Checos

De Biquipedia
Ir ta: navego, busca
Checos
Zdenek Sverak.jpgEva Herzigova 1997.jpgBedrich Smetana.jpg
Zdeněk Svěrák · Eva Herzigová · Bedřich Smetana
Población total
Más de 12 millons
Rechions con comunidatz importants
Flag of the Czech Republic.svg Republica Checa 9.246.000
Flag of the United States.svg Estatos Unitos 1.462.000
Flag of Canada.svg Canadá 98.090
Idiomas
Checo
Pueblos relacionatos
Pueblos eslavos

Os checos son un pueblo europeu, y son os habitants mayoritarios de Bohemia y Moravia (Republica Checa, en Europa Central). Parlan una luenga eslava occidental (o checo) y son de relichión cristiana catolica u protestant).

Luenga[editar | editar código]

Gnome-searchtool.svg
Ta más detalles, veyer l'articlo idioma checoveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

O checo ye una luenga eslava occidental y s'escribe en alfabeto latín. O checo ha tenito influencia chermanica porque o Papa Gregorio VIII se negó a conservar l'antigo eslavo eclesiastico como luenga liturchica, deixando a Bohemia y Moravia baixo a tutela relichiosa y politica alemana.[1]

A ortografia d'o checo, con muitas letras con diacriticos como a y a č ha servito como inspiración pa la creyación d'a ortografía crovata.

Historia[editar | editar código]

Gnome-searchtool.svg
Ta más detalles, veyer l'articlo Historia de Chequiaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

Os checos baixo os premislidas[editar | editar código]

Os primers sobirans conoixitos d'os checos estioron a dinastía d'os Premislidas, conoixitos con seguridat dende Borivoj, baptizato enta l'anyo 880 por Sant Metodio chunto con a suya muller Ludmila. Borivoj ye succedito por Vratislau y dimpués por Wenceslau, derrocato por o suyo chirmán Boreslau o crudel. A l'egual que en Polonia, a cristianización no fue total y part d'a población siguió pagana.[1] A penar que a cristianizacón se facó por os santos Cirilo y Metodio ninviatos por Costantinoble, os cristians checos s'alioron con Roma.

En l'anyo 962, quan Otón I d'Alemanya ye coronato emperador d'o Sacro Imperio Román-Chermanico, Bohemia en fa parte. En l'anyo 973 Boreslau o Piadoso obtién a creyación d'o bispato de Praga, dependient de l'arcebispato de Maganza. En l'anyo 992 a Orden Benedictina s'establió en Drevnov a penar d'a resistencia popular.[1] Bohemia esdevién un reino dentro d'o Sacro Imperio a principios d'o sieglo XIII con Otakar I. Otakar s'anexiona en l'anyo 1222 Moravia.

Otakar II se fa amo d'a mayor parte d'Austria y aspira a estar esleito emperador d'o Sacro Imperio, pero os electors prefieren en 1273 a Rodolfo d'Habsburgo. En a batalla de Dürnkrut en 1278 os Habsburgo prenen posesión d'Austria. En 1306 Wenceslau III ye asesinato y desapareix a dinastía d'os Premislidas.

Bohemia como centro d'o Imperio Chermanico[editar | editar código]

En 1310 o emperador Henrique de Luxemburgo consigue que o suyo fillo Chuan siga esleito rei de Bohemia, y se casa con a chirmana de Wenceslau III. Chuan se dedica a guerreyar por Europa y dixa gubernar a la suya muller y a la nobleza checa, morindo en 1346 en a batalla de Crécy.

O suyo fillo Carlos lo succede y esdevién emperador d'o Sacro Imperio en 1355, (Carlos IV). Con Carlos IV Bohemia conoix a suya millor epoca, y Praga esdevién a capital d'o Imperio y una d'as ciudatz més grans d'Europa. A bula d'Oro de 1356 lechisla o sistema d'elección d'o emperador. O territorio d'o reino de Bohemia se fa mes gran, con l'anexión d'a Baixa Lusacia, (l'Alta Lusacia ya perteneixeba a lo reino de Bohemia dende 1329), os países de Cheb, (cabo ueste de Bohemia), y Znojmo (o sud de Bohemia). Silesia pasa a fer part d'o Reino de Bohemia a cambeyo de renunciar a la corona de Polonia.

Dende 1344 Praga ye seu d'un arcebispato independient de tot de Maganza. Carlos IV funda con o refirme de Climent VI a Universidat de Praga en 1348, a primera d'Europa Central y d'o Sacro Imperio. En 1348 Carlos IV decide d'edificar a ciudat nueva de Praga, Nové Mesto, y en 1357 ordena a construcción d'o famoso puent de piedra.

A revolución d'os Husitas[editar | editar código]

Gnome-searchtool.svg
Ta más detalles, veyer l'articlo Husitasveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].
Jan Hus en a foguera

Cheronimo de Praga, que heba estudeyato en Oxford estendilla as ideyas criticas sobre a ilesia d'o teologo anglés John Wyclif, en os tiempos d'o Scisma d'Occident. Estas ideyas inspiran a Jan Hus, traductor d'a Biblia a lo checo, y predica a reforma d'a ilesia en idioma checo en Praga y ye escomulgato. Jan Hus ye convocato debant o Concilio de Gostanza en 1414 y lo creman vivo, como dimpués fan con Cheronimo de Praga. Jan Hus esdevién o heroe nacional checo, y os seguidors d'as suyas ideyas relichiosas (os husitas), se rebelan, tamién con o deseyo d'un cambeyo social, con abolición d'a servitut y que as tierras sigan comuns. Wenceslau IV no puet controlar a situación y o 30 de chulio de 1419 os husitas chitan por as finestras d'o castiello de Praga a altos cargos catolicos.

Wenceslau IV ye sucedito por o suyo chirmán Sechismundo, rei d'Hongría dende 1387 y emperador dende 1419. Os husitas no lo reconoixen y Sechismundo y lo Papato organizan una cruzata. A cruzata ye derrotata en Vitkov por Jan Zizka, y una dieta cheneral de Bohemia confisca os biens d'o clero y d'a corona. Quan muere Jan Zizka en 1424 ye sucedito por Prokop, que derrota a una cruzata en 1431.

Sechismundo aproveita a división entre dos brancas d'husitas, (calixtins y taboritas). En 1433 bi ha un alcuerde entre catolicos y calixtins en o rito. Os taboritas son derrotatos en 1434 en Lipany, on muere Prokop. Sechismundo acepta a perduga d'os biens d'a corona y d'o clero y reconoix o checo como luenga oficial, ye proclamato rei y muere en 1437.

Entre os Luxemburgo y os Habsburgo[editar | editar código]

Alberto de Habsburgo, estió emperador, rei d'Hongría y de Bohemia y morió en 1439, deixando como hereu a Ladislau. Esleyen a atro Habsburgo como emperador, Frederico III. En Bohemia Chorche de Podebrady, un noble ultraquista prene o poder y se fa esleyir rei en 1458, dimpués d'a muerte de Ladislau o Postumo. Imposa a suya autoridat dica en Silesia y funda una imprenta en a que s'imprime o primer libro en checo. Os catolicos de Bohemia esleyen a Matías Corvín como rei. En 1466 Pavlo II acomanda a Matías Corvín que organize una nueva cruzata. Chorche de Podebrady muere en 1471 nombrando como succesor a Ladislau, fillo de Casimiro lo Gran de Polonia. Ladislau cede a Matías Corvín Moravia, Silesia y Lusacia y dimpués d'a muerte de Matías Ladislau ye esleito rei d'Hongría y refa o Reino de Bohemia.

A Ladislau lo succede como rei de Bohemia y Hongría o suyo fillo Luís, que muere en a Batalla de Mohacs en 1526 y ye succedito por Ferrando de Habsburgo. Dende ixe inte os Habsburgo serán reis de Bohemia (y d'Hongría) dica 1918.

A Bohemia baixo os Habsburgo[editar | editar código]

Dende 1526 dica 1618 en Bohemia bi ha tranquilidat, encara que a reforma s'estendilla a escape. Os checos son a mayoría utraquistas y se dividirán en seguidors de Roma y neoutraquistas que se farán protestants. Os alemans de Bohemia se fan protestants.

Ferrando I en 1556 favorix a los catolicos y proteche a los chesuitas, que fundan en Praga una universidat rival d'a universidat anterior. En 1561 se creya un arcebispato catolico de tot, dimpués d'un sieglo y meyo d'husitismo. Maximilián II ratifica oralment a Confesión checa de 1575, que fa que os neoutraquistas s'amanen a los luterans.

Rodolfo II estableix a suya residencia en Praga en 1582, proteche as artes y sciencias, acollindo a astronomos protestants como Tycho Brahe y Johanes Kepler y reconoix a libertat de culto en 1609. En 1619 muere o suyo chirmán Matías, que lo succedió.

A guerra d'as Trenta Anyatas[editar | editar código]

Gnome-searchtool.svg
Ta más detalles, veyer l'articlo Guerra d'as Trenta Anyatasveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

En a derrota d'a Montanya Blanca desapareix a Bohemia quasi independient y husita. Bi ha una gran represión que encomienza por 27 miembros d'a dieta que son escabezatos. Bi ha multas y confiscacions a la baixa nobleza checa y alemana, y lurs propiedatz pasan a los sinyors que heban estato fidels a lo bando vencedor como os Wallenstein/Valdstyn. A cancillería de Bohemia ye tresladata ta Viena. En a dieta domina l'alto clero y l'alta nobleza. Ferrando dixa que se faiga a contrarreforma y os chesuítas prenen o control d'a Universidat Carlos. 30.000 familias de nobles y burgueses que no querioron convertir-sen a lo catolicismo habioron d'exellar-sen.

O periodo de Temno[editar | editar código]

Rematata a guerra d'as trenta anyatas a fins d'o sieglo XVII s'ha produeito cambeyos socials que han perchudicato a los nativos checos. Bohemia depende de l'alta nobleza que tien o 85 % d'a tierra. Os alemans dominan o comercio y l'artisanía, dica en a capital Praga. Os campesins checos son en una situación d'esclavitut y en 1680 y 1693-1695 esclatan revueltas.

L'administración austriaca[editar | editar código]

En 1740, quan a guerra de succesión austriaca, os prusians invaden Silesia, (que perteneixeba a Bohemia dende o sieglo XIV) y por o tractato de Dresde en 1745 se l'anexionan de fueras de chicotz territorios que encara se dicen Silesia Austriaca y que tenioron población alemana (y en Teschen, polaca). En 1741 as tropas baveranas y francesas ocupan Bohemia sin resistencia popular. Os Habsburgo veyen que o sistema creyato por Ferrando II no funciona, y quan María Teresa (1740-1781) y Chusé II (1781-1790) i habió reformas.

Se creya una administración central en Viena con churisdicción en Austria, en Bohemia y en Moravia. Bi ha una burocracia que se puet fer servir pa puyar socialment, tanto os alemans como os checos.

Quan a Santa Seu suprime a Orden d'os Chesuítas en 1773 se refirma l'amostranza secundaria y torna a haber-ie amostranza primaria en checo. Con tot y con ixo Chusé I estableix que l'alemán yera a luenga sola de l'administración. Bi ha un edicto de Tolerancia en 1781 pa os protestants que millora tamién a situación pa os chodigos axkenazís. A esclavitut ye abolita tamién pero no o rechimen feudal.

O sieglo XIX[editar | editar código]

Antonín Dvořák, fegura destacata en o renaiximiento cultural checo d'o sieglo XIX.

A principios d'o sieglo XIX Bohemia tien un desembolique economico pareixito a lo d'Austria y rechions orientals d'Alemanya. Amanix o mobimiento intelectual d'os despertadors. En 1848 se celebroron esleccions por sufrachio universal en o marco d'a Confederación Chermanica, (Bohemia en feba part). Os representants checos se niegan a participar pero os alemans de Bohemia y Moravia, que no veyen inconvenient en estar unitos Alemanya, si que quieren participar-ie. Un representant a lo Parlamento de Frankfurt declara que o chequismo ha de estar aturato y reprimito por a fuerza. Palacky organiza en chunio en Praga un congreso eslavo con checos, eslovacos y polacos. En a ciudat bi ha disturbios, y ha d'intervenir o exercito con o cheneral Windischgraetz.

Un parlamento creyato por sufrachio universal s'aplega en Viena con representants de totz os estatos baixo dominio austriaco de fueras de Hongría. Bi ha muitos deputatos eslavos y votan en septiembre l'abolición d'os dreitos sinyorials y d'os ligallos de servitut. A causa d'os disturbios de Bohemia, reprimitos por o canciller Schwarzenberg (un aristocrata de Bohemia), o gubierno y asambleya se treslatan ta Moravia. Pretenden creyar una Constitución on se respeten os dreitos d'as nacionalidatz. L'asambeya refirmaun prochecto presentato por Cajetán Mayer (un deputato morabo) en o que se respetan os territorios historicos y bi ha división en cerclos de caracter nacional, pero o emperadro Francisco Chusé y Scwarzenberg lo refusan. En marzo de 1489 l'asambleya ye disuelta y s'atorga una Constitución reaccionaria.

En 1867 s'alcuerda o compromís austro-hongaro, o territorio de Bohemia y Moravia quedan en Cisleitania sin garra autonomía, encara que Bohemia yera a l'egual que Hongría en unión presonal a lo imperio. Os deputatos checos boicoteyan os treballos d'o parlamento de Cisleitania.

En 1871 o canciller Hogenwart proposa un compromís por que que Francisco Chusé sería coronato en Praga y reafirmaría os dreitos d'o Reino de Bohemia, pero os hongaros y os alemans de Bohemia se i oposan. En 1882 s'imposa o bilingüismo pa os funcionarios de Bohemia, o que favoreix a los checos. A Universidat Carlos se divide en dos seccions, alemana y checa. Os chóvens checos d'o Partito Nacional Liberal, fundato en 1874, consiguen una influencia cada vegata mayor, y s'organiza un partito socialdemocrata checo.

Dica 1906 no bi ha sufrachio universal en Cisleitania. Quan encomenzaba a primera guerra mundial Bohemia y Moravia encara no teneban autonomía politica (si que en teneban de cultural). Bohemia y Moravia a fins d'o sieglo XIX y principios d'o sieglo teneban un grau de desembolique comparable a atros países d'Europa Central y Occidental, con desembolique industrial (fabricas Škoda fundatas en Plzen en 1859), agricultura modernizata, grau d'amostranza. Con a industrialización amaneix una clase obrera. En 1914 o 95 % d'os funcionarios de Bohemia y Moravia yeran checos. Os escritors d'esta epoca son o checo Jaroslav Hasek y o chodigo askenazi Franz Kafka.

A primera guerra mundial[editar | editar código]

O gubierno austro-hongaro recluta a soldatos checos y de totas as nacionalidatz p'a guerra, pero bells liders politicos han emigrato t'o estranchero como Tomás Masaryk y Edvard Benes, que con o eslovaco Milan Stefanik creyan en París en 1916 o Consello Nacional Checoslovaco con l'aduya d'universitarios franceses como Ernest Denis.

O Consello Nacional Checoslovaco creya con voluntarios y exprisioners collas de guerrillers checos y eslovacos que luitan en o frent francés y italián, y dimpués a Lechión Checa en Rusia.

En mayo de 1917 os deputatos checos proposan en o Parlamento d'Austria-hongría a creyación d'un estato confederal y que Bohemia-Eslovaquia serían uno d'os suyos components. Os hongaros s'i oposan.

A Lechión Checa de Rusia participó en a ofensiva rusa de chulio de 1917 pero se retiró ta Siberia pa embarcar en Vladivostok. A lechión checa participó en a Guerra Civil Rusa, y 50.000 lechionarios secuestroron o ferrocarril transiberián. Fuoron derrotatos por os bolchebiques. En 1919-1920 serán repatriatos.

O gubierno francés en chunio de 1918 reconoixió a representatividat d'o Consello Nacional Eslovaco. O 14 d'octubre de 1918 Masaryk anuncia en Washington a formación d'un Gubierno provisional checoslovaco reconoixito por os aliatos. O 28 se proclama a republica en Praga, o 31 se forma en Praga o Gubierno provisional d'unión de checos y eslovacos.

A checoslovaquia d'entreguerras[editar | editar código]

Os checos reclaman pa o suyo estato tot o territorio historico d'a Corona de Bohemia: Bohemia, Moravia y a Silesia Austriaca. A fins de 1918 os aliatos niegan a los alemans d'os Sudetes o dreito a referendum pa que decidan d'unir-sen a una Alemanya con Austria adhibita.

A Silesia Austriaca ye obchecto de litichio. En a redolata de Teschen bi ha muitos polacos y Polonia la reclama. O 20 de chulio de 1920 a redolata de Teschen ye partita en dos y Polonia se queda con a partita oriental.

Dende 1920 dica 1938 en Checoslovaquia bi ha un rechimen de democracia parlamentaria. Masaryk ye president dende noviembre de 1918 dica 1935. Lo succede Benes, que enantes heba estato ministro d'afers exteriors y responsable d'alcuerdes defensivos en 1920-1921 con Rumanía y Yugoslavia (Entesa Chicota), y con Francia en 1924. En 1935 se firma un pacto d'asistencia mutua con a URSS. Checoslovaquia estió a zaguera democracia europea que refirmó a la Segunda Republica Espanyola en a guerra civil. En tot ixe periodo d'entreguerras os dreitos d'as minorías se respetaban millor que en atros países d'Europa central, respetando as exichencias d'os tractatos de paz. Serán as reivindicacions d'as minorías las que farán desfer-se a Checoslovaquia dimpués.

As relacions entre checos y eslovacos se fan peyors porque a millor preparación educativa d'os checos fa que ocupen masivament as plazas de funcionario en Eslovaquia. En Eslovaquia o Partito populista prene posicions autonomistas y con bell caracter faixista con mosen Josef Tiso. Os alemans tornan a reivindicar a unión con Alemanya y en a decada de 1930 y en 1935 o pronazi Konrad Henlein obtién dos tercios d'os votos d'os alemans.

En o 12 de marzo de 1938 Austria ye anexionata por Alemanya y esto produce una crisi en Checoslovaquia. Henlein presiona cada vegata més a lo gobierno de Praga y bi ha tensión en os Sudetes. Pa evitar una posible guerra que podeba estendillar-se a mes países, o primer ministro britanico Neville Chamberlain negocia con Hitler, y con una tensión internacional puyando, o 30 de setiembre se plega a un alcuerde en Munich entre Hitler, Mussolini, Chamberlain y Daladier, que ye o principio d'a fin d'a zaguera democracia parlamentaria d'Europa Central, y indreitament fació que a Segunda Republica Espanyola perdese un zaguer refirme y que deixase de tener razons pa resistir en a Batalla de l'Ebro.

O tractato de Munich significaba que o territorio d'os Sudetes de Bohemia, Moravia y Silesia fuese cedito a Alemanya. O 30 de setiembre Polonia obliga a que Checoslovaquia li ceda a partita ueste d'a redolata de Teschen. O 5 d'octubre dimite Benes y s'exella en Estatos Unitos. O 6 d'octubre Tiso proclama l'autonomía d'Eslovaquia y Rutenia. O 2 de noviembre o primer arbitrache de Viena atorga a Hongría o sud d'Eslovaquia y de Rutenia, y o rechimen pronazi d'Eslovaquia entra en conflicto con o gubierno de Praga, declarando a independencia d'Eslovaquia o 14 de marzo de 1939.

A nueit d'o 14 a lo 15 de marzo o president Hacha arriba en Berlín y firma un documento baixo l'amenaza d'una guerra que posa Bohemia y Moravia en mans d'o Führer. O 15 de marzo Hitler firma en o castiello de Praga un decreto por o que Bohemia y Moravia esdebienen un protectorato y s'adhiben a lo Reich.

A segunda guerra mundial[editar | editar código]

Mientres a segunda Guerra Mundial as autoridatz nazis controlan de tot Bohemia y Moravia. En octubre de 1939 Benes creya un comité nacional checo en Londres. Dende noviembre de 1939 cierran os centros d'amostranza superior. En chinero de 1941 s'establix o servicio de treballo obligatorio. Centenars de mils de checos son nimviatos a las fabricas alemanas. Os resistents y opositors son nimviatos a campos de concentración como os futuros presidents Zápotocky y Novotny y lo futuro arcebispe de Praga mosen Beran.

Benes tornó a ser nombrato president y forma un gobierno que a unión sovietica reconoix en chunio de 1941. En setiembre de 1941 arriba en Praga d'adchunto dreito de Himmler Reinhard Heydrich, de caracter tierco, que aumenta a represión y que ye asesinato o 27 de mayo de 1942. En represalia o 10 de chunio os nazis fan una mortalera en Lidice. En aviento de 1943 Benes firma en Moscú un tractato d'amistat y asistencia mutua, y s'entrevista con o comunista Klement Gottwald.

Dica mayo de 1945 as tropas d'os aliatos no podioron entrar en Bohemia y Moravia. Pocos días enantes de plegar o exercito royo os habitants de Praga se sublevoron. Os americans plegoron dica Plzen En marzo-abril de 1945 Benes treslada as autoridatz checoslovacas dende Londres ta Kosice, y se forma un nuevo gubierno con o socialdemocrata Zdenek Fierlinger de president y o comunista Gottwald de vicepresident. O programa d'este gubierno, dito de Kosice preveye una reforma agraria, nacionalizacions y fer liga con a URSS.

Una vegata rematata de tot a guerra se torna a las mugas de 1937, manimenos por l'alcuerde d'o 29 de chunio de 1945 Checoslovaquia cede a la URSS a Rutenia Subcarpatica. A conferencia aliata de Postdam d'agosto de 1945 dixa que o gubierno de Checoslovaquia forachite a los alemans, y dende 1947 no en quedan que uns 100.000.

O periodo comunista[editar | editar código]

En mayo de 1946 bi ha eleccions libres en Checoslovaquia y con o 38% d'os votos os comunistas ganan. O president Benes acomanda a Gottwald a formación d'un gubierno d'unidat nacional en o que o ministro d'interior ye comunista y o menisterio d'asuntos foranos ye en mans de Jan Masaryk, fillo de Tomás Masaryk). Moscú se mete en a politica checoslovaca y ordena que Checoslovaquia refuse o plan Marshall, acceptato en chulio. O partito socialdemocrata refusa a fusión con o partito comunista.

Dimiten dotze ministros no comunistas en protesta d'a orientación comunista d'o menisterio d'interior. Esclata una vaga y os comunistas prenen o poder a escape. O 98 % d'o sector industrial ye nacionalizato y una nueva Constitución establix una Republica de democracia popular. En chunio dimite Benes y os comunistas ya tienen de tot o poder.

En 1951 bi ha una purga estalinista, y muitos d'os acusatos son comunistas chodigos axkenazís. En 1960 Checoslovaquia ye proclamata Republica Socialista, pero en 1963 o sistema se relaxa, liberan a Mosen Beran, arcebispe de Praga y a comunistas victimas d'as purgas. En febrero de 1968 Alexander Dubcek fa que o partito comunista prenga un programa reformista “o camín de Checoslovaquia enta o socialismo”, que ye conoixito como a primavera de Praga. En chulio a URSS, a RDA, Polonia, Hongría y Bulgaria presionan a Checoslovaquia y os días 20-21 d'agosto a URSS invade Checoslovaquia, tornando a la situación inicial.

O 1 de chinero de 1969 Checoslovaquia esdevinió una republica federal formata por a Republica Socialista Checa y a Republica Socialista Eslovaca.

En 1989 se produce a revolución de terciopelo y o 17 de noviembre de 1989 una manisfestación d'estudiants ye reprimita. O día 30 de noviembre o partito comunista pierde o papel dirichent, o 9 d'aviento dimite Husak, o 29 d'aviento Václav Havel ye president d'a Republica.

A republica checa[editar | editar código]

Gnome-searchtool.svg
Ta más detalles, veyer l'articlo Republica Checaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].
Václav Havel, primer president d'a Republica Checa

En abril de 1990 Checoslovaquia esdevién una republica federativa checa y eslovaca, pero os nacionalistas eslovacos dimpués de ganar as esleccions de chunio de 1992 en Eslovaquia votan una declaración de sobiranía. Václav Havel dimite y os cabos de gubierno checo y eslovaco negocian a deseparación, confirmata por voto en l'asambleya federal de noviembre. A deseparación encomenzó l'1 de chinero de 1993.

Referencias[editar | editar código]

  1. 1,0 1,1 1,2 Gabriela Makowiecka y Estanislao Macowiecki: La Cultura Eslava Editora Nacional.

Bibliografía[editar | editar código]