Padarnín

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Padarnín Paderniu Padarníu
Lugar d'Aragón
Entidat  • País  • Provincia  • Comarca  • Municipio	Lugar  Aragón  Uesca Ribagorza Vall de Lierp
Partiu chudicial	Boltanya
Población  • Total	9 hab. (2020)
Altaria  • Meyana	1.050 m.
Distancia  • 1,1 km	enta Eixea
Codigo postal	22451
Parroquial  • Diocesi  • Arcipestrau	Balbastro-Monzón Sobrarbe-Ribagorza
Coordenadas	42°23’27’’N 0°29’ 0’’E
Padarnín Padarnín en Aragón

Esta pachina ye escrita en ribagorzano.

Padarnín (en catalán Paderniu, oficialment en castellano, Padarníu) é un llugar d'el municipio de Vall de Lierp, a la comarca de Ribagorza y la provincia de Uesca. En 2018 la suya población eba de 3 habitants.

Forman el llugar diferents casas diseminadas per la costera solana d'el Turbón, arredol d'els 1050 metros sobre el nibel de la mar, a la conca alta d'el barranco que se diu per ixo mesmo de Padarnín. É comunicau con Sarrat y con Eixeya per una pista asfaltada de poco mes d'un kilometro.

Toponimia

Padarnín é con tota probabilidat un toponimo que viene d'el llatín y, en contra d'el que bel autor local diu, no tene cosa de basco. Provendría d'el nome de persona PATERNIU u PATERNUS, a'l cual s'habría anyadiu la terminación chenitiva -INU que indica pertenencia, tot formand-se alavez <*PATERNINUS, «ho que é propiedat de Paternius». Padarnín é un nome de llugar que trobam documentau dende el llatín d'el sieglo VI, por la cual cosa é tota una excepción en l'Alto Aragón y mos permite trazar la suya evolución ben fácil.

Padarnín eba Paternini en 1097-1104, Padarnin en 1609 y 1613. Mantene la -n final d'alcuerdo con la fonetica aragonesa, a diferencia de bels casos en la zona que siguen la tendencia catalana de perder-la.

Casas

Las casas de Padarnín son: casa Fumenal, casa Pedro Solana, casa Sastre, casa Solaneta y casa Villega.

Llengua

Como tot el municipio de vall de Lierp, Padarnín é en zona de transición llingüistica entre l'aragonés y el catalán, en las suyas variants ribagorzanas. Padarnín é a la parte occidental de la vall, aon las aiguas marchan cara ta l'Esera, como tamén Pueyo, Eixea, Sarrat y l'Obago. La parla d'esta parte de la vall se considera aragonés ribagorzano de transición ta catalán, mentres que la parte oriental (Piniello y Reperós) s'ha cllasificau como catalán ribagorzano de transición ta aragonés.

La dita transición é tan progresiva que de regular las parlas de tota la Ribagorza, tanto las que pertencen a la un como a l'atro idioma, son comprensibles entre si y tenen elementos comuns que son propios d'esta comarca.

Rechistro

Entre que se feba el prochecto de l'Archivo Audiovisual de l'Aragonés, que se va fer dende l'anyo 2001 y enta debant, con la finalidat de documentar d'una traza grafica los parlars vivos de los diferents llugars aragonesofonos de l'Alto Aragón, se va grabar en video conversacions y expllicacions sobre la vida tradicional per parte de parladors patrimonials de la parla local de Padarnín y d'Eixea, que son aldeyas de Vall de Lierp. Las ditas grabacions son disponibles a la plataforma YouTube.

Demografía

Evolución demografica

1992 1994 1996 1997 1998 1999 2000 2001 2002 - - - - - - 8 8 8

2003 2004 2005 2006 2007 2008 2009 2010 2011 8 8 8 8 8 8 8 11 6

2012 2013 2014 2015 2016 2017 2018 2019 2020 5 5 5 4 4 4 3 - -

2021 2022 2023 2024 2025 2026 2027 2028 - - - - - - - - - -

1990- : población de dreito. Fuent: Intercensal en l'INE, Series de población en l'INE y Relación d'unidaz poblacionals en l'INE.

Monumentos

• Casa Fumenal, d'els siglos XVII-XVIII. É restaurada y chestionada per una parella de biologos, como negocio de turismo rural y grancha-escuela, aon ofrecen actividaz relacionadas con a naturaleza.
• Ermita de Sant Pedro, d'el siglo XVIII, t'aon se fa romería dende tot el municipio a'l día d'el santo (29 de chunio).

Festas

Con toz els llugars de la Vall, fan las festas de conchunta. Este é el calendario festivo de vall de Lierp:

• La festa menor é pa Santa Agueda, el 5 de febrero.
• 13 de chunio, romería enta la ermita de Sant Antón.
• 29 de chunio, romería enta la ermita de Sant Pedro en Padarnín.
• 2 de chuliol, romería enta la ermita de la Virchen d'el Pueyo, entre Eixea y l'Obago.
• La festa mayor tradicionalment eba el 4 y 5 de setiembre. Actualment les festas con Semana Cultural se fan la semana antes de la zaguera d'agosto.

Enlaces externos

• Se veigan as imáchens de Commons sobre Padarnín.
• (an) Noms dels llugás, Receta del membrillo y Romería de San Pedro, videos de l'Archivo Audiovisual de l'Aragonés sobre la parla autoctona en Padarnín (Valle de Lierp).

• Datos: Q13049763
• Multimedia: Padarníu / Q13049763