ribagorzanos.

Cheografía[editar | editar código]

Vall de Lierp é el municipio, que prene nome de la vall natural a on é situau; una vall menor que desepara las falderas meridionals de la montanya d'el Turbón y la serra d'el Chordal. El municipio é feito de llugars chiquinins (aldeyas) y mases, sin garra llugar granizo, con lo que é un habitat disperso. La Casa de la Vila é en Eixea, manimenos, que por mida y por proximidat enta la carretera fa una miqueta ixa función.

Eixea, seu d'el concello, é a 1.012 metros d'altaria sobre el nibel de la mar,[4] a una distancia de 122 km de la ciudat de Uesca, la capital de la suya provincia.[4]

El municipio limita pe'l norte y nor-este con Torlarribera, pe'l canto de las Vilas. La vall de la Ribera é una vall chirmana con la vall de Lierp, tanto en orientación (baixan dende el Turbón cara ta l'Isabana) como llingüisticament, pos las dos presentan una gradación entre l'aragonés y el catalán en las suyas variedatz ribagorzanas.

Per l'este, tot seguind el curso d'el barranco cara ta el río Isabana, llimita con el municipio de Beranui, con llugars como Calvera, Vallabriga y el monesterio d'Obarra. Pe'l sud, el termino municipal llimita con la serra d'el Chordal y con la parte oriental d'el municipio de la Foradada d'el Toscar per la vall d'el barranco de Vacamorta,[1] que é de l'atro costau de la serra. Por l'ueste, el municipio fa la muga con vall de Bardaixí, vall y municipio homonimos que rematan en l'Esera cerqueta de Campo.

La vall de Lierp é una vall de dos concas hidrograficas. Las aiguas de llevant se'n van llibrement cara ta l'Isabana y els llugars que n'i ha en ixe canto (Piniello y Reperós) son despoblaus en l'actualidat, que a més a més son més cerca de la cabecera municipal de Torlarribera que d'Eixea. Por el canto occidental, a la inversa, las aiguas marchan ta l'Esera a traviés d'el congustro d'Eixea u «forau d'Eixea», pasand ta la vall de Bardaixí como afluents d'el barranco d'Esplluga. Son las aldeyas de la parte occidental Padarnín, l'Obago, Pueyo y Sarrat, a més d'Eixea, que fa de cabecera municipal. Manimenos, la divisoria d'aiguas é suave y no suposa una muga real entre els diferents nuclios d'el municipio.

Los llugars[editar | editar código]

Casas en Eixea.

Vall de Lierp é un habitat disperso de diferents llugars u aldeyas, de molt poquetas casas cada un. En tenim con varias, de casas, como Eixea, que fa las veces de capital municipal per estar el más gran y tamé el que ye más cerca de la carretera que va de Beranui ta Campo. Atros no son mes que casas dispersas en barrios, como Sarrat u como l'Obago, a la baixant d'el Chordal, y Padarnín y Piniello a la d'el mont Turbón. Pueyo é una aldeyeta de dos casas a'l costau de Sarrat, a la falda solana d'el Turbón. Y Reperós é mes leixos de totz los atros, despobllau, ya a'l cabo baixo de la vall, mes cerca de Beranui y a'l cantet de Torlarribera.

La llengua[editar | editar código]

La vall de Lierp, y por ixo mesmo el municipio homonimo que aplega las distintas entidatz de población que se i troba, é una vall natural y chiquirrina que s'ubre enta l'Isabana, a la conca d'el qual el parlar é caracterizau como catalán de transición enta aragonés. Manimenos, la realidat llingüistica de la vall de Lierp arresulta encara mes complexa que la de la vall a la qual afluyen las suyas aiguas,[5] con que é un de los curiosos casos (como tamé pasa con la suya vecina vall de la Ribera) anon la transición entre los dos idiomas se fa gradualment entre los nuclios d'un mesmo municipio.[5]

La vall de Lierp tene, per la suya cabecera, contacto inmediato con la ya aragonesoparlant vall de Bardaixí y la terra de Campo (aon se parla inequivocament aragonés ribagorzano[5]), lo qual dota a la parla local d'una naturaleza transicional mes marcada que a la vall de l'Isabana, arriband ta'l punto que se puede considerar aragonés de transición ta catalán el parlar de las aldeyas situadas mes cerca d'el cabo alto de la vall, proxima con el limite con Bardaixí, y catalán de transición enta aragonés lo charrau a los nuclios mes baixos, cercans con Beranui y l'Isabana,[5] que son despoblaus en l'actualidat. Tot ixo, mesmo sin que calga sallir d'el termino municipal. Esto é tot lo mesmo que pasa a la vecina vall de la Ribera (Torlarribera, Visalibons, las Vilas, etc.).

Caracteristicas[editar | editar código]

El Turbón visto dende Eixea. Esta montanya tan sinyalera é vistable dende tot el municipio.
  • Demostrativos aragoneses: este, ixe, aquel.
  • Posesivos aragoneses: el suyo, la mía, los suyos... y no pas los catalans el seu, la meva/meua, els/los seus.
  • Plurals femenins que rematan en -as: la vaca → las vacas.
  • Presenta el fonema fricativo dental xordo (θ) pa totas las Z y las C debant de e y de i: cebolla /θe'boʎa/, cenizo /θe'niθo/, tocín /to'θin/, zarpa /'θarpa/, zurrupar /θuru'pa/; como é regular en aragonés y en castellano, y no se sonoriza ta /s/ como é normal en catalán (con excepcions contadas) y en benasqués.
  • Pronuncian las -T que se troba a final de parola: Sarrat /sa'rat/, tot /'tot/, y especialment a la fin de los dimunitivos masculins: chiquet /tʃi'ket/, corderet /corde'ɾet/, etc. como pasa de regular en aragonés ribagorzano pero no en atros dialectos aragoneses. Manimenos, la -T a la fin de substantivos femenins que en llievan no la guardan, como é normal tamé en ribagorzano y en tot l'aragonés: ciudat /θiw'da/, salut /sa'lu/, comunidat /komuni'da/, velocidat /beloθi'da/, etc. Los pllurals son con fonema fricativo dental xordo (θ): corderetz /korde'ɾeθ/, y se vei tamé en toponimia basada en nomes pllurals como las Cortz[6] /laskorθ/, els Sarratz[6] /elsa'raθ/, etc. que n'i ha en el termino.

Rechistro[editar | editar código]

Entre que se feba el prochecto de l'Archivo Audiovisual de l'Aragonés, que se va fer dende l'anyo 2001 y enta debant, con la finalidat de documentar d'una traza grafica los parlars vivos de los diferents llugars aragonesofonos de l'Alto Aragón, se va grabar en video colacions y explicacions sobre la vida tradicional per parte de parladors patrimonials de la parla local d'Eixea y de Padarnín, que son aldeyas de Vall de Lierp. Las ditas grabacions son disponibles a la plataforma YouTube.[7]

Puestos d'interés[editar | editar código]

  • En Sarrat i ha un museu etnolochico de titularidat municipal, que exposa bells 170 obchectos en una superficie de 100 metros quadraus,[8] adentro de lo que enantes eba l'abadía d'el llugar. Los obchectos exposaus dimanan totz de las casas d'el municipio.[8]

Demografía[editar | editar código]

Evolución demografica
1362 f 1495 f 1842 1857 1860 1877 1887 1897 1900
- - 327 277 300 312 284 224 212

1910 1920 1930 1940 1950 1960 1970 1981 1991
231 263 203 208 197 173 99 73 61

1992 1994 1996 1997 1998 1999 2000 2001 2002
- - - - - - 59 55 54

2003 2004 2005 2006 2007 2008 2009 2010 2011
51 49 49 47 47 44 52 65 66

2012 2013 2014 2015 2016 2017 2018 2019 -
64 59 58 54 52 48 46 - -

 1717-1981: población de feito; 1990- : población de dreito.
Fuent: Intercensal en l'INE, Series de población en l'INE y Relación d'unidatz poblacionals en l'INE.

Administración[editar | editar código]

Reparto de concellers[editar | editar código]

Eleccions municipals[9]
Partito 1979 1983 1987 1991 1995 1999 2003 2007 2011 2015 2019
Partido de los Socialistas de Aragón - 5 1 1 1 1 1 1 2 2 2
Partido Aragonés - - - 0 0 - 0 0 1 1 1
Unión de Centro Democrático 5 - - - - - - - - - -
Total 5 5 1 1 1 1 1 1 3 3 3

Alcaldes[editar | editar código]

Lista d'alcaldes
Lechislatura Nombre Partito politico
19791983
19831987
19871991
19911995
19951999
19992003
20032007
20072011
20112015 José María Ariño Castel Partido de los Socialistas de Aragón

Festas[editar | editar código]

Totz els llugars de la Vall fan las festas de conchunta. Este é el calendario festivo de Vall de Lierp:[10]

Referencias[editar | editar código]

  1. 1,0 1,1 (ca) La Vall de Lierp en a Gran Enciclopèdia Catalana; consultada o 27 d'abril de 2019
  2. (an) Video Noms dels llugás de l'Archivo Audiovisual de l'Aragonés, feit a Padarnín por l'Asociación Cultural Parola.
  3. (es) Valle de Lierp en o Nomenclátor de Unidades Poblacionales de l'INE. Consultau o 27 d'abril de 2019.
  4. 4,0 4,1 (es) Valle de Lierp en a web d'a Diputación Provincial de Uesca, consultada o 27 d'abril de 2019.
  5. 5,0 5,1 5,2 5,3 (es) Isábena, valle del río en Gran Enciclopedia Aragonesa. Consultada el 27 d'abril de 2019.
  6. 6,0 6,1 (es) Información de Fauna y Flora en la web de l'Ayuntamiento; consultada el 27 d'abril de 2019.
  7. Canal YouTube de la Asociación Cultural Parola, responsable del Archivo Audiovisual de l'Aragonés.
  8. 8,0 8,1 (es) Noticia El Museo Etnológico de Valle de Lierp (Huesca) rescata la forma de vida del medio rural, consultada el 27 d'abril de 2019.
  9. Archivo electoral
  10. (es) Fiestas y Tradiciones, de la web de l'Ayuntamiento de Vall de Lierp, consultada el 28 d'abril de 2019.

Se veiga tamién[editar | editar código]

Vinclos externos[editar | editar código]


Lugars d'el municipio de la Vall de Lierp
Eixea | Padarnín | Piniello | Pueyo | Reperós | l'Obago | Sarrat


 
Municipios d'a comarca de Ribagorza
Arén de Noguera | Benavarri | Benás | Beranui | Bisagorri | Bonansa | Campo | Capella | Castigaleu | Castilló de Sos | Chía | Estupinyán | La Foradada d'el Toscar | Graus | Isabana | Llascuarre | Monesma y Caixigar | Montanui | Las Pauls | Perarruga | La Puebla de Castro | Puent de Montanyana | Santa Llestra y Sant Quílez | Saúnc | Secastiella | Seira | Sesué | Sopeira | Tolva | Torlarribera | Val de Bardaixí | Vall de Lierp | Viacamp i Lliterà | Vilanova