Adolf Hitler
De Biquipedia
| Adolf Hitler | |
 |
|
|
|
|
|---|---|
| 2 d'agosto de 1934 – 30 d'abril de 1945 | |
| Prezedito por | Paul von Hindenburg (como president) |
| Suzedito por | Karl Dönitz (como president) |
|
Canziller d'Alemaña (Reichskanzler)
|
|
| 30 de chinero de 1933 – 30 d'abril de 1945 | |
| Prezedito por | Kurt von Schleicher |
| Suzedito por | Joseph Goebbels |
| Naximiento | 20 d'abril de 1889 Braunau am Inn, Imperio Austro-ongaro |
| Muerte | 30 d'abril de 1945 (56 años) Berlín, Alemania |
| Partito | Partido Nazionalsozialista Alemán d'os Treballadors |
| Conyuche | Eva Braun |
| Profesión | Politico, escritor, autibista, e pintor |
Adolf Hitler (Braunau am Inn, Austria, 20 d'abril de 1889 - †Berlín, 30 d'abril de 1945) estió un politico alemán d'orichen austriaco, que establió un rechimen nazionalsozialista en o que teneba o tetulo de Reichskanzler (canziller imperial) e Führer (capitoste, líder u guía). Hitler estió un d'os ditadors más poderosos d'o sieglo XX. Lideró lo Partito Nazional Sozialista d'os Treballadors Alemans e estió canziller d'o Terzer Reich. Adolf Hitler ye considerato un d'os ditadors más notorios e cruels d'o sieglo XX. L'ochetibo prenzipal d'a ditadura de Hitler estió "purificar" o pueblo alemán d'as "manchas no arias", fendo de Hitler o responsable prenzipal de l'olocausto que en resultó. O suyo segundo ochetibo yera recuperar (por a bía melitar, si yera menester) os territorios alemans que s'eban perdito dimpués d'a Primera Guerra Mundial. Manimenos, tamién quereba una mayor espansión enta l'este d'Europa (Lebensraum) e á la fin o dominio d'o mundo. Con a embasión de Polonia (1939), prenzipó a Segunda Guerra Mundial.[1] Ta no estar prisionero d'os sobieticos, se suizidó lo 30 d'abril de 1945.[2]
[editar] Introduzión
En 1913, os sentimientos pro-Gran Alemaña de Hitler li empentoron á biachar á la ziudat alemana de Munich (Babiera). Se diz que cuan esclató a Primera Guerra Mundial (1914-1918), s'ofrexe á l'inte como boluntario. Sirbió mientres de cuatre años como soldato e como Gefreiter (rango equibalent álto u baxo á cabo en o 16eno Rechimiento Babaro d'Infantería de Reserba,[3] luitando, entre atras, en a Primera Batalla d'Ypres,[4] a batalla d'o Somme, a batalla d'Arrás e a batalla de Passchendaele.[5] Fue ferito dibersas begatas. En Mesen, una bala li rozó la frent, e más entaban amagó a zicatriz resultant con a tufa. Fue condecorato con as dos bersions d'a Cruz de Fierro pero, por a suya frustrazión, nomás puyó dica o rango de Gefreiter, ya que os suyos superiors opinaban que mancaba de cualidaz de liderazgo. En nobiembre de 1918 dezidío dentrar en a politica, unindo-se á una d'as muitas formazions politicas chicotas que esistiban: o Partito d'os Treballadors Alemans (DAP), que más tardi se combertirba en o Partito Nazional Sozialista d'os Treballadors Alemans.
Hitler plegó á lo poder en una epoca en que o pueblo alemán sufriba por o paro, a pobreza e a umillazión d'a Primera Guerra Mundial. Baxo lo Tratato de Versailles, Alemaña fue obligata á compensar por o mal que eba feito en a guerra. Ista obligazión pesaba senificatibament sobre o país. Cuan á finals d'otubre de 1929, Alemaña prenzipiaba á recuperar-se, o crack d'a bolsa de Nueba York fazió colapsar a economía alemana, dando á Hitler a suya oportunidat. Á trabiés d'una efizient maquinaria propagandistica, consigió fer-se á si mesmo e o suyo partito muit populars e otenió más e más escaños en o parlamento.
Dimpués d'a suya bitoria eletoral en 1933, o president d'Alemaña Paul von Hindenburg li nombró finalment Canziller d'Alemaña. Á l'inte, mete en marcha os suyos plans ta apropiar-se de tot o poder en Alemaña, alexar os chodigos d'a bida publica e preparar Alemaña ta una guerra de conquiesta.
En 1938 s'anecsiona Austria (Anschluss), que dende allora fue dita Ostmark. En 28 de setiembre de 1938, o Reich nimbió un ultimatum á Checoslobaquia ta recuperar os Sudetes. Á iniziatiba de Mussolini, se siñó ascape l'Alcuerdo de Munich entre Hitler, Franzia e Anglaterra ta mirar d'ebitar a guerra imminent. O 30 de setiembre, Checoslobaquia se beye obligata á zeder os Sudetes.
En 1939, Hitler ordenó a embasión de Polonia, fendo que o Reino Unito e Franzia declarasen a guerra á Alemaña. Estió lo prenzipio d'a Segunda Guerra Mundial. Á lo prenzipio, Hitler podió ocupar gran parti d'Europa pero dimpués de l'ataque contra la Unión Sobietica en 1941, á partir de 1943, as suyas posibilidaz s'enfonsoron e o Tercer Reich quedó cuentra as cuerdas. En o ibierno de 1944-1945, os aliatos ya se trobaban en as mugas d'Alemaña, e asinas prenioron á la fin Berlín.
Dimpués de beyer que os nazis eban perdito a Segunda Guerra Mundial, o 30 d'abril de 1945 de tardis, se suizidó chunto con a suya mulller Eva Braun en o suyo búnquer de Berlín. S'eban casato lo día d'antis en o mesmo búnquer. Ella s'emberenó, mientres que Hitler se disparó en a capeza. Una mica dimpués fuoron lebatos á lo esterior, e parixe que fuoron cubiertos de benzina e crematos en un forato. Posiblement, os sobieticos se leboron o cranio de Hitler e as restas d'os suyo cuerpos á Moscú ta una posterior imbestigazión. En a guerra desencadenata por Hitler, en Europa perdioron a bida 39 millons de presones, entre os cualos seis millons de chodigos. Gran parti d'Europa quedó destruyita mientres de l'ataque de Hitler, e o continent perdió a suya anterior echemonía mundial á fabor d'os Estatos Unitos e a Unión Sobietica. Alemaña perdió un territorio considerable en as mugas orientals con Polonia e Rusia, os abitants d'o cualo fuoron perseguitos enta l'ueste. Lo que quedaba d'Alemaña fue dibidita en una parti ozidental e una oriental en o prenzipio imminent d'a Guerra Freda. Europa e Alemaña continarban dibiditas por o telón d'azero dica 1990.
[editar] Referenzias
- ↑ Keegan, John (1989), The Second World War, Glenfield (Nova Zelanda): Hutchinson
- ↑ Wistrich, Robert S. Who's Who In Nazi Germany? Routledge, Londres, 1995 ISBN 978-0-415-11888-0
- ↑ Bullock, A. (1962), Hitler: A Study in Tyranny, Penguin Books, ISBN 0-14-013564-2
- ↑ Keegan, John (1987), The Mask of Command: A Study of Generalship, Pimlico (Random House)
- ↑ Shirer, William L. (15-11-1990), The Rise and Fall of the Third Reich, Simon & Schuster, ISBN 0-671-72868-7
