Domesticación

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Articlo d'os 1000
Os cochos y as uellas estioron d'os primers animals en estar domesticatos.

A domesticación ye l'acción u l'efecto de fer domestico bel ser vivo, ye decir, que vivo chunto a lo ser humán, que se cría en casa. O termin deriva d'o latín domus, que significa "casa", y domesticus, que tien o mesmo significato que o termin actual. Describe o paso d'o estato salvache a lo estato domestico de bels animals por acción de l'hombre. Iste proceso ye a causa d'os intreses humans d'obtener d'as especies salvaches alimento, servicio, companyía, ropa, etc., y prencipió ya fa a lo menos once mil anyos.[1]

Una especie domesticata, animal u vechetal, ye una especie que ha desembolicato bels caracters morfolochicos, fisiolochicos, u encluso comportamentals, nuevos y hereditarios, como resultato d'una luenga interacción, d'un control u mesmo d'una selección deliberata por parti d'o ser humán.

A domesticación designa tamién o estato en que a reproducción, as curas y l'alimentación d'os animals, u o ciclo d'as plantas son controlatos de traza mas u menos dreita por o ser humán. En o luengache corrient, a exprisión "animal domestico" ye a sobén emplegata en o sentito d'animal de companyía. Iste zaguer termin se puet aplicar a un animal individual, mientres que a domesticación se refiere a una población u una especie entera. Una acepción ampliata d'a domesticación tiende a tratar totas as formas d'interacción regular d'a especie humana con una especie animal.

A principal utilidat d'as plantas y animals domesticos ye a producción d'alimentos, asinas como d'atros productos útils como a lana, o cotón, u a seda. Manimenos, os motivos d'a practica d'a ganadería u de l'agricultura no son siempre estrictament utilitarios y encluyen o placer, o tiempo libre u practicas relichiosas. A domesticación d'as plantas y d'os animals acompanyó los inicios de l'agricultura y estió un factor esencial en o desembolique d'a civilización. En o pasato permitió a revolución neolitica, pero tamién ye un proceso que encara se prolonga en l'actualidat.

Referencia[editar | modificar o codigo]

  1. Gran Enciclopèdia Catalana: Domesticació