Papo

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Ista pachina tracta sobre o papo como parte anatomica de bellas especies animals. Ta la deformación patolochica causata per a hipertrofia d'a glandula tiroides en os humans, se veiga Papo (patolochía).
Un pichón de paloma con o papo de color blanca.

O papo[1] ye una bolsa membranosa en o esofago de bels animals, superior a lo estomago en a suya posición, que con a suya capacidat ta ixamplar-se permit que se i magaceme l'alimento d'antes no se lo faiga pasar ta o estomago en do se dichiere. En as aus, o papo cumple a función de magacemar l'alimento dando-le humedat y estovando-lo como forma ta preparar-lo ta la dichestión estomacal posterior.

En aragonés, o termín papo, anque propiament designa ista cambra alta en o tubo dichestivo de bels animals (especialment, en as aus), tamién per extensión s'emplega con frecuencia ta nombrar a rechión anatomica externa d'o cuerpo en a que se troba, refirendo la zona toracica superior que se gosa comprender d'entre os lemites d'o cuello per a part superior y lo peito per la inferior. En aragonés, a demás, o termín papo tamién ha gosau dar diferents expresions que s'aplican de forma informal en as personas, como o verbo «empapar» que significa minchar muito u con avideza, u «fer-se papo» que fa referencia a o exceso d'argüello d'una persona.

Referencias[editar | modificar o codigo]

  1. (an) Silbia Garcés Lardiés,Francho Rodés Orquín:Un borguil de parolas.Bocabulario dialeutal escolar, Gubierno d'Aragón, 2006, ISBN 84-689-7358-0, p.40

Se veiga tamién[editar | modificar o codigo]