Felidae

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Iste articlo tracta sobre a familia Felidae, animals a os qui se les diz a sobén «felins» popularment. Pa una desambigación d'o termin «felino», se veiga Felino (desambigación).

Felidae
Diferents especies de felidos.
Denominacions populars
Felidos
Rechistro fósil	Dende l'Oligoceno
Clasificación scientifica
Dominio:	Eukaryota
Reino:	Animalia
Filo:	Chordata
Clase:	Mammalia
Orden:	Carnivora
Suborden:	Feliformia
Familia:	Felidae
Descripción
Felidae G. FISCHER, 1817

Os felidos (con pronunciación plana en aragonés) u scientificament Felidae (en latín) son una familia d'animals mamiferos placentarios en a orden Carnivora, caracterizaus principalment por as suyas zarpas con unglas retractils y por a suya dieta quasi exclusivament carnivora.

A mayoría de felidos tienen cuerpos esbeltos, con a capeza poderosa, coda larga y as patas fuertes. Tienen una gran potencia muscular, superior a la d'atros carnivoros en relación a o peso, proporcionada por uns tendons firmes y con estructuras d'unión osteo-tendinosas más eficaces que en o común d'os mamiferos. Todas as especies s'han especializau d'una manera u unatra en expleitar ista caracteristica pa los suyos costumbres depredadors, sía por a fuerza bruta, sía por una más gran velocidat u por una achilidat superiors.

As diferents especies de felidos se troban distribuidas por quasi totz os ambients terrestres de o Planeta, sacando l'Antarctida, Oceanía y qualques islas a on que no han colonizau

Clasificación

As especies vivients d'a familia Felidae se clasifican, a la suya vegada, en dos grans subfamilias: Pantherinae, os panterins y Felinae, os felins propiament ditos. Pantherinae no concabe si que dos cheneros encá vivos; Panthera, con especies tan conoixidas como o tigre, o lión, o yaguar y o leopardo, todas de gran mida, y Neofelis (as ditas «panteras nebulosas»), mientres que a resta d'especies de felidos perteneixen a o linache evolutivo d'os Felinae, con diferents cheneros y innumerables especies.

Se'n considera antiparte dos subfamilias extinctas, d'as que se'n conoix nomás que eixemplars fósils; Machairodontinae, os macairodontins (que englobaría os animals que a chent conoix popularment como «felidos de dients de sabre»), ausididos encá en a Prehistoria humana, y Proailurinae, os proailurins, un grupo de protofelidos antigos alazetaus en una sola especie fósil descrita, de fa bells 25 millons d'anyos, lur filiación como miembros d'a familia u antepasaus d'ella podría estar disputada.

En o vocabulario popular, a parola «felino» se fa servir muitas vegadas pa referir-se a toda a familia Felidae, mesmo emplegando-se en expresions como «Grans Felins» (que se gosa referir, alto u baixo, a ixas especies que a zoolochía considera en a subfamilia d'os panterins), conceptos que no tienen valideza scientifica. Dende o punto d'envista d'a zoolochía, o termino «felino» no fa referencia si que a una subfamilia muit concreta en iste grupo, por a qual cosa tiene un uso bien diferent de lo popular, y en garra caso s'accepta aplicau tamién con as especies de Pantherina. Como eixemplo grafico d'isto, scientificament puede dicir-se que un gato ye un felino, pero no pas un lión u un tigre, que son panterins.

Subfamilia Pantherinae - panterins

As zarpas con unglas retractils son una d'as innovacions evolutivas y caracterisiticas principals d'a familia Felidae. En ista imachen, a zarpa d'un puma (Puma concolor).

• Chenero Neofelis
• Chenero Panthera

Subfamilia Felinae - felins

• Chenero Acinonyx - Os guepardos.
• Chenero Caracal - Os caracals.
• Chenero Catopuma
• Chenero Felis - A mayoría de felins a os que se diría popularment gatos.
• Chenero Leopardus - Que concabe a l'ocelot y a o gato margay d'America.
• Chenero Leptailurus - O serval, un felino muit particular d'Africa, lur nombre ye relacionau sólo que etimolochicament con os cervals d'Europa, Asia y America.
• Chenero Lynx - Os cervals propiament ditos.
• Chenero Otocolobus - O gato manul, d'Asia central.
• Chenero Pardofelis
• Chenero Puma - Que tiene o puma, o más granizo d'os felins propiament ditos, y o yaguarondi.

Enlaces externos

• Se veigan as imachens de Commons sobre Felidae.
• Wikispecies tiene un articlo sobre Felidae.