Rubus ulmifolius

*Rubus ulmifolius*
Rubus ulmifolius
Denominacions populars
morera, chordonera negra, masurera
Clasificación cientifica
Dominio:	Eukaryota
Reino:	Plantae
División:	Magnoliophyta
Clase:	Magnoliopsida
Orden:	Rosales
Familia:	Rosaceae
Subfamilia:	Rosoideae
Chenero:	Rubus
Subchenero:	Eubatus
Descripción
Rubus ulmifolius Schott.,

A morera^[1] u chordonera negra^[1] (nombre cientifico Rubus ulmifolius (Schott.)), tamién dita masurera^[1], ye un arbusto no lenyoso d'a familia Rosaceae, caracterizau por o suyo creiximiento sarmentoso, con brancas largas y poco ramificadas, de sección pentagonal cuan son chóvens, punchudas en tot lo suyo desarrollo, que pueden gosar creixer dica os 3 metros de lonchitut. Chenericament se puet decir tamién barza^[1]^[2] u xarga^[1]^[2], nombres que gosan fer referencia a cualsiquier especie d'o chenero Rubus.

Descripción

Tiene as follas imparipinnadas, composadas de tres u cinco foliolos peciolaus, con forma eliptica cadagún, con as laderas aserradas u dentadas. A color d'as follas ye verda intensa por alto, y blanca pilosa por debaixo.

As flors suyas son blancas u rosadas, de cinco sépals y cinco petalos, mesurando bels diez u quince milimetros de diametro. Amaneixen en carracez, que dimpués se tornan inflorescencias de forma oblonga u piramidal. Os sépals son siempre grisos u blanquinyosos. A color d'os petalos pende de l'eixemplar, y suele variar dende blanca dica rosa.

A fruita que fan ye comestible, y recibe a denominación de «mora» u «muera». Manimenos, por contra de tractar-se d'una sola fruita individual, a mora ye una agrupación de drupas chicorronas naixidas en carrazo, que se tornan a lo primer royas y dimpués negras cuan maduran.

Distribución

A morera ye una planta prou mas invasiva que no belaltras especies d'a familia Rosaceae, en creixendo rapeda, a demés d'estar capable ta escapar cuan se multiplica vechetativament, en brostando-le venas dende as branquetas mas baixas que puedan tocar tierra, por a on que i puede formar percullos nuevos. Gosa colonizar grans extensions de selva, monts baixos y baixants de montanya, en estar que forma matullars en periodos prou curtos de tiempo. Ye una planta frecuent en as marguins d'os camins y en as espuendas d'entre fincas de cultura.

A sola dexichencia que se'n conoix ye con o nitrocheno, elemento que le cal que siga abundant en o terreno a on creix, por el que ye una especie mas colonizadera en os entornos humanizaus que no en arias vírchens.

A suya aria de distribución yera a cuenca mediterrania y Eurasia, en estando nativa en Europa, norte d'Africa y Asia. En l'actualidat, se'n puede trobar formacions en America y Oceanía porque se i introdució por o intrés gastronomico d'as moras que produce.

En hibierno, en latituz temperadas y subtropicals en as que se i rechistre temperaturas baixo cero con frecuencia, as follas gosan perder a coloración verde tan vitarisca que manifiestan en os periodos vechetativos y pueden tornar-se mas royiscas. Isto ye un efecto d'a retracción d'a sapia, que se'n retira ta privar os efectos nocivos d'as cheladas, y no i queda si que os pigmentos mas minoritarios.