Ovis orientalis aries

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Articlo d'os 1000
Ovis orientalis aries
O. orientalis aries, raza churra tensina.
Denominacions populars
Uella, ovella, borrega, cordera
Estau de conservación

Seguro (IUCN)
Clasificación cientifica
Eukaryota
Animalia
Chordata
Mammalia
Artiodactyla
Bovidae
Caprinae
Ovis
Ovis orientalis
O. orientalis aries
Descripción
Ovis orientalis aries
L., 1758

A uella[1][2][3][4][5][6] (pronunciau /'gweʎa/~/'gwɛʎa/) u ovella[2][7], d'o latín <*OVIC'LA <OVICULA[8], (Nombre cientifico: Ovis orientalis aries[9] (L., 1758)), ye un mamifero artiodactilo herbivoro y domestico de a familia d'os bovidos y subfamilia d'os caprins, concretament una subespecie domesticada d'o muflón[9].

Ye uno d'os mamiferos que mas tiempo fa que son domesticaus ta fines agricolas, se cria prencipalmente por a suya lana, carne y leit y ye estendillata por tot o mundo estando muito important ta muitas civilizacions mientres a historia d'a humanidat. Por a suya importancia historica amaneixen en mitos, falordias y en relichions, estando un animal de sacrificio en belunas d'ellas.

En l'anyo 2014 bi heba mas de 1.200 milions de cabezas en tot o mundo, os tres productors mes importants yeran China con mas de 200 milions, Australia con 72 y la India con 63.

Descripción[editar | modificar o codigo]

A uella ye un animal ungulau d'entre 25 y 40 kg en as fembras adultas (os masclos gosan pasar t'alto d'os 50 kg) con o cuerpo cubierto de lana. A color de a lana ye blanca de normal, pero existe eixemplars melanicos que se diz uellas martas u pardas. A calidat d'a lana, mesmo que bels rasgos, varían con a raza y pueden fer-lo tamién con a edat.

Bellas razas tienen cuernos, que se dicen caracolas, mas frecuents y grans en os masclos. Belatras puede tener-ne u no, seguntes cada eixemplar y o sexo que tienga. Os eixemplars que en tienen se conoixen como caracolers.

As uellas s'agrupan de forma natural en rabanyos, costumbre que l'hombre ha aprofitau y potenciau en o proceso de domesticación d'a especie. Os rabanyos de dimensions minguadas reciben o nombre de trapadas, y os grupichons de pocos eixemplars estallos.

Oríchens[editar | modificar o codigo]

Cuan Carl von Linné describió a especie por a primer vegada, en Systema Naturae (1758), le dio un nombre especifico propio, Ovis aries, pus se pensaba que en yera. Manimenos, a comienzos d'o sieglo XXI s'ha puesto demostrar a continidat d'os diferents linaches cheneticos de uellas domesticas con os muflons (Ovis orientalis) que pueblan a cuenca mediterrania, contra os cuals no gosaría formar una especie diferent, sino que ye una subespecie.

A nomenclatura que actualment accepta la Comisión Internacional de Nomenclatura Zoolochica ye Ovis orientalis aries[9], y considera a la uella una subespecie cognata d' Ovis orientalis musimon, o muflón europeu (tamién rebaptizau), que tamién s'habría desalpartau de o linache d'Ovis orientalis orientalis, o muflón de Meyo Orient (subespecie que encara existe y que se considera antipasada de todas dos[9]), en tiempo pareixiu a cuan se domesticón as uellas[9]. O renombramiento d'a uella se troba en a Opinión 2027 d'a Comisión, en a que tamién se reculle os cambeos feitos en a nomenclatura cientifica de belatras subespecies domesticas que dimanan de salvachinas vivas.

As poblacions salvaches d'Ovis orientalis se troban en Orient Meyo. Actualment en queda poblacions reducidas que habitan en as montanyas d'o Kurdistán, d'entre Iraq y Turquía, pero se piensa que en un pasau no guaire remoto en pudo haber poblacions en cuasi todas as montanyas que diban dende Mesopotamia y l'antigo Creixent Fértil dica os Balcans y a Peninsula de Crimea, arredol de a Mar Negra. A domesticación d'os primers eixemplars d'Ovis orientalis que dion lugar a'l linache d'as uellas domesticas se debió producir bels 6.000 u 7.000 anyos antes de Cristo, en os actuals Irán y Iraq, o que converte a la uella domestica en un d'os mamiferos que mas tiempo fa que son domesticaus.

Razas[editar | modificar o codigo]

As uellas d'o tronco racial churro son de regular ganyotas.

En o mundo, con una cabanya de uellamen de mas de 1.200 millons de reses, existen mas de 800 razas de uellas reconoixidas. L'hombre ha creyau, por selección artificial, razas de formas, colors y caracteristicas fisicas muit diferents, bellas vegadas ta fer-las mas adaptables a las condicions d'os países a on que habita (desiertos, montanyas, tropicos, etc.).

En l'actualidat i ha razas que s'ha criau extensivament ta la producción d'alimentos, como a Texel (fa la mayor parte d'o uellamen en países como Australia u os Estaus Unius), una raza ta carne, y s'han tornau as mas numerosas internacionalment. En Espanya, os dos troncos racials principals son as churras y as merinas, de as que s'ha quitau razas subsidiarias. En Aragón bi ha ueito razas reconoixitas churra tensina, ojinegra de Teruel, rasa aragonesa, ansotana, cartera, maellana, roya bilbilitana u a chisqueta de o Sobrarbe y a Ribagorza.[10] Manimenos, a mayoría d'as uellas que en l'actualidat se puede gosar veyer en os lugars no son eixemplars puros ni de la uno ni de l'atro grupo, sino que son o producto de muitas decadas de tremescluz.

Zoonimia relacionada[editar | modificar o codigo]

En Aragón i ha muita tradición ganadera ovina, por o que s'ha formau un lexico relacionau con istos animals prou important.

Por sexo y edat[editar | modificar o codigo]

A cría d'a uella ye o corder u cordero.
  • O corder u cordero ye la cría, de forma chenerica. Tamién se diz borrego. Se'n distingue diferents estadios de creiximiento, principalment por os diferents usos y preus que gosa tener:
    • O caloyo ye o corder que plega de naixer y dica que tiene bels días.[2]
    • Ternasco u tarnasco ye como se conoix en os primers meses de vida, cuan encara depende de a leit de su mai[12]. No s'ha d'entivocar o corder ternasco con a Denominación d'Orichen protechida Ternasco d'Aragón, con a que s'etiqueta o 88% d'as canals de corder que se sacrifica en Aragón[12].
    • O pastenco ye un corder chovenón que ya s'ha desbezau y que s'alimenta de hierba[13]. De os corders pastencos ye d'a on se quita la mayor parte de a carne de corder que se consume[13] en realidat, sacando os ternascos que, por estar mas finos, se considera mas caros y de millor calidat, pero en cabezas de matar no en representa tantos.
    • O corder anyal u simplament anyal ye o corder mas desarrollau, que tiene d'entre 8-10 meses y os 18-20. Ye l'estadío anterior a l'adulto frescuau. Os masclos comienzan a toceyar en ista edat, en o que representa un chuego que indica que s'aproximan a la madureza sexual.
  • Un corder frescuau u simplament frescuau (frescuadas as fembras) ye un adulto choven,[2] con d'entre 20-24 meses y 3 anyos d'edat.
  • Una uella cuatremudada ye una fembra con d'entre 3 y 4 anyos, u d'entre 2 y 3 en bels puestos.[2] O termin pareix que va ligau con o creiximiento de a lana y con as esquiras que haiga pasau l'animal.
  • Un mardano mayorenco u una uella mayorenca son os adultos viellos,[2] anque en bels puestos s'aplica a os masclos que tienen mas de 5 anyos d'edat.[2] En a val d'Echo y en a val d'Ansó, se diz zarradas especificament a las fembras que tienen mas de 4 anyos.[2]

Por a pigmentación[editar | modificar o codigo]

Una uella marta, parda u morina.
  • Os eixemplars melanicos (negros) se conoixen como martos[2] u maritos[2] en Sobrarbe, como pardos en Echo,[2] y como morinos en Cinco Villas.[2]
  • Una uella paloma ye la que no tiene garra pinta negra en o cuerpo ni en a cara, por o que ye totalment blanca.[2]
  • Se diz que ye mallada (lat. <*MACULATA) a uella que tiene mallas d'una color diferent de a blanca[2]. Iste termin ye muit común con diferents especies de ganau, especialment con as vacas.
  • Una uella ganyota ye a que tiene una malla negra a redol de cada uello.[2] En a val de Benás iste mesmo concepto se designa con a voz «ullada».[2] Iste tipo de mallas son mas frecuents en os animals de linache churro.
  • Enroyada ye a uella que s'ha pintau con bella marca roya en a lana[14]. A marca se diz «enroyo» u simplament «royo». L'acto de pintar-les-ne se diz «enroyar»[14].

Imáchens[editar | modificar o codigo]

Referencias[editar | modificar o codigo]

  1. (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008. ISBN 978-84-8094-061-0
  2. 2,00 2,01 2,02 2,03 2,04 2,05 2,06 2,07 2,08 2,09 2,10 2,11 2,12 2,13 2,14 2,15 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-89862-35-7
  3. (es) ARNAL PURROY, Mª Luisa, Diccionario del habla de la Baja Ribagorza Occidental -Huesca-; Gara d'Edizions. Zaragoza, 2003. ISBN 84-8094-052-2
  4. (es) BLAS GABARDA, Fernando y ROMANOS HERNANDO, Fernando, El Aragonés de Baixo Peñas; Gara d'Edizions. Zaragoza, 2005. ISBN 84-8094-054-9
  5. (es) QUINTANA i FONT, Artur, El Aragonés nuclear de Nerín y Sercué (Valle de Vio); Gara d'Edizions. Zaragoza, 2007. ISBN 978-84-8094-060-3
  6. (es) LOZANO SIERRA, Chabier, Aspectos Lingüísticos de Tella. Aragonés de Sobrarbe (Huesca); Gara d'Edizions. Zaragoza, 2010. ISBN 978-84-8094-062-7
  7. (es) BARCOS, Miguel Ánchel, El Aragonés Ansotano: estudio lingüístico de Ansó y Fago; Gara d'Edizions. Zaragoza, 2007. ISBN 978-84-8094-058-0
  8. (es) MOTT, Brian L.. Diccionario etimológico chistabino-castellano castellano-chistabino. Institución «Fernando el Católico». Zaragoza, 2000. ISBN 84-7820-553-5
  9. 9,0 9,1 9,2 9,3 9,4 International Comission on Zoological Nomenclature (2003); «Usage of 17 specific names based on wild species which are pre-dated by or contemporary with those based on domestic animals (Lepidoptera, Osteichthyes, Mammalia)»; Bull.Zool.Nomencl. 60 (1): pp. 81–84.
  10. (es) Las razas autoctonas de Aragón. Evolución (1.999-2.009) y perpectivas.
  11. (es) LÍBANO, Ángeles y SESMA, J. Ángel, Léxico comercial en Aragón (Siglo XV). Institución Fernando el Católico, 1982
  12. 12,0 12,1 (es) Voz «Ternasco» en a Gran Enciclopedia Aragonesa online; consultada o 29 de marzo de 2012.
  13. 13,0 13,1 (es) Voz «Trashumancia» en a Gran Enciclopedia Aragonesa online; consultada o 29 de marzo de 2012.
  14. 14,0 14,1 (es) Voz «Ganadería». Gran Enciclopedia Aragonesa (TOMO VI). Unión Aragonesa del Libro, Unali S.L. Zaragoza, 1981. ISBN 84-85656-10

Se veiga tamién[editar | modificar o codigo]

Vinclos externos[editar | modificar o codigo]