Equus caballus
De Biquipedia
 |
Iste articlo tien una bersión escrita con una grafía alternatiba esperimental propuesta por bels biquipedistas á dintro d'o Biquiproyeuto:Grafía. Puede beyer-se aquí. |
| Caballo | ||||||||||||||||
|---|---|---|---|---|---|---|---|---|---|---|---|---|---|---|---|---|
 Equus caballus, o caballo domestico |
||||||||||||||||
| Estato de conserbazión | ||||||||||||||||
|
||||||||||||||||
| Clasificazión zentifica | ||||||||||||||||
|
||||||||||||||||
| Nomenclatura binomial | ||||||||||||||||
| Equus caballus | ||||||||||||||||
| Linnaeus, 1758 |
O caballo (Equus caballus (L., 1758)) ye un mamifero domestico d'a familia d'os équidos. Ye un animal erbiboro, de mida regularment gran, con cuello luengo e arqueyato, e per enchaquias ebolutibas con grans adaptazions ta correr en espazios obiertos.
As fembras son ditas yeuguas, os chobenons son os potros u lechals, os chobens pre-adultos purrocheros u purrocheras e os masclos adultos destinatos ta la reproduzión, os bartos. A domesticazión d'os purrucheros ta las fayenas de labor s'emprenzipa á redol d'a suya cuatrena añada de bida, e os animals no estarán adultos dica la quinta.
Contenius |
[editar] Anatomía
Como toz os équidos, tienen as estremidaz rematatas en un solo dido, á on que os altros se son bistos reduzitos dica la desaparizión total con a eboluzión. O dido zentral remata en una firme ungla (o casco) que recubre cuasi totalment a zaguera falanche d'a estremidat, con o semblant d'ixe estrato cornio, l'animal carreya tot o suyo peso en alto d'a ungla e ta pribar-ne d'o desgaste, en os animals que tiban u carreyan pesos, se mete una ferradura per baixo d'ella.
A capeza ye bien gran, con orellas chicotas e una mandibula fuerta e lierga que per a base suya liga os ponderosos musclos maseteros de l'animal, e per o cabo suyo tien as inzisibas que o caballo emplega ta redallar a ierba. A dentizión completa de l'adulto tiene 40 piezas, entre d'as cuals i existen dos caninas muito rudimentarias que només se gosan manifestar en os masclos.
O tubo dichestibo ye una mica més complexo que no en os carniboros, encara que no tanto como en os remugadors. Per contra que no los remugadors, os équidos en cheneral, e espezialment os caballos, tienen o bodiello espezialment boluminoso (d'entre os 80 e os 130 ls. só que en o colon, con 35 ls. més en o ziego, en comparanza con os menos de 15 ls. de l'estomago)
[editar] Estrutura osia
A eboluzión ha feto que sufra unas modificazions osias importants, como l'aumento d'a mida suya u, espezialment, d'as suyas estremidaz; á on que s'ha reduzito o numbro d'os didos ta un solo que ye embolicato de material cornio (o casco). En as estremidaz debanteras o cubito e lo radio son soldatos en un solo güeso, mesmo en a tibia e lo peroné, que priban que l'animal pueda chirar as suyas mans e piez.
Os güesos d'a capeza son liargos, e os d'a cara fan una lonchitut dople que en o cranio. A mandibla ye tamién liarga e tien una superfizie ampla e planera en a parti inferior de l'aria posterior. A espinada tiene 51 bertebras.
[editar] Eboluzión
As suyas orichens s'han de mirar en America d'o Norte, á on que yeran estinchitos dica l'arribata d'os españoles. Se i troboron eixemplars de 55 millons d'años entazaga, d'o chenero Hyracotherium (u Eohippus), abe ixes tiempos l'abantepasato de toz os Equus mudernos. l'Eohippus teneba una mida chica, que bailaba d'os 20 dica los 40 cm d'altaria, con cuatre didos en as estremidaz anteriors e 3 en as de posteriors, con un aspeuto esterno semilar á un can u talment una rabosa autuals. Tamién sen ye trobato ixemplars d'ixa espezie en Europa.
A eboluzión de l'Eohippus el fazió medrar en altaria dica los 115 cm e perder os didos dica que quedó monodactilo. Poquet á poquet, o suyo unico dido se fazió més e més duro dica tornar-se o casco que le feba posible de fuyir d'os predadors.
l'Eohippus abría alabez d'eboluzionar posteriorament enta una espécie dita Mesohippus, que ya teneba os piez con forma de casco. Dimpués, o Meryhippus e lo Pliohippus abrían o puesto ta lo chenero Equus.
O primer puesto á on que se i domesticó lo caballo estioron as estepas de Rusia e Ucrania e selbas d'arredol, á on que i bebiba lo tarpán (Equus caballus gmelini), considerato l'agrotipo d'os caballos domesticos. Bi ha razas de caballo que tienen chens de l'atra subespezie salbache de caballo Equus caballus pzewalskii.
[editar] Patrons de suenio
Os caballos pueden dormir de piez u estesos en o suelo. Tienen a capazidat de dormir-se leberament mientres que s'están d'alto de piez u de fer sestedetas, que se conoix que ye una adaptazión t'a bida como animal de presa en libertat, perque cuan os animals se chitan tumbos ye prou més fazil que los caze bel depredador. A capazidat suya ta dormir de piez chaze d'un "sistema de contenzión" en as patas suyas que les permit de relaxar os musclos suyos en dormindo-se, sin de cayer redondos.
En comparanza con os umans, os caballos no prezisan garra periodo de suenio ininterrupto, si que pueden chuntar toz os periodos de suenio que les calen, de dormideta en dormideta, siempre curtas, dica achuntar o periodo de suenio completo. Os caballos pueden dormir en cualsiquier puesto mientres que siga de días, e dormir d'entre 4 e 14 horas diarias de suenio lebero interrupto quan son de piez, e d'entre bels minutos dica dibersas horas quan son liargos en o suel. Se crei, tamién, que de toz ixes tiempos que os caballos s'están pareix que adurmiertos, a més gran parte no el son pas, estando per un regular o periodo diario de suenio d'entre bels minutez dica bel par d'oras. Diz que se considera que ta os caballos en ye prou con un par d'oras e meya de dormir regularment en un periodo total de 24 horas, a més gran parte d'a dormida s'escaix repartita de butiadetas de 15 minutos cadaguna.
Os caballos prezisan de chitar-se tumbos ta gosar arribar en a fase R.E.M. No prezisan si que una hora u dos cada dibersos días t'acomplir os suyos requerimientos de suenio R.E.M. Se ye oserbato que cuan un caballo le se mantiene forzadament de piez e nunca no le se deixa tumbar-se, muestra os simtomas de manca de suenio en pocos días, e ebentualment puet arribar dica á fallar-le las fuerzas e cayer inboluntariament en suenio R.E.M. mientres se trobe en una fase de suenio lebero. Os ditos casos son diferents d'os casos de narcolepsia, que os caballos tamién pueden sofrir.
Os caballos duermen millor cuan se troban en grupos perque, en ixas zercunstancias, mientres que cualcuns d'os animals duermen bels altros pueden mantener a guardia ta pribar d'ebentuals ataques de depredadors. Un caballo que se mantienga totalment solo no gosará nunca dormir bien, perque os suyos instintos le fan siempre cauto e de mirar que no le biengan á sorprender garra altros periglos.
[editar] Se beiga tamién
[editar] Enrastres esternos
Se beigan as imachens de Commons sobre es caballos.- (en) A base de datos d'a cría de caballos
- (en) Albeitería de caballos en eXtension.com
