Saxons

De Biquipedia
Ir ta: navego, busca
Saxons
Sassen
  (†)
Ary Scheffer, Carlos Magno recibe a sumisión de Widukind en Paderborn (quadro de 1840)
Carlos Magno recibe a sumisión de Widukind en Paderborn (quadro de 1840, Ary Scheffer).
Rechions con comunidatz importants
Flag of Germany.svg Alemanya
Idiomas
Baixo saxón occidental y alemán
Relichión
Cristiana Luterana
Pueblos relacionatos
Frisons, holandeses, flamencos, angleses, turinchios
Mapa
Central Europe 5th Century.jpg
Os saxons en o sieglo V en narancha claro

Os saxons son un antigo pueblo chermanico que costituyó una confederación en as costas d'a Mar d'o Norte en tiempos d'os romans; tenioron un proceso migratorio que los levó ta o sud y ta a isla de Bretanya.

Saxons continentals en l'Alta Edat Meya[editar | editar código]

A fins d'o sieglo VIII os saxons de Chermania fuoron sozmesos por os francos de Carlos Magno y lur territorio adhibito a un ducato de Saxonia en o Imperio Carolinchio. Carlos Magno efectuaba campanyas anyals en territorio saxón y lis imposó o baptismo y a cristianización forzata dende 772 dica 804. Por ixa razón establió a suya residencia en Aquisgrán, amán d'os campos de batalla en Alemanya. Totz os mainates saxons se convirtioron fueras de Widukin que tardó més y dirichió a resistencia antifranca. Chuan Ferrández d'Heredia dedica o capítol CXCV d'a "Cronica de los Conquiridors" a Como Karles subiugo a los longobardos, los saxones, los bretones, los bajoarios et otras muchas nationes.

A presión franca fazió que pueblos eslavos como os obroditas s'estendillasen por l'este d'o territorio saxón.

Os antigos saxons se fusionoron con atras etnias chermanas orichinando parte d'o pueblo alemán actual en un proceso lento.

Con a división d'o Imperio Carolinchio en 843, Saxonia pasó a fer parte d'o Reino Franco Oriental, como un ducato hereditatio gubernato por una fuerte dinastía, os Liudolfing. Como a suya incorporación a lo imperio estió tardana, perdioron debant d'os francos en l'anyo 911 quan se celebró a primera elección pa ocupar a cadiera reyal chermanica. Manimentos, o reinato d'o duque franco Conrado estió tan mala que ell mesmo proposó estar succedito por un noble d'a casa de Saxonia, Henrique o Paixarero, que esdevinió rei.

O territorio d'os saxons esdevinió a base d'o poder d'o reino, y Henrique continó costruindo o suyo imperio. Estió un melitar brillant y tornó a situar Lotarinchia baixo control d'o Reino Franco Oriental. D'a mesma traza luitó con exito contra os hongaros. O suyo fillo Otón I d'o Sacro Imperio Román Chermanico lis inflichió una derrota encara més greu en 955, por o que o papa lo recompensó nombrando-lo emperador d'o Sacro Imperio Romano-Chermanico. Quan fue coronato Otón emperador, ya no podeba fer de duque, y atorgó este títol a Hermann Billung, con territorio en o baixo Elba, en a muga contra os eslavos.

Quan a linia imperial saxona d'os Otons s'extinguió, a dinastía Billung esdevinió a dinastía saxona més poderosa, oposata a los emperadors d'a dinastía imperial Salia. En 1073 os nobles saxons encomenzoron una revuelta contra o emperador Henrique I d'o Sacro Imperio Román Chermanico, que fació que se formase una aliganza entre os saxons y o papa Gregorio VII.

A penar que a dinastía de Billung s'extinguió en 1106, os saxons siguioron luitando contra o dominio imperial dica que a dinastía salia s'extinguió en 1125, y lo nuevo duque saxón Lotario I fue esleito rei y dimpués emperador.

Frederico I Barbarroya atorgó autonomía a Henrique o Lión, duque de Saxonia y Bavera, pero dimpués lo desterró y dividió o suyo territorio por no aduyar-lo en Italia. A caita en desgracia d'Henrique permitió a la dinastía Ascania que se fese con o control de Saxonia. Esta dinastía yera implicata en a expansión alemana enta l'este u Ostsiedlung y heba heredato muitas tierras d'os Billung, con o que yera a familia més poderosa d'o ducato. Manimenos o territorio d'Ascania yera més extenso que a mesma Saxonia, y quan a familia se dividió en dos en o sieglo XV, o títol de duque quedó en manos d'a branca que gobernaba o centro d'Alemanya. O nombre de "Saxonia", que orichinalment designaba a los territorios d'a stamne saxona en a costa norte, se trasladó a lo centro d'o país, luent d'a mar.

Saxons en a Isla de Bretanya[editar | editar código]

Os saxons, anglos, chutos y atros pueblos chermanicos en menors proporcions invadioron a costa este d'a isla de Bretanya quan ni os romans ni a población local podeban esfender-sen d'atros invasors. Quan ya yeran bien establitos empentoron a los britons enta l'ueste. Con o tiempo a fusión de anglos, saxons y chutos orichinó a los actuals angleses.

Se veiga tamién[editar | editar código]