Passer domesticus

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Passer domesticus
Masclo de Passer domesticus
Denominacions populars
Gurrión , gorrión, gurrión de canalera , gurrión de retejera, pardal, torodán
Estau de conservación
Seguro (IUCN)
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Aves
Orden:	Passeriformes
Familia:	Passeridae
Chenero:	Passer
Especie:	P. domesticus
Descripción
Passer domesticus L., 1758
Distribución cheografica
Distribución de P. domesticus. Verde fusco = autoctono. Verde claro = introduciu.

O gurrión (Passer domesticus L., 1758) ye un au paseriforme (un paixaro) de a familia Passeridae, de a cual en ye a especie tipo, natural d'Eurasia y bels enclaus en a costa mediterrania africana, amplament distribuida en os cinco continents como consecuencia d'haber estau introducida por l'hombre.

Descripción

O gurrión fa d'entre 13 y 18 cm de lonchitut, dende a punta d'o pico dica la coda, con una lonchitut tipica de bels 16 cm. Tiene un aspecto mas robusto que belatras paseriformes, con as patas fuertes y o pico conico y poderoso, de color mas fusco-musco en os masclos adultos, mientres que ye de color clara u carne en as fembras y en os chóvens. Pesa d'entre 27 y 40 gramos.

O plumache ye de color marrón, con a napa d'as alas de color mas viva que a resta d'o cuerpo y con piquetas negras, y a reversa de color grisenca. Os masclos, ademés, tienen una faixa grisa que les ocupa a parte superior de a cabeza, y una barba negra que les baixa por o papo y s'extendilla por a base d'o pico y a redol d'os uellos.

As alas son curtas y robustas, y cuan vola as bate a intervalos -caracteristica prou comuna d'entre as paseriformes-. S'alimenta principalment de simients, pero s'ha tornau una especie comensal con o ser humano y oportunista, de traza que no ye raro veyer-la alimentar-se con prenso ta os ganaus, restas de l'alimentación humana u belatros productos de refús en as arias humanizadas.

Nidificación

Os gurrions son aus tipicas de zonas humanizadas y, en estando tan frecuents en as villas y lugars, se'n troba pocos en a naturaleza. Manimenos, precisament por ista preferencia suya, meten os niedos en os puestos humanizaus (y encara en as viviendas), por o que no ye mica raro tener-ne en bel forato en a casa u debaixo un volader en o lenau.

Os gurrions son conoixius por a pidoliera que fan cuan son en a epoca reproductiva, que gosa comenzar en febrero u marzo y se prolarga dica setiembre. En tot iste tiempo, pueden apuyar cualques cobadas, que gosan estar d'entre 3 y 6 polletz.

Sobre a rudiosa nidificación de os gurrions, existe un dito que relaciona o prencipio de l'actividat reproductora d'istes animals con l'arribada de a primavera:

En pasar a Candelera, os gurrions en a canalera.

Imáchens

• 
  Fembra.
• 
  Masclo y fembra copulando.
• 
  Volido.
• 
  Detalle d'o papo negro d'un masclo.
• 
  Cobada.
• 
  Os gurrions son oportunistas y a sobén aprofitan os niedos de belatras aus ta nidificar. En iste caso, un niedo de golandrinas.

Vinclos externos

• Wikispecies tiene un articlo sobre Passer domesticus.
• Se veigan as imáchens de Commons sobre o gurrión.