Peirón (mitolochía)
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
- Iste articlo tracta sobre os peirons, sers mitolochicos maliciosos. Ta atros emplegos d'a palabra peirón, se veiga Peirón (desambigación).
Peirón u peirot (formas diminutivas de l'occitán <Pèire, «Pero») ye o nombre local mas común como se les diz, en o Pireneu aragonés, a uns sers mitolochicos propios de l'imachinario rural de buena cosa d'Europa, caracterizaus por cualques treitos definitorios, como a dificultat pa veyer-los (anque habitan en as casas, entre a chent), y as suyas accions que, seguntes a creyencia, tienen a finalidat d'empandullar y fer mas difícils as actividaz humanas.[1]
Anque un d'es rasgos mas definidors d'un peirón ye la malicia, no se les gosa atribuir sique accions con consecuencias menors, y os accidents graves u fatals quedan difuera d'o que tradicionalment s'ha relacionau con ellos. Normalment, o imachinario popular adchudica a l'actuación d'un peirón os incidents menors de a vida domestica, muitas vegadas os que tienen consecuencias divertidas u que fan redir. Por tot isto, bels autors veyen en ellos una personificación menor d'o Diaple u o «Maligno» (anque as suyas oríchens son segurament pre-cristianas), sin toz os poders que a ixe le s'atribuyen, y es meten en a categoría de «diaplerons» u diaples menors.
A descripción fisica mas a l'uso ye a d'un ser antropoide (con forma humana), pero de mida mas chica que a d'una persona promedio, o cual les facilitaría de fuir y amagar-se dimpués d'as suyas «barrabasadas». Normalment, no se troba consenso entre os informadors (receptors d'a cultura tradicional) sobre a mida exacta d'un peirón, anque en abunda las descripcions en as cuals se les describe como capaces de concaber-se en un caixón u en a panera d'a casa y, en contraste, tampoco ye improbable sentir de testimonios sobre uno que miraba d'amagar-se dezaga de bella cosa grandiza, como un mundo en a falsa, p. ex., y encara se le veyeba (o que daría una mida muito mas parellana con a d'una persona real). Normalment no se describen como sers con cuernos, coda u garra atro rasgo animal.
O nombre común d'istas creaturas varía d'un puesto ta atro en Aragón, anque o mito ye prou homochenio. A forma mas común en l'Alto Aragón ye «peirón» u mas a sobén a suya forma castellanizada «pedrón». A forma «peirot» ye propia de Chistau y a val de Tella. En o Museu de Sarrablo, en Samianigo, i hai un recolón adedicau a istos sers mitolochicos con cualques explicacions sobre o suyo mito y cómo se ye amortando por a decadencia d'a cultura tradicional. A Ronda de Boltaña tiene una canción, «Pedrón», basada en o personache d'o Museu de Sarrablo. A canción «O Peirot» de La Orquestina del Fabirol parla sobre un personache mayoritariament humano, anque amuestra cualques rasgos (especialment as barrabasadas) mas propios d'un peirón.
Se veiga tamién
[editar | modificar o codigo]Referencias
[editar | modificar o codigo]- ↑ (es) José Miguel Navarro López Diccionario de signos, símbolos y personajes míticos y legendarios del Pirineo aragonés, Prames, 2018, ISBN 978-84-8321-889-1, p.193
| Control d'autoridaz |
|
|---|
Datos: Q25620055