Tarazona

Tarazona
Municipio d'Aragón
Tarazona
Entidat  • País  • Provincia  • Comarca	Municipio Aragón  Zaragoza Tarazona y lo Moncayo
Superficie	244 km²
Población  • Total	10,991 hab. (2007)
Altaria	480 m.
Distancia  • 86 km	enta Zaragoza
Codigo postal	50500
Ríos	Queiles
Coordenatas	41°54’ 0’’N 1°43’58’’U
Tarazona Situación de Tarazona en Aragón
http://www.tarazona.org

Tarazona, capital d'a comarca de Tarazona y lo Moncayo, se troba en a val meya d'o río Queiles, a una distancia de 86 km de Zaragoza. Crucillada de camins entre las comunidatz autonomas de Castiella y Leyón, A Riocha y Navarra, tien una población de 11.000 habitants.

Ye capital d'una d'as comarcas aragonesas con una presonalidat mas definita, tierra mugant con os antigos Reinos de Navarra y Castiella. A comarca natural presidita por a mole d'o Moncayo y o rico pasato que esplanican os suyos molimentos proporcionan a la ciudat un singular embeleco.

Municipio román, chunto con a población nativa hispanorromana primero pagana y dimpués catolica en a ciudat s'asentoron visigodos, chodigos, musulmans, ecetra, esdevenindo Tarazona un d'os puestos mas importants d'Aragón. Estió a seu d'as Cortz de Tarazona, en 1592.

Luengas y parlas

A luenga actual de Tarazona ye o castellán d'Aragón, que por o suyo substrato lingüistico mantién muitos aragonesismos, sobre tot en o lexico, como reflexo de l'aragonés que se i charraba dica por o menos o sieglo XVI. O lexico aragonés documentato y conservato de Tarazona presenta diferencias con respecto a lo que s'ha conservato en a part central y oriental d'a Val de l'Ebro, encara que puet influir que os estudios lexicos son d'un periodo prou anterior, quan se feban servir estas parolas.

L'aragonés se feba servir en Tarazona y a suya redolata en a baixa Edat Meya como luenga oficial chunto con o latín, y en tenemos muestras en textos notarials, y tamién lo feba servir o bispato de Tarazona, como veyemos en o "Libro Chantre". Tamién charraban y escribiban en aragonés os chodigos y os moriscos, estos zaguers en alfabeto arabe (textos alchamiaus). Manimenos no se puet identificar dreitament a luenga d'estos textos con a fabla aragonesa de Tarazona. A scripta aragonesa yera un standard uniforme en tota a Val de l'Ebro y Alto Aragón, y en conseqüencia tamién en Tarazona. Por a toponimia meyeval y actual y por o lexico conservato se puet saber que l'aragonés d'a zona moncaína no yera como l'aragonés d'o sureste que se charraba en a Comunidat de Calatayú, y yera como l'aragonés d'a Val de l'Ebro que se charraba en as Cinco Villas, Ribera Alta y Ribera Navarra, mantenendo os caracters chenerals d'a fonetica aragonesa, como a evolución en -ll- d'os grupos -C'L- y -LY- (PANICULA > panolla, toponimo "Torrellas" que deriva de TURRICULA), caracters que irán converchendo con o castellán dende o sieglo XV (regacho en cuenta de "regallo", microtoponimo El Forcacho).

En l'actualidat en Tarazona bi ha un chicot nuclio de neoparlants de l'aragonés, que se remonta a chent que dende a decada de 1980 lo ha apreso en cursos feitos en Zaragoza, Tarazona u en plan autodidacta. En zaguerías d'ixa decada bi heba una colla local d'o Ligallo de Fablans de l'Aragonés en Tarazona que ya no existe. Actualment beluns d'os neoaragonesoparlants de Tarazona perteneixen a l'asociación Nogará.

Toponimia menor

Bi ha bells microtoponimos en idioma aragonés: Plana Melero, Bardalero, Casa de la Noguera, Ordigal, La Tolla y La Figuera. Toponimos como El Forcacho se remontan a la etapa de desaparición de l'aragonés, quan as parolas con -ll- se castellanizaban foneticament y no existiba l'actual j velar en castellán.

Historia

En a primera metat d'o sieglo V bi heba una guarnición defensiva visigoda a lo servicio d'os romans que fue destruita por os bagaudas en l'anyo 449.

Tarazona ya teneba cierta importancia en tiempos d'o Reino Visigodo de Toledo. A ceca de Tirasona estió en funcionamiento con os reis Recaredo I, Gundemaro, Sisebuto y Suintila (586-631).

Tarazona fue reconquiesta por Alifonso I lo Batallero. En 1301 se concede a Tarazona o dreito a celebrar ferias.

Administración

Reparto de concellers

Eleccions municipals
Partito	1979	1983	1987	1991	1995	1999	2003	2007	2011
Partido Popular	-	8	3	4	6	8	8	8	10
Partido de los Socialistas de Aragón	6	6	5	6	5	5	7	6	4
Izquierda Unida	-	-	2	3	3	-	-	1	2
Chunta Aragonesista	-	-	-	1	1	1	1	1	1
Partido Aragonés	-	3	5	2	2	1	0	1	0
Unión de Centro Democrático	8	-	-	-	-	-	-	-	-
Centro Democrático y Social	-	-	1	1	-	-	-	-	-
Partido Demócrata Popular	-	-	1	-	-	-	-	-	-
Independients	0	-	-	-	-	2	1	-	-
Total		17	17	17	17	17	17	17	17

Alcaldes

Lista d'alcaldes

Lechislatura	Nombre	Partito politico
1979–1983	José Luis Moreno	Unión de Centro Democrático
1983–1987	José Luis Moreno
1987–1991	José Luis Moreno
1991–1995	Jesús Orte	Partido de los Socialistas de Aragón
1995–1999	Jesus Javier Calavia	Partido Popular
1999–2003	Jesus Javier Calavia	Partido Popular
2003–2007	Ana Cristina Vera Láinez	Partido de los Socialistas de Aragón
2007–2011	Luis María Beamonte Mesa	Partido Popular
2011–2015	Luis María Beamonte Mesa	Partido Popular

Molimentos

• Ilesia d'a Virchen d'o Río, un edificio d'estilo barroco.

Esportes

• O fútbol ye representato por a Sociedad Deportiva Tarazona.

Presonalidatz naixitas de Tarazona

• Categoría:Naixitos de Tarazona

Vinclos externos

• Se veigan as imáchens de Commons sobre Tarazona.
• Turiaso.com.