Alimento

De Biquipedia
Ir ta: navego, busca
Articlo d'os 1000
Eixemplos d'alimentos d'orichen vechetal.

Un alimento ye qualsiquier obchecto u sistema material formatos por sustancias nutritivas (nutrients), como hidratos de carbonio, lipidos, proteínas, augua y sals minerals. L'alimento lo puet minchar un animal ta nutrir-se u por placer. En bell alimento predomina un solo nutrient (aceite, zucre, sal), y son alimentos simples, pero en a mayor part d'os alimentos son formatos por uns quantos nutrients y son alimentos complexos. Os obchectos consideratos alimentos pueden tener un orichen vechetal, animal u atros como los fongos u productos fermentatos como l'alcohol. Encara que muitas culturas yeran cullidors y cazataires, actualment a mayoría emplegan l'agricultura, a ganadería y a pesca, mientres que a cazata, a cullita y atros metodos parellans chugan un papel menos important.

A mayoría de culturas tienen una cocina caracteristica; se tracta d'o conchunto de tradicions, preferencias y practicas culinarias; a gastronomía estudeya istas tradicions. Muitas culturas han diversificato os suyos alimentos por meyo de diferents metodos de preparación, cocina y manufactura. Ixo tamién encluye un complexo comercio alimentario que premite ir más luent que una simpla cultura de subsistencia.

Denominacions[editar | editar código]

A part d'a denominación d'alimento, en determinatas parlas altoaragonesas se diz a los alimentos virolla u vidolla, sobre tot en aragonés oriental. A parola provién d'o latín VITUALLA, y o significato actual ye prou variable, dende simplement "alimento" (belsetán, ribagorzán, restos d'aragonés de Tardienta), "banquet" (fobán, aragonés d'o Viello Sobrarbe), u dica "fiesta" y "borina" (semontanés).[1]

Necesidatz nutricionals[editar | editar código]

Os alimentos cubren tres tipos de necesidatz: enercheticas, estructurals y funcionals-reguladoras. Os alimentos que cubren necesidatz enercheticas son os ricos en glucidos y lipidos y son a fuent d'a enerchía que consume l'organismo. Os alimentos que cubren necesidatz estructurals son os ricos en proteínas y son precisos pa que se formen as celulas y teixius de l'organismo. Os alimentos funcionals-reguladors son os que tienen vitaminas y sals minerals en cantidatz apreciables y son precisos pa que se produgan muitas reaccions metabolicas y procesos fisiolochicos.

Dietas[editar | editar código]

A cantidat y tipo d'alimentos que una presona consume a diario se diz dieta alimentaria. Muitas culturas estableixen as costumbres alimenticias y bi ha dietas tradicionals como a dieta mediterrania. Encara que os humans son omnivoros, elementos socials y relichiosos como a moralidat a sobén determinan que tipos d'alimentos se pueden consumir.

A seguridat alimentaria tamién ye una qüestión important, ya que as malautías prevocatas por alimentos causan muitas muertes a l'anyo. Bi ha dietas especials pa combatir bell transtorno u malautía u pa prevenir-los en caso de risgo de poder tener-los en o futuro. Entre as dietas especials destacan as dietas hipocaloricas, as dietas hipercaloricas, as dietas baixas en colesterol, as dietas con alto conteniu en fibra y as dietas blandas.

Conservación y manipulación d'alimentos[editar | editar código]

Os alimentos organicos se deterioran por contacto con l'atmosfera (oxidación) u por l'acción de microorganismos que los descomponen. Pa conservar-los l'hombre ha desembolicau diferents tecnicas tradicionals y procesos industrials pa evitar l'actividat d'os microrganismos que deterioran os alimentos.

As principals tecnicas de conservación d'os alimentos son:

  • Conservación en fredo.
  • Conservación por calor.
  • Conservación por deshidratación.
  • Conservación por adición de substancias.

A conservación en fredo se basa en que as baixas temperaturas reducen a reproducción d'os microorganismos. A conservación puet estar por refricheración u por conchelación.

A conservación por calor se basa en calentar l'alimento dica temperaturas a las que mueran os microbios. Una vegada muertos os microorganismos se puet envasar l'alimento d'una traza que no torne a estar colonizau. Bi ha diferents tecnicas de conservación por calor como a pasteurización y a esterilización.

A conservación por deshidratación se basa en secar os alimentos y una vegada ya sin augua l'alimento ya no ye un medio a on puedan vivir muitos microorganismos. As pansas son ugas secas que se conservan por deshidratación.

A conservación por adición de substancias consiste en adhibir a l'alimento substancias que impiden o desembolique de microorganismos. S'ha feito tradicionalment adhibindo vinagre, sal u zucre y actualment se fa industrialment con os aditivos alimentarios.

Referencias[editar | editar código]

  1. Francho Nagore et al. Endize de bocables de l'aragonés seguntes os repertorios lesicos de lugars y redoladas de l'Alto Aragón. Instituto de Estudios Altoaragoneses Uesca 1999.

Veyer tamién[editar | editar código]

Vinclos externos[editar | editar código]