Arasiella

De Biquipedia
Ir a la navegación Ir a la búsqueda
Arasiella
Despoblau d'Aragón
Pardina d'Arasiella.JPG
Entidat
 • País
 • Provincia
 • Comarca
 • Municipio
Despoblau
Flag of Aragon.svg Aragón
Flag of Huesca (province).svg Uesca
Alto Galligo
Samianigo
Población
 • Total

0 hab. (2019)
Altaria 857 m.
Codigo postal 22600
Coordenadas 42°26’ 10’’N 0°21’31’’U
Arasiella en Aragón
Arasiella
Arasiella
Situación d'Arasiella en Aragón

Arasiella (en castellán Arasilla) ye un lugar aragonés d'a provincia de Uesca, situau en o municipio de Samianigo, en a comarca de l'Alto Galligo.

Cheografía[editar | modificar o codigo]

A localidat d'Arasiella se troba situada en un tozal a 857 metros d'altaria sobre o libel d'a mar. Consta de dos edificacions prencipals con atras más chicotas anexas en as que se troban bells grafitti feitos por milicians antifaixistas mientres a Guerra Civil Espanyola con as sieglas UGT, CNT y UHP asinas como falces y martiellos.

A l'este d'as casas se troba a suya ilesia romanica adedicada a Sant Chaime y actualment en ruinas. Compuesta por una nau rectangular d'abside semicerclar en o que s'ubre una finestra. O perimetro de l'abside yera recorriu por un aixedrezau ya desapareixiu. Bellas decoracions d'o suyo tellau fuoron recuperadas y se troban en o Museu d'Artes de Sarrablo. En l'actualidat nomás y queda 1 metro de muro, ya que a resta se desmontó pa emplegar-se en a Guerra Civil como barracalas.

Bi ha tamién a l'ueste d'a ilesia as restas d'o que habió d'estar un torretón de planta octogonal que dominaba buena parti d'o curso meyo d'o Galligo. Tien un diametro d'alto u baixo 5 metros, con dos dentradas paralelas orientadas enta l'este. Actualment nomás i queda a parti baixa d'os muros, con una altaria d'entre 50 cm y 1,50 cm.

Toponimia[editar | modificar o codigo]

L'orichen d'iste toponimo podría estar a radiz prerromana ARA, con o significau de piedra u de corrient d'agua con o sufixo diminutivo -iella, u bien d'o vascón ARRA (ARRI) piedra.

Apareixe en as fuents como Arasiella (1035-1070), ¿Larresiella? (1086), ¿Arrasella? (1270), Arasiellya (1405), Arassiella, Arassella, Arasella, Ariasiallya y Laraselle.[1]

Historia[editar | modificar o codigo]

Apareixe en quantos decumentos d'o Cartulario de Fanlo, asinas por eixemplo en una compra feita por l'abat Banzo en Grasa, entre os anyos 1035 y 1070, ya se diz que actuó como testigo López Inyigones de "Arasiella" (doc. 56). En l'anyo 1064, Galindo Inyigones a y suya muller, Urraca, ceden quantas fincas sitas en "Arasiella" a o monesterio de Fanlo (doc. 37).

Atro decumento de l'anyo 1086, recenta a crompa de l'abat Ximeno en "Arasiella" de dos mallolos (vinyas recient plantadas) en dos campos ditos Padules y Capanniella a Ínyigo Banzones por un pre de diez cafices de trigo y vente sueldos, asinas como una vinya por seis cafices de trigo y cinco diners. Pa sellar l'alcuerdo se fació una lifara con totz os habitants de "Arasiella". En o mesmo decumento apareixe a referencia a la crompa d'una viga de tillare (tillera probablement) a Atón Bita de Arasiella (doc. 82).

En l'anyo 1150 bi ha decumentación d'un alcuerdo entre García Ximenones de Grostán y Fortún de Mont Aragón a on se nombra a García Sanz de Arasiella (doc. 117). En o zaguer decumento d'o dito Cartulario, con calendata de 1270, apareixe una casa d'"Arrasella" (doc. 172).

Dimpués de que o rei Pero I d'Aragón conquerise a ciudat de Uesca en 1096 muitos montanyeses baixoron ta tierra plana buscando una millor forma de vida. D'entre ellos se conoixe a Chuan d'Arasiella y a suya muller, Guillerma, residents en 1197 en Almunient.

Cal mencionar tamién que a ilesia d'Arasiella pagó, chunto con a d'Ipiés, a cantidat de 10 sueldos pa as obras d'a seu de Santa María de Uesca. A población d'iste lugar nunca no habió d'estar mayor d'os quatre fuegos rechistraus en o sieglo XV.

Referencias[editar | modificar o codigo]

  1. (es) Geografía medieval de Serrablo. José Miguel Navarro López. Colección «A Lazena de yaya», 15. ISBN 84-8127-104-7

Vinclos externos[editar | modificar o codigo]


Lugars d'o municipio de Samianigo
Poblaus: Acumuer | Aineto | Allué | Arguisal | Arraso | Arto | Artosiella | Aurín | Bara | Baranguá | Belarra | Bentué de Nocito | Borrés | Camparés | Cartirana | Castiello de Guarga | Castiello de Lerés | Chesera | Chillué | Grasa | A Guarta | L'Hostal d'Ipiés | Ibor | Ipiés | Isín | Isún de Basa | Larrede | Larrés | Lasaosa | Lasieso | Latas | Latrás | Layés | O Molín de Villobas | A Nau | Ordavés | Orna de Galligo | Osán | Pardiniella | Rapún | Samianigo | Samianigo Alto | Samianigo Baixo | Sant Isteban de Guarga | Sant Román de Basa | Sardás | Sasal | Satué | Senegüé | Solaniella | Sorripas | Usé | Yespola | Zresola
Despoblaus: Abiniella | Abellada | Alavés | Arasiella | Arruaba | Asqués | Asún | Ataguás | Atós Alto | Atós Baixo | Ayés | Azpe | Bail | Baranguá Viello | Bescós de Sarrablo | Binueste | Bolás | Canyardo | Fablo | Fenillosa | Ibirque | O Molín d'Escartín | Pardina de Fanlo | Puent de Fanlo | Sandiás | Secrún | Sierrahún | A Torre | Villacampa | Villobas | Xabarrella