Ostsiedlung

De Biquipedia
Ir ta: navego, busca
Expansión d'a luenga alemana dende 700 dica 1950

Ostsiedlung ye como se diz en alemán a colonización d'Europa Centro-Oriental en a Edat Meya con población alemana.

A colonización alemana en Europa Central y Oriental estió un movimiento migratorio con colonización agricola de territorios a l'este d'o río Elba que enantes yeran ocupatos por eslavos. Tenió como conseqüencias una penetración cultural alemana enta l'este y que os eslavos s'adhibisen en a nueva sociedat y economía alemana. A demografía y producción d'alimentos s'incrementoron, plegando a quintuplicar-se en bells casos. O comercio, que dica o sieglo XII se trobaba en mans d'eslavos y escandinavos, pasa en grant parte a estar una exclusiva d'os alemans, (en 1158 ye fundato Lübeck) que tienen mayor naus y més rapidas (ye tipica a carabela hanseatica d'os sieglo XIII-XV). Tamién s'introducen as formas churidicas, economicas y políticas chermanicas en os territorios eslavos.

Antecedents[editar | editar código]

Una ondata colonizadora encomenzó en o sieglo XI gracias a lo proceso de recuperación de l'agricultura encomenzato en o norte de Francia basato en un nuevo sistema de cautivo por amelgas trienals (rotación de collita d'hibierno, collita de verano y uebra). En l'aria francesa se repobloron territorios devastatos por as guerras y en o Imperio se procede a tallar as selvas, a xartigar y a desecar rechions paulencas.

Este sistema fa que aumente a producción cerealista y un cautivo més remunerador que o d'as amelgas bienals. Se produce tamién un milloramiento d'as tecnicas agrarias:

A intensificación de l'agricultura va acompanyata d'una mayor oferta de productos alimenticios. Aumenta considerablement o numero de naixencias. Quan a ondata colonizadera plegó a lo Sacro Imperio a población creixe tanto que en o sieglo XII plega a un nivel pareixito a lo de Francia. As aldeyas esdevienen villas més grans y compactas, tamién as ciudatz creixen en demografía y extensión, intensificando-se-ie a vida economica, ixo trai a elevación d'o precio d'os productos agricolas.

Desembolique historico d'a primera fase en o sieglo XII[editar | editar código]

En 1125-1137 o emperador Lotario de Suplinburgo empenta o movimiento expansionista enta l'este, por enchaquias misioneras de cheopoliticas. Estableix en os territorios de l'este a sinyors feudals encargatos de levar a cabo os suyos obchectivos.

Henric lo Lión sozmete a lo prencipe Privislau en 1167 y consigue l'homenache d'o duque de Pomerania, encara que en 1178-1180 pierde os territorios de l'este en os procesos debant d'o tribunal palacín y d'o tribunal d'os prencipes.

Quedan d'esta traza margraviatos fundatos por saxons (Misnia, Brandenburgo) y entidatz políticas dirichitas por eslavos cristianizatos (Meklemburgo, baixo a dinastía obrodita de Privislau y Pomerania baixo os Boguslavidas).

Os sinyors feudals saxons de Misnia y Brandemburgo y os principes eslavos de Pomerania, Silesia, Bohemia, Moravia, asinas como a nobleza y lo clero locals favoreixen o establimiento de campesins y ciudadans alemans en lurs arias de churisdicción. As mugas tradicionals d'o imperio (Elba-Saale-Selva Herzinica) quedan desbordatos y a ondata migratoria s'extendilla produndament en dirección norte y noreste.

Tamién resulta important o papel d'as ordens relichiosas (agostins, de Cistels, de Prémontré) y melitars (caballers teutonicos, hespitalers) en a obra colonizadora: hespitals, beneficiencia, administración.

O establimiento de colons alemans se fa de diferents trazas:

  • En lugars fundatos por sinyors alemans seguindo un plan cheneral, situatos a lo largo d'as vías de comunicación, chunto a pratos, selvas u terrenos cautivables, a repartición de tierras se fa en parcelas d'egual extensión pa totz os colons, distribuitas en bloques u franchas, se fan servir bomo unidatz de mesura a yeuguata franca (24 ha) a yeuguata flamenca (16,8 ha). A dirección yera asumita por un empresario que recibiba a cambeo d'o suyo treballo o cargo d'alcalde hereditario. Cada nuclio urbán teneba una ilesia propia con un beneficio (widmut) de 1-4 yeuguatas. Como compensación por deixar a lur tierra y por a labor acomandata os colons milloran lur posición social: pueden adquirir biens en propiedat y lis ne reconoixen o dreito de trasmisión, a soben contra l'abono d'un impuesto en diners u especie. Ixe dreito de trasmisión ye indivisible.
  • En ciudatz fundatas y construitas por sinyors feudals eslavos que tienen una churisdicción y administración autonomas y dreito de fortificación. Estas ciudatz son prochectatas con una estructura en tablero d'aixedrez, con a plaza d'o mercato en o centro, y se creyaban en comarcas (gaue) eslavas. Son gobernatas por una bailía. Os habitants se richen d'alcuerdo con o dreito chermanico: dreito de Magdeburgo y derivatos: de Lübeck, sudchermán, etc, que ye concedido como privilechio.
  • En comunidatz rurals y urbanas que ya existiban, en as quals os colons alemans tienen un dreito particular, que dimpués dica s'extendillaba a los habitants eslavos.
  • En colonias eslavas de tot en as que s'adopta o dreito chermanico, a vegatas con alteracions claras, como ye o caso d'as rechions orientals de Polonia, Lituania, Ucraina y Belarrusia.

Desembolique historico d'a segunda fase en o sieglo XIII[editar | editar código]

En o sieglo XIII encomienza una nueva ondata colonizadora partindo d'as antigas colonias ascanias.

En 1201-1238 o duque Henric I y os suyos succesors, os bispes de Breslau y os duques d'Oppeln colonizan Silesia creyando asentamientos en a marguin dreita de l'Oder.

En 1200-1250 o prencipe Henric Burvy y os suyos fillos estableixen colons en Meclemburgo (Rostock 1218, Wisrnar 1229, Stralsund 1234).

En 1253-1278 o rei Ottokar II de Bohemia funda en o suyo reino més de 60 ciudatz alemanas.

En o sieglo XIV remata o movimiento d'expansión enta l'este: mancan hombres pa la colonización, a población rural emigra t'as ciudatz.

Bibliografía[editar | editar código]