Orden de Cistels

De Biquipedia
Ir ta: navego, busca
Orden de Cistels
Ordo Cisterciensis
Arms of Ordo cisterciensis.svg
Escuto heraldico cisterciense
Información cheneral
Nombre latín Ordo Cisterciensis
Nombre común Cister
Sieglas O.Cist.
Fundador Sant Roberto de Molesmes
Fundación 1098
Orichen Abadía de Cistels
Habito Blanco
Organización
Superior Abad Cheneral Mauro Giuseppe Lepori
Relichiosos 1470
Mosens 717
Curia Piazza del Tempio di Diana, 14, 00153 Roma, Italia
Personas destacatas Sant Roberto de Molesmes, Benedet XII, Gregorio X, Uchenio III, Sant Remón de Fitero
Web www.ocist.org

La Orden de Cistels, Orden d'o Císter u abreviando Cister, ye una orden relichiosa que fundó Roberto de Molesmes en 1098. Prene lo nombre suyo de la abadía francesa de Cistels (en francés moderno Cîteaux) on s'orichinó, que yera l'antiga Cistercium romana, a man de Dijon).

Lis deciban en la Edat Meya "monches blancos" por la color de lur habito, diferenciando-los de los "monches negros", que yeran los benedictins.

Historia[editar | editar código]

Ilesia de la Badía de Fontenay
Brazo y gayata típica cisterciense en losa d'Abate en a Badía de Boyle (Irlanda).

Estando Roberto abate de lo monesterio cluniacense de Molesmes, ell y una colla de monches de la suya comunidat se proposoron tornar a la observancia estreita de lo primitivo regle de Sant Benedet, qui en 540 fundó la Orden de Sant Benedet. Pa ixo devantó una nueva badía en Cistels, on los monches blancos dedicoron lurs vidas a lo treballo manual y a la contemplación ascetica con egual d'encerrinatos, posando en practica lo lema benedictín Ora et labora.

Lo suyo succesor, Sant Alberico, obtenió en 1100 lo reconoiximiento de la nueva orden por parte de lo papa Pasqual II que atorgó a lo monesterio lo “privilechio román”, lo que equivaleba a posar-lo de chos la protección de la Santa Seu; pero estió lo tercer abate, sant Esteban Harding, qui en 1119 dio a lo Císter un regle propio, la Carta de Caridat, en la que se establiban las normas comunitarias de total pobreza, d'obediencia a los bispes, de dedicación al culto divín con deixación de las sciencias profanas, y atros estatutos de la orden. En 1113 ingresa como novicio Bernal de Fontaine en unión d'una colla de familiars y amigos aplegatos en Châtillon. Quan dos anyos dimpués l'abate Esteban decide ixamplar l'ambito monastico con nuevas fundacions, devantando los cenobios de La Ferté, Pontigny, Morimond y Claraval (Campanya), ninvió ta este zaguer a Bernal y la suya chent, en parte por las dotes que se veyeban en lo nuevo monche pa la dirección d'una badía como la que li acomandaban, y en gran parte tamién pa librar a Cistels de la presencia de lo “clan” de los Fontaine, que heban preso una importancia que podeba haber florito a beluns de los que i yeran enantes.

Sant Bernal de Claraval pegó un buen empentón a lo creiximiento de la orden de Cistels, que en 1153 (38 anyos dimpués de la suya fundación no més), teneba 343 monesterios. Destacaba lo treballo de los monches de Claraval que n'heban creyatos 68. Estos monesterios gosaban asentar-los en las landas que trobaban, pero heban de tener augua abundant, (por eixemplo en Escatrón teneban l'Ebro y en lo Monesterio de Piedra lo río Piedra). Los mesmos monches y chirmans combersos ixarticaban y cautivaban la tierra. Si en lo sieglo XI los monches de Cluñego heban preso un gran protagonismo dentro de la ilesia y ocuporon los cargos y dignidatz més alteros, tenendo influencia en lo poder civil, en lo sieglo XII ixe papel lo prenioron los cistercienses, que i tenió los suyos millors tiempos.

La Orden de Cistels en la Corona d'Aragón[editar | editar código]

En la Corona d'Aragón, las relacions entre la monarquía y la Orden de Cistels se remontan dica lo sieglo XII, quan Remón Berenguer IV de Barcelona, ye nombrato prencipe d'Aragón y recurre a los monches cistercienses pa que colonicen las tierras de Poblet. La familia Montcada en Santes Creus, y Berenguera de Cervera en Vallbona de les Monges, siguirán los suyos pasos. Con Pero lo Cerimonioso un d'estos monesterios, lo de Poblet esdevinió panteón reyal de los reis d'Aragón.

La Orden de Cistels en lo Reino de Navarra[editar | editar código]

Se veiga tamién[editar | editar código]