Candelera

De Biquipedia
Ir ta: navego, busca
Presentación de Chesus en lo templo, quadro d'Andrea Mantegna (1465).

Fiesta cada anyo lo 2 de febrero, 40 días dimpués de Nadal, la Candelera vien de lo latín FESTA CANDELARUM.

Historia[editar | editar código]

En l'antiga Roma se feba una fiesta arredol de lo 15 de febrero dedicata a LUPERCUS, dios de la fecundidat y de los rabanyos.

Entre los celtas hi heba una fiesta dita Imbolc lo 1 de febrero en honor de la diosa Brichida, y celebraba la purificación y la fertilidat salindo de l'hibierno. La chent de lo campo levaban teders y dondeyaban en procesión pregando-li a la diosa que purificase la tierra enantes de sembrar.

En lo sieglo V lo papa Chelasio asoció este rito pagán de la "fiesta de las Candelas" con la presentación de Chesus en lo Templo y la purificación de la Virchen. D'esta traza la fiesta pagana perdió significato, cristianizando-se y la fiesta cristiana prenió forma, popularidat y contenito social. Seguntes lo Levita, un nino ha de ser presentato a lo sinyor por la suya madre quaranta días dimpués de la naixetura, con una ofrenda de dos palomas. Lo rito obserbato por la familia santa lo describen en lo evanchelio de Lucas.

Dentro de las ilesias se cambeyoron los teders por candelas venditas que fan que simbolicament lo mal se mantienga luent y fan recordar que Chesus ye la luz de lo mundo. Como la Hanukkah chodiga, que tamién ye una "fiesta de las luces", la fiesta dura ueito días. Los cristians asinas relacionaban las velas con la protección de lurs casas.

Ye n'este tiempo de l'anyata quan se fa la siembra d'hibierno. La farina que sobraba se feba servir pa fer crêpes u filloas, (talment tiengan relacion con esto los crespiellos en lo Semontano de Balbastro, que se minchan lo 25 de marzo quan la virchen crespillera). Estos dulces son simbolo de prosperidat pa l'anyata que ya heba encomenzato.

Pero dica 1372 esta fiesta no se consideró asociata a la purificación de la Virchen en lo oficial.

La Candelera en l'Alto Aragón[editar | editar código]

  • Las fiestas mayors en Salas Altas son entre lo 2 y lo 5 d'agosto en honor a la Virchen de la Candelera.
  • Lo 2 de febrero ye la feria de la Candelera en Balbastro.
  • En Muro de Bellós la candelera u 2 de febrero ye la fiesta menor de l'anyata.
  • En lo vico de las Cambras de Banastón tamién se celebra la Candelera.
  • La Candelera de Chistén ye descrita por Brian Mott en relación a lo baile y lo suyo lexico:
En la Candelera, las chicas sacan a bailar a los chicos. Los chicos y las chicas encargados de las fiestas se llaman mayordombres y mayordombras