Ala (zoolochía)

De Biquipedia
Ir a la navegación Ir a la búsqueda
Ista pachina tracta sobre as alas en zoolochía. Pa atros emplegos d'ala, se veiga Ala (desambigación).

As alas son as estremidatz d'os animals que s'emplega pa volar, presents en as aus, en os insectos y, entre os mamiferos, en os quiropteros. En un pasau remoto tamién en teneban os pterosaurios. En totz ixes grupos biolochicos tan diferents, a presencia d'alas ye un caso clasico de converchencia evolutiva.

Existe atros grupos d'animals que se gosan desplazar por l'aire, pero lo fan sin estar capables de fer-lo de traza autonoma, más bien planeyando. Os ditos animals tienen estructuras alternativas que fan a función de desplazamiento, como a piel (petachio) d'os mamiferos dermopters y bell radedor (como en os esquiruelos voladors), una mimbrana entre os didos (como en a rana voladera de Wallace) u una mimbrana de piel entre as costiellas (como en o fardacho Draco volans).

Insectos[editar | editar código]

Representación esquematizada d'o movimiento d'alas d'un insecto.

En os insectos, as alas dimanan d'expansions d'o tórax. Nomás i ha alas en os adultos (imagos), y en tienen de regular dos pars.

As alas d'os insectos son mimbranosas, con nervacions reticulars y más u menos abundants en función d'o taxon. Son transparents, pero tamién pueden estar de colors diferents y plegables u no, seguntes as deixen estendidas u no quan se posan. As caracteristicas d'as alas son un factor important en a taxonomía d'os insectos.

Bellas órdens d'insectos tienen alas particulars y ixo ye una d'as caracteristicas definideras d'o taxón en custión. Por eixemplo, os coleopters y os ortopters tienen o primer par d'alas enduriu, más tierco, o que les sirve pa guardar-ne o segundo debaixo. Iste par d'alas modificadas en istes animals recibe o nombre d'elitros.

Un atro eixemplo son os dipters. En os dipters, o segundo par d'alas ye reduciu a un apéndiz que se diz halterio y que ixes animals emplegan pa equilibrar-se entre o volido. As paixarelas y as palometas (que chuntas forman a orden Lepidoptera) tienen alas desproporcionadament grandes (mesas en comparanza con atras órdens) y que son cubiertas d'un polvo feto d'escratas finismas, imperceptibles a uello humano, que son as que le dan nombre: λεπίδος, lepídos ye escrata en griego.

Aus[editar | editar código]

Ala d'au, con os diferents grupos de plumas marcaus. 1. Remeras primarias, 2. Coberteras mayors, 3. Deflectoras, 4. Remeras secundarias, 5. Coberteras secundarias mayors, 6. Coberteras secundarias meyas, 7. Coberteras secundarias menors, 8. Remeras terciarias, 9-. Escapulars.

En as aus, son as estremidatz anteriors as que les fan volar y lievan as plumas, que se comportan como superficie sustentadera pa o volido.

As plumas remeras son plumas granizas, prolargadas y firmes, y son as que mayor importancia tienen en as aus pa volar. Combinan estar robustas con flexibles, por o que aportan valors principals que dimpués definen as caracteristcas de volido de l'animal. De feto, quan quiere privar-se que una au voladera vuele, como pasa entre a volalla d'un corral, en hai prou con tallar-les-ne (istas plumas, no pas l'ala), cosa que no les fa garra mal.

As remeras primarias, ixo ye, as que i ha en a ladera de l'ala, son as responsables d'a potencia de volido. Pa seguir o rumbo, l'animal puede ubrir y zarrar as que i tiene en a parte más estrimera. As remeras secundarias son más numerosas y de forma más regular, pero más chicas que as primarias, y se fienden menos en a carne. As secundarias intervienen menos con o volido, pero son necesarias pa dar-le buena sustentación; por ixo s'orientan a favor de l'aire.

As plumas d'as aus ofreixen una gran variedat de formas y colors. En i ha como os pingüinos, que en tienen curtetas y minusculas que no les sirven si que pa nadar, y tamién atras, como os kiwis (Apteryx) que tienen plumas primitivas y rudimentarias, con filamentos que aparentan estar pelos. En os estrucios y as gallinas, que son aus no voladeras, as alas son reducidas y sirven pa poco. Por contra, entre as aus que vuelan en i ha muit desenvolicadas, mesmo si entre ellas i ha diferencias importants; curtas y arronchadas entre as aus de volidos curtos, como os paixaros, pero tamién i ha alas grans entre as aus de volido largo y lento, como as grudas, as cigüenyas y os garrapescaires, y largas pero tamién estretas y punchudas entre as aus de volido largo y rapido, como as volandrinas, os albatros y as gaviotas.

Quiropters[editar | editar código]

Ala de muriciego con os didos sinyalaus.

Entre os muriciegos, as estremidatz anteriors y os didos fan de suporte pa una mimbrana de piel (petachio) que les permite o volido. Os quiropters son os solos mamiferos que vuelan (volido activo, no pas planeu).

L'ala d'os muriciegos ye por tanto homologa de la man humana ubierta y va cubierta de la dita mimbrana (petachio). Os quiropters tienen un volido lento pero muita maniobrabilidat.

Mitolochía[editar | editar código]

Mercurio amontando a Pegaso con alas.

Os antigos griegos le meteban alas a l'amor, a victoria y a atras virtutz y divinidatz que dimpuesas s'ha representau sin ellas. En son eixemplos: Minerva, Diana, Venus, etc.

En mutos molimentos antigos y principalment en os que se diz impropiament etruscos, as alas no son si que l'alegoría y representación d'a lechereza. Por ixa mesma razón, os poetas han meso alas a las sirpients de Ceres, a Pegaso, a os caballos de Pelops, a o carro de Triptolemo, a o rayo, o caducio, etc.

As alas mitolochicas pueden estar fixas u móbils. Entre ixas zagueras se cuenta as alas que Mercurio se cenyiba contra o petaso u chambergo, u contra las sandalias. As alas que lievan as personificacions de Victoria y as Erinias son ligadas contra o peto con cintas.

D'acuerdo con Platón, as alas son hieroglifico que reprsenta a intelichencia. Y as alas d'oro que Orfeu le da a lo primer fillo de Saturno serían, por tanto, un símbol d'a sabieza de l'alma d'o mundo d'acuerdo con as ideyas platonicas.[1]

Referencias[editar | editar código]

  1. (es) B. G. P. (1835). Diccionario universal de la mitología o de la fábula. José Taul.

Se veiga tamién[editar | editar código]

Vinclos externos[editar | editar código]