Ardea cinerea

De Biquipedia
Ir a la navegación Ir a la búsqueda
Pa atros usos de «garrapescaire» se veiga Garrapescaire (desambigación), y pa «bernapescaire» se veiga Bernapescaire (desambigación).
Ardea cinerea
Ardea cinerea - Pak Thale.jpg
Garrapescaire Ardea cinerea.
Denominacions populars
Garrapescaire, pescatera, pescataire, garrapescataire, bernapescaire
Estato de conservación
Status iucn2.3 LC.svg
Seguro (IUCN)
Clasificación scientifica
Dominio:
Eukaryota
Reino:
Animalia
Filo:
Chordata
Clase:
Aves
Orden:
Pelecaniformes
Familia:
Ardeidae
Chenero:
Ardea
Especie:
Ardea cinerea
Descripción
Ardea cinerea
L., 1758
Distribución cheografica
Ardea cinerea map.png
Distribución: Verde fusco: Resident.
Verde clara: Estival
Azul: Invernadera

O garrapescaire (en Cinca Meya, Litera, Semontano, Sobrarbe y Ribagorza),[1] pescataire (en Chacetania),[1] u pescatera en as provincias de Zaragoza y Teruel[1] (nombre scientifico: Ardea cinerea L., 1858), ye una au chancuda de l'orden d'as pelecaniformes y a familia d'as ardeidas. Ye una au migradera u resident seguntes os puestos y vive cerca de l'augua en buena cosa d'as rechions de clima temperau d'Europa y d'Asia y tamién en o sud d'Africa.

Descripción[editar | editar código]

O garrapescaire ye una au de mida gran, que por regular fa entre 90 y 98 cm d'alto.[2] Fino y esbelto, pesca a la guait por o que gosa mover-se con movimientos lentos y que aparentan estar a saber qué calculaus, y se pasa buens ratos quieto de tot. De regular os masclos son bella miquina más grans que as fembras.[2]

Tiene as patas largas (au chancuda) bien feitas pa caminar por as orillas y o bardo, con as zarpas heterodactilas y de didos largos, que no son palmadas. No ye una au nadadera, y no gosa ficar-se enta l'augua si que t'an que o liquido le arriba ta las ancas a lo más.

O cuello el tiene larguismo, si fa u no fa d'igual mesura que o cuerpo, y puede estirar-lo t'alto u t'adebant pa espigotiar, u bien replegar-lo ta dezaga a voluntat. Quan vuela el mete asina ta dezaga, en una posición que ye caracteristica de volar en a familia d'as ardeidas.

O pico nomás tiene os dos labios amariellos en os adultos, entre que os chovens guardan o labio superior griso u fusco dica arribar en a madurez. A forma ye larga y punchuda, que s'ha descrito como «tipo daga».[2]

A color d'as plumas en cheneral ye grisa, más fusca por as partes d'alto que por debaixo, y os adultos sexualment maduros tienen a cara y a cabeza más blanca pero con dos faixas («cellas») negras, alto d'os uellos, que rematan con dos plumas negras que se prolarga y pinchan por dezaga d'a cabeza. L'adchetivo scientifico «cinerea» fa referencia a ixa color caracteristica suya y significa «cenisosa» en latín.

Habitat y nidificación[editar | editar código]

O garrapescaire gosa amaneixer por as riberas de ríos y en lagunas y atros humedals. Ye un animal a saber qué ligau con l'augua y a diferencia d'atras aus chancudas como a cigüenya, costa de trobar leixos d'ixe elemento.

As parellas de garrapescaire fan o niedo en os árbols de ribera, con carrizos y brenquetas que porteya o masclo pero apila la fembra.[2] Normalment a parella fan o niedo solos pos no forman colonias como atras ardeidas más chicorronas (garretas y martinetz) sino que s'estiman más de nidificar en solitario. Os masclos se tornan territorials quan s'aprestan pa emparellar-se.[2]

A fembra mete una cobada d'entre tres y cinco uevos de cascla blanca que cobarán totz dos pais arredol de vinticinco días.[2] Os pollos comienzan a revolar-se de camín ta las seis semanas de vida, y deixan o niedo pa la sietena u ueitena.[2]

En Aragón a especie ye present tot l'anyo, pero no s'ha trobau que se reproduzca si que en quatro puestos contaus: en as riberas d'o río Ebro y en a Laguna de Sarinyena.[2]

Imáchens[editar | editar código]

Zoonimia[editar | editar código]

O nombre común «garrapescaire» pareix que ye o más común en l'Alto Aragón, con citas abundants en Sobrarbe, Semontano de Balbastro, Cinca Meya, Ribagorza y Litera. O nombre «pescataire» amaneix como más propio d'o norueste d'a Provincia de Uesca.[1] A parabla «pescatera» ye citada en a provincia de Zaragoza y en a de Teruel.[1]

En Castillón de Sos (Val de Benás) se documenta tamién o nombre «bernapescaire», y en Veranui (val d'Isabana) «bernat» y «bernat pescaire»,[1] coherents con a denominación que predomina en catalán. En Erisué (val de Benás) s'ha trobau tamién a forma «pescamartín»[1] que igual como «bernapescaire» pueden emplegar-se tamién en ixa val pa nombrar o martín pescador.

Referencias[editar | editar código]

  1. 1,0 1,1 1,2 1,3 1,4 1,5 1,6 VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza, 2004. ISBN 978-84-8986-235-7
  2. 2,0 2,1 2,2 2,3 2,4 2,5 2,6 2,7 BLASCO ZUMETA, Javier, Guía de Aves de Aragón; PRAMES Ediciones. Zaragoza, 2014. ISBN 978-84-8321-423-7

Vinclos externos[editar | editar código]