Lynx pardinus

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Lynx pardinus
Cerval iberico (Lynx pardinus)
Denominacions populars
Cerval, cerval iberico, linz iberico, lince iberico, gato cerval iberico
Estau de conservación

En periglo (IUCN)
Clasificación cientifica
Eukaryota
Animalia
Chordata
Mammalia
Carnivora
Feliformia
Felidae
Felinae
Lynx
Lynx pardinus
Descripción
Lynx pardinus
Temminck, 1827
Distribución cheografica
Poblacions documentadas de Lynx pardinus en 2003.

O cerval iberico (cientificament Lynx pardinus (Temminck, 1827)), conoixiu tamién con o nombre popular de lince iberico, ye un mamifero carnivoro d'a familia d'os felidos y subfamilia d'os felins.

Ye un endemismo d'a Peninsula Iberica y una especie en periglo d'extinción, y anque fa parte d'o chenero Lynx con atras especies, a suya chenetica molecular ha contrimostrau que o suyo linache se ye deseparau contra la resta d'especies de Lynx enantes que as de demés.

Caracteristicas[editar | modificar o codigo]

O cerval iberico ye mas chicot que atras especies de Lynx, resultando a especie mas menuda d'o chenero. Estudios detallaus han situau o suyo peso promedio en aproximadament a metat que o cerval eurasiatico.[1] Os masclos adultos pesan arredol de 12,8 kg y as fembras 9,3 kg, con un peso maximo en a especie de 20 kg.[1]

O suyo pelache ye pardo u griso, con piquetas negras abundants y chicorronas. No n'i hai con ocelos ni rayas. A coloración cheneral ye mas fusca que en atras especies de Lynx, y se corresponde millor con as colors naturals d'a vechetación mediterrania.

A coda ye curta, de bels 10 cm, y remata con una especie de borra negra. Como en toz os felins a suya posición y movimientos expresa estaus d'animo de l'animal.

Como toz os Lynx, tienen una barba arredol d'as galtas y a cara que os expertos denominan «patillas» (camaretas). En o cerval iberico ixas «camaretas» son mas grans que en atros cervals, respectibe a o rostro, y son especialment visibles en os masclos adultos. Son un indicador de madureza, pus i amaneixen a partir de l'anyada de vida.

As orellas rematan con un «pincel» de pels negros que, como con as camaretas pasa, tamién ye mas largo que en atros linces. En chunto con a barba, os expertos creyen que os pincels contribuyen a difuminar o contorno d'a cara de l'animal contra la vechetación, fendo-le mas fácil de camuflar-se-ie.

O cerval iberico ye un cazador especializau en atrapar conillos. A la contra de como os atros Lynx, o iberico pende fuertement d'as poblacions d'ixes animals, porque fan a mayor parte d'a suya dieta con diferencia, razón por a cual se vido intensament afectau por o declive d'os conillos asociau con as epidemias de mixomatosi d'os anyos 1980 y 1990.

Distribución y población[editar | modificar o codigo]

O cerval iberico habita preferentement en espacios semi-ubiertos, como defesas y praus con arbolau, y caza preferiblement entre a hierba altera y os matullars. No ye una especie forestal, como sí que en son atros linces, pero tampó no habita en grans extensions de campo laso ni agricolas. Por ista razón ha estau siempre mas abundant, probablement, en as rechions d'o sud y sudueste d'a Peninsula Iberica, en zonas de baixa densidat de población humana.

Dende fa anyos, se creyeba que en un pasau no guaire remoto podeba haber habitau tamién en o norte d'a Cordelera Cantabrica y ser arribau dica o Pirineu por l'este (a suya presencia en Castiella y Leyón dica las zaguerías d'os 70 ye documentada).[2] Manimenos, un estudio arqueolochico de diferents esqueletos trobaus en una espluga en Navarra confirmó en 2007 que, lo menos en o Pirineu, os cervals que a memoria popular nombra no fan parte d'a especie iberica en realidat, sino de a europea.[2]

Posible distribución d'o cerval iberico (Lynx pardinus) arredol de 1980.

Pa las sierras cantabricas a discusión yera mas compleixa, pus no se'n heba trobau garra resta. Como tamién pasa en o Pirineu, a chent d'o país en o Cantabrico tamién conta historias sobre a presencia de cervals[2] relativament recient. A presencia segura de cervals ibericos en a vecina provincia de Leyón dica fa pocos anyos impulsó a naturalistas asturianos a afirma que os linces que heban habitau en o Cantabrico tamién perteneceban a la especie Lynx pardinus.[2] Miguel Delibes, director d'a Estación Biolochica de Doñana buena cosa d'anyos y experto en o cerval iberico, siempre heba considerau poco probable que Lynx pardinus hese habitau tan en norte, principalment por a dependencia d'a especie con os conillos.[2] Finalment, o descubrimiento de restas osias en chacimientos en Asturias lievó a que cientificos d'a Universidat d'Oviedo concluisen, en 2015, que os cervals d'a Cingla Cantabrica no heban estau nunca cervals ibericos, sino Lynx lynx.[3] A cuestión de si as dos especies han coexistiu nunca, o si por contra siempre han esleiu habitats diferents queda pendient de resolución.[2]

O lince iberico ha sufierto a suya mayor recesión demografica, con toda probabilidat, mientres as zagueras cuatre decadas d'o sieglo XX.[4] Cientificos como Miguel Delibes creyen que, si bien nunca no habría estau un animal especialment abundant, podeba tener una distribución asociada a es habitats que utiliza y astí a on que i hese conillos, arribando dica la Mediterrania por l'este. A suya gran dependencia con o conillo ye o suyo principal punto feble, pus iste lagomorfo fizo pestes en l'agricultura por tot Europa dende o sieglo XIX, en paralelo con a gran explosión demografica humana de a Revolución Industrial, que fizo retacular as poblacions de toz os suyos predadors naturals.

En 1952, o Ministerio de Sanidat de Francia introdució a mixomatosi en as poblacions de conillos montesins, que a par d'alavez causaban desferras en a cullitas d'ixe país, o que provocó una caíta precipitada d'as poblacions de conillos en Francia (s'estima que arredol d'o 90% en as dos anyadas siguients) pero l'alta taxa de contachio de o virus que la causa fizo que a malotía s'espardise incontroladament por atros países europeus.

Cerval iberico atrapando una cotorniz, presa poco frecuent porque s'alimenta basicament de conillos.

Anque no se sabe con exactitut en qué proporción cayón as poblacions d'ista presa d'o cerval en Espanya y Portugal, o declive debió estar ferioso. Ya en 1963, Valverde advirtió que quedaban nomás cuatro nuclios seguros a on que o Lynx pardinus s'estase reproducindo[4] sin que podese tener constancia de si encara en quedaba en os nuclios d'o Prepirineu aragonés, Catalunya y os Puertos de Beceit entre atros. A protección legal de Lynx pardinus data de 1966.

Delibes considera que a mayoría de poblacions menors debeban haber desapareixiu a consecuencia d'o declive d'as poblacions de conillos ya en zaguerías d'os anyos 1970,[4] y da como anecdota as contumacias que pasó Félix Rodríguez de la Fuente pa trobar-ne cuan rodaba El Hombre y la Tierra, en 1974, que tenió que obtener cuatre eixemplars en os Montes de Toledo pa poder fer a secuencia que en primeras se pensaba de fer en Extremadura, porque no en i trobó uno.[4]

En a decada d'os 80 se fan diferents estudios mirando de delimitar l'aria de distribución d'a especie, con una conclusión terrible: en 1990, en queda en 48 nuclios chicorrons agrupaus en 9 poblacions inconnexas entre si, y nomás as poblacions de Doñana y a sierra d'Andújar (Chaén) tienen viabilidat reproductiva.[4] Isto gosa significar que a especie ye en as puertas d'a extinción. Paralelament, entre 1978 y 1988, se tiene constancia de 356 muertes de linces en Espanya penando que estasen protechius, a mayoría feitas por furtivos.[4] En Portugal se pierde a traza d'o eixemplar zaguero en 1992.[4]

En 2004 s'expublica o estudio elaborau con os metodos expermientals mas precisos dica ixe inte. Guzmán y colaboradors han recensau os linces entre 2000 y 2003, mirando-se d'evitar os metodos d'enquesta a cazataires y ganaders que heban seguiu predecesors suyos, y contando poco con as replegas de pisadas y excrementos, y basando-se mas por contra en l'analís chenetica d'es excrementos replegaus (a sobén, si no s'analizan, puede trafucar-se os excrementos d'una especie y unatra) y as foto-trampas.[4] En iste treballo amaneix por primer vagada datos positivos: quedaban bels 160 cervals ibericos, toz en Andalucía, deseparaus en dos poblacions estables en Doñana y Sierra Morena, con un aria de distribución confiable de 500 km2.[4]

A población de Lynx pardinus pasa t'alto de 400 eixemplars por primer vegada en 2015,[4] con as dos poblacions estables que ya describión Guzman y o suyo equipo 13 anyos antes, y un incremento d'animals en estau salvache (rescataus y tamién naixius en captividat) en os nuclios de Doñana y Sierra Morena.[4]

Historia evolutiva[editar | modificar o codigo]

En cheneral, se considera que a especie Lynx pardinus comparte un antepasau común con Lynx lynx, o lince común eurasiatico, y no pas que sía descendient d'ixa atra especie, como fa uns anyos se podeba leyer en cualques publicacions.

L'abundancia de fosils adscritos a Lynx issiodorensis que s'ha trobau sía en chacimientos d'a Peninsula Iberica sía en atros puestos d'Europa, en chunto con o feito que muitos d'es ibericos se troban mas que mas en arias que se considera u podría considerar de distribución historica d'o cerval hispanico, fa pensar que ixa especie pueda estar l'antepasau común de todas dos. A escisión entre os dos linaches evolutivos s'habría produciu fa arredol d'un millón ciento-hueitanta mil anyos.[3]

Bellas imáchens[editar | modificar o codigo]

Se veiga tamién[editar | modificar o codigo]

Referencias[editar | modificar o codigo]

  1. 1,0 1,1 (es) AULAGNIER et Alt. Guía de los mamíferos de Europa, Norte de África y de Oriente Medio. Lynx edicions. Barcelona, 2009. ISBN 978-84-96553-52-1
  2. 2,0 2,1 2,2 2,3 2,4 2,5 (es) El lobo cerval (lince boreal) en Asturias, consultau o 20 de marzo de 2017.
  3. 3,0 3,1 (es) El enigmático animal avistado hasta hace un siglo en el norte de España era el lince euroasiático, consultau o 20 de marzo de 2017.
  4. 4,00 4,01 4,02 4,03 4,04 4,05 4,06 4,07 4,08 4,09 4,10 (es) Distribución histórica y actual del lince ibérico.

Vinclos externos[editar | modificar o codigo]