Hansa

De Biquipedia
Ir ta: navego, busca
Rota comercial d'o Ligallo Hanseatico

A Hansa Teutonica u Ligallo Hanseatico estió una asociación de comerciants alemans que monopolizoron o comercio exterior d'Alemanya en a Edat Meya a traviés de l'eixe Bruches-Lübeck-Novgorod, por a Mar Baltica y Mar d'o Norte.

Antecedents[editar | editar código]

Os comerciants alemans s'heban refirmato en os prencipes d'o norte d'Alemanya, que los aduyoron a fundar Lübeck en 1159, negocioron un tractato con os habitants d'a isla de Gotland, on en 1161 establioron a factoría de Visby. En 1173 plegoron a un alcuerde con Suecia. A superioridat tecnica y unas millors condicions de navegabilidat y tonelache d'os baixels eliminoron a escape a competencia estranchera. Esta actividat comercial se refirmó en a expansión alemana enta l'este, que tenió como resultato a colonización y dominio d'o sud y este d'a Mar Baltica con a fundación de Riga, (1201) Rostock, (1218), Dorpat, (1224) Wismar, (1228) Tallinn, (1230) Stralsund, (1234) Stettin, Elbing (1237) y Danzig (1238). Tamién en a Mar d'o Norte, on comerciants de Colonia y Bremen dende muito enantes comerciaban con Anglaterra y Noruega, concurrioron comerciants de Westfalia, Saxonia y Mar Baltica, dende o sieglo XIII. Una vegata que eliminoron a competencia danesa con a batalla de Borhöved en 1227 as ciudatz y comerciants encomenzoron a asociar-sen.

Orichens[editar | editar código]

Establimiento de l'alianza entre Lübeck y Hamburgo en 1241

Lübeck y Hamburgo firmoron un alcuerde en 1241 que se considera l'orichen d'o Ligallo Hanseatico por estar seguito d'alcuerdes pareixitos con atras ciudatz. A lo prencipio a seu estió en Visby (Gotland), pero a meyatos d'o sieglo XIII o progresivo uso de documentos fació que os mercaders itinerants que gosaban aplegar-sen en Visby fuesen sustituitos por una dirección centralizata en as ciudatz d'o norte d'Alemanya. D'esta traza a primitiva asociación de comerciants esdevinió una confederación de ciudatz. Estas ciudatz obtenioron factorías privilechiatas permanents en Bruches, Novgorod, Bergen y Londres y con ixo monopolizoron o comercio en o Norte d'Europa.

Organización[editar | editar código]

A dirección central d'o ligallo pasó de feito a Lübeck, on periodicament dende 1356 celebroron as asambleyas d'a organización, que creyoron o reglamento y normas de caracter economico que heban de respetar os asociatos. A Hansa no disposaba d'autoridat chudicial y no alcordó o pago d'impuestos que en pocas ocasions. A las asambleyas chenerals concurriban os delegatos d'os consellos d'as ciudatz hanseaticas. A vegatas se celebraban asambleyas rechionals convocatas por bellas ciudatz. Plegoron a fer parte d'a Liga Hanseatica unas 90 ciudatz.

Función economica[editar | editar código]

Os comerciants d'a Hansa comerciaban con productos que exportaba Alemanya: a sal de Lüneburg, vin d'o Rhin, cerveza, cerials, y estimuloron a producción de cerials, satisfendo as necesidatz de Noruega y Europa Occidental. Os depositos comercials de Londres y Bruches serviban pa entrar en contacto con o comercio atlantico y mediterranio, d'a on preneban especias, sedas, panyos y lana, que cambiaban por productos d'Alemanya y países d'o norte y este como productos agrarios y pellizos. A suya actividat se basaba en as lumerosas colonias de comerciants alemans que bi heba en totz os países con os que manteneban relacions comercials. A Hansa teneba a lo suyo favor a posición cheografica, a meyo camín entre Europa Occidental y Oriental, o control d'o trafico entre a Mar Baltica y Mar d'o Norte. Tamién yeran importants as comunicacions con o norte enta Escocia y Bergen (on a Hansa montó as suyas industrias de peix salau), y enta Suecia (n'exportaban l'arambre y fierro).

Politica[editar | editar código]

Bi habió conflictos con Dinamarca y las ciudatz vendas. Bi habió problemas entre as villas de Livonia y as villas prusianas (Danzig). Manimenos as guerras civils escandinavas y la descomposición territorial d'os Países Baixos favoreixioron a suya politica. O ligallo de ciudatz teneba a pretensión de mantener u fer més grans os privilechios comercials en o estranchero. Pa conseguir estos obchectivos a vegatas recurriban a lo bloqueyo economico contra os países reticents, como se desvenió con exito contra Noruega en 1284 y contra Flandres en 1307-1309. Os daneses preboron de reducir os privilechios d'a Hansa y esto lis dio como resultato dos guerras, entre 1362-1370 y entre 1426 y 1435 con victoria d'as ciudatz alemanas. O poder cheopolitico d'a Hansa yera tan gran que en 1375 y 1438 decidió a succesión en a cadiera reyal de Dinamarca, y en 1397 fació posible a Unión de Kalmar. A Hansa prebó d'examplar l'ambito comercial enta l'ueste y esto li fació estar en guerra contra Castiella en 1419-1443. A competencia con os angleses y neerlandeses en a mar Baltica condució a enfrentamiento armato en 1469-1474 contra Anglaterra y en 1438-1441 contra os Países Baixos. En 1534-1535 Lübeck y bellas ciudatz vendas fuoron derrotatas por Dinamarca. En 1563-1570 a Hansa y os daneses facioron guerra contra Suecia, pero no podioron liberar d'o control sueco o suyo comercio con Rusia.

Decadencia[editar | editar código]

Encomenzó en o sieglo XV y se prolongó dica o sieglo XVII. Ya en a Edat Moderna os sobirans tendioron a favoreixer a competencia y o mercato nacional, o que mermó a posición privilechiata d'a Hansa. O esboldregamiento d'o poder teutón en Livonia y d'as ciudatz d'a Hansa que i heba enfeblió a posición d'a Hansa en a Mar Baltica. As nuevas rutas comercials d'orient ta occident a lo norte y a lo sud d'a zona hanseatica desvalorizoron a suya posición central.

Os holandeses dende o sieglo XV y os angleses dende o sieglo XVI teneban ya prou poder melitar pa permitir a os suyos comerciants dreitament con os productors de cerials en a Baltica. A competencia d'os foranos, que gracias a os descubrimientos cheograficos heban adquiesto grans capitals, crebantó ya de pa cutio a solidaridat d'o ligallo de ciudatz. Belunas d'as ciudatz d'a Hansa se'n salioron y conoixioron una floreiximiento més gran quan s'ubrioron a atros mercatos, pero atras como Lübeck y as ciudatz vendas querioron mantener a tota costa os privilechios d'a Hansa y periclitoron. A participación en as asambleyas se redució y a zaguera convocatoria estió en 1669. Dende alavez a Hansa estió representata por l'alianza de tres ciudatz: Lübeck, Hamburgo y Bremen.