Orden Teutonica
De Biquipedia
Orden Teutonica (tamién dita Orden d'os Caballers Teutons, Caballers Teutonicos d'o Espital de Santa María de Cherusalén e Caballers Espitalers, en alemán Deutscher Ritterorden; en latín Domus Hospitalis Sactæ Mariæ Teutonicorum). Orden meyebal de carauter relichioso-melitar fundata en Palestina en 1190 (en a Terzera Cruzata) mientres o setio d'a fortaleza de San Chuan d'Acre. En 1198 esdebién una orden melitar. Dende o sieglo XIX la orden contina esistindo como una organizazión cristiana de carauter caritatibo.
Contenius |
[editar] Organizazión
A organizazión d'os caballers teutons encomenzó estando basata en a regla d'a Orden d'o Espital, pero la dixoron pronto pa prener una bersión modificata d'a regla d'a Orden d'o Temple. Bi eba tres tipos de miembros: caballers, sazerdoz, e legos. Os primers feban botos perpetuos, os legos podeban estar binclatos temporalment a la orden en dimpuén salir-sen-ne.
En prenzipio cada mesón o residenzia de caballers teutons eba d'estar abitata por un comandador, doce caballers e seis sazerdoz, pero o lumero bandeyaba d'alcuerdo con as zercustanzias.
A direzión cheneral d'a orden correspondeba a lo gran mayestre, con cargo bitalizio. As dezisions yeran controlatas por o capítol cheneral, formato por os mayestres rechionals (Armenia, Acaya, Lombardía, Pulla, Prusia, Libonia e Chermania). En a mesma residenzia d'o grant mayestre eban de residir tamién os atros dignatarios d'a Orden: o comandador (grosskomtur), o grant mariscal (marscall), e o encargato d’a guardarropía (Trappier), o espitalero (Spittler) e o tresorero (tressler).
[editar] Os orichens en Tierra Santa
A Orden la formaban nobles alemans e seguiba o modelo d'a Orden d'o Temple e d'a Orden de San Chuan de Cherusalén. Fundata en San Chuan d'Acre (Palestina) en 1190 mientres a Terzera Cruzata dimpués que Saladín prenese Cherusalén. En os orichens suyos no yera que una organizazión caritatiba que aduyaba a os pelegrins cristians, dimpués la reorganizoron como orden melitar a lo estilo templero, en 1192, e obtenió o reconoximiento ofizial d'o papa Inozenzio III en 1198.
[editar] A fortaleza de Montfort
Articlo prenzipal Montfort (Israel).
En 1220 os Caballers Teutonicos establexen lur cuartel cheneral en a fortaleza de Monfort que esdebinió a seu d'os grans mayestres d'a orden en 1229.
En 1266, os arabes no consiguen prener a fortaleza. Pero tornarán en 1271 e conseguirán fer-sen con o castiello a traviés d'un túnel escarbato en a roca. Os caballers teutonicos beyen que han de refuchiar-sen en San Chuan d'Acre[1].
Un sieglo dimpués, en 1291, la presa d'Acre por os sarrazíns obligó a los cruzatos a reblar e retirar-sen de Tierra Santa, fendo que a orden abese de reconsiderar a misión suya. Derrotatos en as Cruzadas, os caballers d'a Orden Teutonica se trasladoron ta Transilbania.
[editar] A Orden Teutonica en Transilbania
Un documento de donazión emeso por o rei Andreu II d'Ongría en 1211 siñala ofizialment l'asentamiento d'os caballers teutonicos en Transilbania. En concreto s'asentoron en a Tierra d'o río Bârsa pa aturar as embasions de pueblos d'as estepas euroasiaticas como os cumans e os pazinacos en una zona de muga.
A Orden i fortificó bellas ziudaz e lugars con o esfuerzo d'os natibos, como ye o caso de Feldioara, Cetatea Neagră e Cetatea Crucii. Trayoron pobladors chermans de l'aria de Sibiu pa que cautibasen as tierras e pa que estasen artesans e lis dasen os recursos que prezisaban. Estos repobladors chermans serían conoxitos en rumán como saşi ("saxons"), encara que no benisen de Saxonia. Feldioara, Braşov, Codlea, Râşnov e Prejmer son ziudaz e lugars que fundoron os colons chermans u que se desembolicoron por asentar-sen-ie ellos.
O orden cada begata yera més poderosa, y estendillaba a suya autoridat més luent que os monts d'a muga ofizial. Costruiban fortalezas en Tabla Buţii (en o paso Buzău) y en o Puent d'o Dâmboviţa (denzima d'o paso Bran).
Enta 1225 os caballers teutons empezipioron a desbincular-sen d'o rei ongaro, posando o suyo territorio en baxo l'autoridat d'o Papa. Esto yera faborexito por lo ligallo que teneba a Orden con o Papato (se consideraba en plan d'igualdat con a Orden d'o Temple e a Orden d'o Espital), y en espezial por o ligallo que teneba o Gran mayestre d'a orden, Hermann von Salza, con o emperador romano-chermanico Frederico II e con o Papa Onorio II. Beyendo que esistiba o periglo que a Orden teutonica se costituise en un estato independient en territorio ongaro, o rei Andreu luitó contra ellos en 1225 benzendo-los e los forachitó.
Os colons chermans traitos por os caballers teutons quedoron en a Tierra d'a Bârsa baxo l'autoridat d'un conte nombrato por o rei. Os suyos deszendients son parte d'os autuals saxons transilbans.
[editar] Estato Teutonico
En ixe inte a orden s'establió, ya de pa cutio, en Prusia creyando un Estato d'a Orden Teutonica independient, dende o que chitoron campañas cuentra o Reino de Polonia, cuentra o Ducato de Lituania, e cuentra pueblos indoeuropeus d'a branca balta e pueblos fineses d'a branca baltica encara politeistas, prozeso que se conoxió como Cruzatas Balticas, fendo-ie una cristianizazión forzata con mortaleras masibas, deportazions e limpiezas etnicas. Tamién establioron poblazions chermanas cristianas que encara i serán presents dica a Segunda Guerra Mundial.
[editar] Cruzata en Prusia
O terzer mayestre d'a Orden Hermann Von Salza 1210-1239 encomenzó a ocupazión de Prusia dende a rechión de Kulm (Chelmno), on s'establioron ya en 1230. Os teutons preboron de penetrar en Pomerelia. En a conquiesta de Prusia contaban con a partizipazión de cruzatos polacos, checos e alemans e teneban o respaldo d'o papato e d'o emperador chermanico.
En o sieglo XIII rematoron a ocupazión de Prusia, os prusians fuoron cristianizatos a la fuerza, as fortalezas d'os prusians, ocupatas, esdebinioron ziudaz como Torun, Kwidzyn e Elblag. As tierras d'os prusians fuoron repartitas entre colons alemans, se creyó una nueba aristocrazia alemana en o país mientres que a poblazión natiba quedó reduzita a una conzidión de sierbos. Dimpués d'a ocupazión de Prusia examploron lur campo d'azión por Curlandia y Libonia, fusionando-sen con os Portaespatas en 1236. Dica fins d'o sieglo XIII se produzirán lebantamientos prusians.
A tamas d'una derrota debant o ruso Alejandre Nevski en 1242 en a batalla d'o lago Peipus, a orden estendilla ascape os suyo dominio sobre os países balticos. O Emperador Frederico II de Hohenstaufen atorgó a los teutons toz os pribilechios d'os prenzipes d'o Imperio como o dreito de sobiranía sobre os territorios conquiestos. Este prozeso d'espansión esta l'este implicó una colonizazión e chermanización de tierras, en a que fue fundamental a creyazión de ziudaz de poblazión chermanica en zonas estratechicas e tamién fendo mortaleras y espulsions de poblazión autoctona. En 1291 a caita de San Chuan d'Acre talló os zaguers binclos con Tierra Santa, y a capital d'a Orden y Seu d'o Gran Mayestre se tresladó ta Benezia dica 1309, e ta Malbork ya de pa cutio en 1309, dende on as altas cherarquías d'a Orden dirichioron a gran potenzia politica e finanziera que s'eba creyato en Prusia, que a prenzipios d’o sieglo XIV yera sozmesa, cristianizata e chermanizata de tot.
[editar] Apocheu
A fins d'o sieglo XIV, a orden plegó ta l'apocheu d'o suyo poder grazias a una potent economía urbana, que lis permitiba contratar merzenarios de tota Europa pa incrementar las lebas feudals, y esdebenir una potenzia nabal en a mar Baltica. A orden plegó a la suya mayor estensión: anecsión total de Pomerelia e d'o puerto de Danzig, (1308-1309), derrota de Lituania e dominio total d'Estonia (1346) e ocupazión d'a isla de Gotland (1398). As ziudaz (Danzig, Elblag, Torun, Chelmno e Königsberg) encomenzoron a desembolicar una intensa bida economica, e afiliatas en a Hansa controlaban o comerzio entre Rusia e Polonia (zerials, bestiar, pelletas, ámbar, este zaguer controlato por a Orden Teutonica).
[editar] Decadenzia
Sin d'embargo dende a segunda metat d'o sieglo XIV encomenzó o prozeso de decadenzia, condizionata en grant parte d'una potenzia més fuerte con territorios arredol d'os d'a Orden: a Unión Polaco-Lituana dende 1386. Por atra parte se planteyoron problemas churisdizionals entre o papato e a orden. A burguesía e a nobleza terratenient quereban sacurdir-sen a sobiranía semieclesiastica d'os teutonicos. Nobleza e burguesía formoron o Ligallo de Lucertole cuentra a Orden teutonica. En 1402 os caballers teutonicos s'anecsionoron a Nueba Marca o Neumark pa tener continuidat territorial con os suyos aligatos os margraus de Brandemburgo.
A decadenzia d'a Orden se notó en 1410 cuan fue derrotata en a Batalla de Tannemberg debant de Ladislau II de Polonia e Grant Duque Vytautas. O Ligallo de Lucertole contribuyó a la derrota teutonica, e lo gran mayestre comprendió que caleba reconoxer uns organs representatibos d'as ziudaz e a nobleza, pero fue desposeito en 1413 por a mesma orden teutonica. En 1454 os nobles e burgueses pactoron con Casimiro IV Jagellón de Polonia, encomenzó atra guerra entre os teutonicos e Polonia de treze añatas (1554-1566), desastrosa pa os teutonicos a tamas que eban zedito Neumark en 1555 a lo eleutor de Brandemburgo con a esperanza de tener-ne aduya.
En a Paz de Torun (1466) a mayor parte d'os territorios d'a orden pasoron a depender de Polonia. A dita "Prusia reyal" (Pomerelia, con Danzig, Elblag, Torun, tierra de Chlemno e Warmia) quedó baxo sobinaría direuta de Polonia, que conseguiba a salita a la mar, a Prusia Oriental con Könisberg permanexió en mans d'a Orden Teutonica pero baxo sobiranía de Polonia. Dende a paz de Torún a decadenzia d'a Orden ya ye irrebersible. En 1498 o mayestre Frederico de Saxonia se negó a prestar churamiento de basallache a Polonia. En 1511 fue esleito o zaguer gran mayestre d’a orden Alberto de Brandemburgo (1511-1525), que tampoco prestó churamiento de basallache a lo rei de Polonia, por o que o suyo territorio fue embadito por Polonia entre 1519 e 1521. A introduzión d’a Reforma Protestant en 1523 en Prusia cambeyó o chuego de poder e remató con a presenzia d’a Orden en Prusia: Alberto de Brandemburgo s'adirió a la reforma protestant, secularizó os biens d'a Orden e l’almenistrazión d'o territorio d'a orden esdebinió un estato laico ereditario basallo de Polonia. En 1525 Alberto prestó churamiento a Sechismundo I de Jagellón esdebenindo o primer duque de Prusia. Prusia esdebinió o nuclio d'as posesions d’os Hollenzollern. En 1525 o Tratato de Cracobia sanzionó a desaparizión d'a Orden.
[editar] Referenzias
- ↑ Wikipedia Francia "Monfort Israel"Traduzión d'o articlo orichinal
