Aceral

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Un aceral u acironal ye una selva dominada por os acirons, antigament ditos "acers", nombres comuns d'as especies d'o chenero Acer.

Acerals de A.granatense

Acerals d' Acer granatense, en trobamos en as zonas alteras mes orientals d'a Sierra de Gúdar y as suyas estribacions enta lo Mayestrato, paraches on que la continentalidat ye menos acusada. Son en altarias entre os 1200 y 1600 m, a on i resisten millor a sequedat ambiental, a l'igual que os tilers u os urmos de montanya, rechenerando-se bien en os pacos d'as pinars de montanya de pin royo, menos a on que bi ha pin nasarro, y comparte puesto con o caixico Quercus faginea, como esdevién en a Tosquilla. Tamién bi ha acerals d'Acer granatense en os Puertos de Beceit, una d'as mugas septentrionals d'esta especie.

Arbolez comuns en os acerals son Sorbus aria, Corylus avellana, y a vegadas Ilex aquifolium y Taxus baccata.

A orla arbustiva ye d'especies desichents como a tintilaina (Viburnum lantana), l'arto (Crataegus monogyna), a senera (Amellanchier ovalis), Lonicera xylosteum, Ribes alpinum, o chinebro (Juniperus communis), a galabardera (Rosa canina), Rubus ulmifolius, Prunus spinosa, Rhamnus saxatilis, ecetra...

As masas d'Acer granatense ocupan por un regular suelos profundos y humidos que l'hombre ye desforestaus ta creyar praus. O millor aceral d'a Sierra Gúdar (lo un d'o barranco de las Torres entre Nogueruelas y Linars de Mora) ye en un suelo profundo y humido.

Selvetas mes redueitas pero con árbols de grant mida de dica 50 cm de diametro son os d'o Molín de las Truitas en Mosqueruela y lo un d'o Barranco de los Arenazos en Linars de Mora.

Acerals de A.monspessulanum

Acer monspessulanum per un regular se presenta como un arbolet y ye una especie mes xerofila que resiste millor a sequera y os extremos termicos que Acer granatense. Ye mes tipico d'o nord-este que d'o sudeste d'a Peninsula Iberica. Forma selvetas en Chabalambre y sectors de Gúdar a on que no bi ha A. granatense, y en enclaus intermeyos como lo barranco del hocino, siempre d'entre os 1000 y 1450 m. No gosa ser present chunto con A. granatense en Teruel y només sen troba chuntos en os arredols d'o cuello a on naixen o barranco de las Torres y l'arroyo de la Pasqueta, (termins de Nogueruelas y Linars de Mora). En Sestrica el trobamos en chunto con fraixins d'una selva de ribera sobre substrato silicio.

Por un regular A. monspessulanum se troba en os dominios d'a carrasca u/y la sabina, y a vegadas con Pin royo (en o barranco del Val de La Puebla de Valverde, en Chabalambre, a on que bi ha un aceral muit bien conservau). Un altro aceral d'intrés tamién ye en La Puebla de Valverde, ye lo un d'o barranco de La Cederilla (toponimo prou explicativo), a on l'aceral ye conservau de tot en o suyo barranco segundario. En o Mas del Manzano y Mas del Peral de La Puebla de Valverde en a part alta d'o Barranco de la Vallomba, aciron grans. En la Puebla de Valverde bi ha un altro aceral de consideración, o d'o barranco del Focino en chunto con un caixicar a on que bi ha a sola cita de Sorbus torminalis d'o sudeste d'a provincia de Teruel.

O matigal que acompanya a A. monspessulanum ye composau per Juniperus communis, Juniperus phoenicea, Juniperus sabina, Lonicera xylosteum u rosacias como Crataegus monogyna, Prunus spinosa, Prunus mahaleb, Rosa sp., Amellanchier ovalis, Cornus sanguinea, etc...

Cuan se degrada l'aceral y i amaneixen orlas arbustivas se fan os allacars de Genista scorpius y Genista hispanica, y si se contina degradando se i fa un matigal baixo de plantas labiadas con Satureja montana, Lavandula latifolia, Thymus vulgaris (tremonciello), ecetra...

D'entre as herbacias mes representativas i trobamos Saponaria ocymoides, Stachys heraclea, Primula veris, Geum sylvaticum, etc. Ye común o lastonar de Brachypodium phoenicoides en as zonas secas y Brachypodium sylvaticum en os paraches frescos, asinas como Briza media y Dactylis glomerata. Entre as orquidias podemos trobar Ophrys sphegodes, Ophrys lutea, Orchis purpurea, Cephalantera rubra, Cephalantera damasonium, Epipactis parvifolia, Epipactis microphyla, Epipactis helleborine, Listera ovata, etc...

Toponimos relacionaus con os acerals

Os acerals no ocuporon nunca grans extensions como os carrascals y caixicars, y a sobén os acers fan parte de selvas mixtas submediterranias. Toponimos aragoneses que con duda podemos relacionar con os acerals son: "Aceret", "Barranco de l'acederilla" (en La Puebla de Valverde), "Cedriellas" y "Arcedo", que no ye tan seguro porque tamién se parix a "arto", "Artieda" y porque arce ye castellano y en aragonés d'a zona yera acer(e). O Barranco de los Arenazos, on bi ha acirons, puet estar una deformación d'"aceral" ("aceral" > *acerán > arenaz, arenazos). En Ávila tenemos o macrotoponimo Villanueva del Aceral.

Bibliografía

(es) José Manuel González Cano et al.: Inventario abierto de los bosques singulares del sector S.E de la provincia de Teruel. Diputación General de Aragón.

Datos: Q13048314