Quercus ilex

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Carrasca

Clasificación scientifica

Dominio:	Eukaryota
Reino:	Plantae
División:	Magnoliophyta
Clase:	Magnoliopsida
Orden:	Fagales
Familia:	Fagaceae
Chenero:	Quercus
Especie:	Quercus ilex

Nomenclatura binominal

Quercus ilex

L.

La carrasca^[1] u lecinera (Quercus ilex) ye un árbol caracteristico de las selvas mediterranias amplament distribuito por la Cuenca Mediterrania.

Como especie caracteristica de la Cuenca Mediterrania tien fuella perén y esclerofila, dura, con menos superficie que los Quercus de fuella caduca y muitas vegatas con punchas.

Lo suyo creiximiento ye lento y la suya fusta ye densa.

Lo suyo fruito se diz ballota u lecina (on se diz lecina a lo fruito, corresponde dicir lecinera a l'árbol), de lo mesmo tipo que lo glan de los caixicos.

Subespecies

Bi n'ha muitas variants y se distribuyen en dos extremos que gosan considerar subespecies pero que bels botanicos consideran especies. La variant tipica ye Quercus ilex ilex, mes antiga y adaptata a lo clima mediterranio calido y humido. La subespecie Quercus ilex ballota, d'antes dita Quercus ilex rotundifolia representa l'adaptación de l'anterior a lo clima mediterranio continentalizato y a vegatas menos humido de l'interior de la Peninsula Iberica y Berbería.

Relación con la Cultura tradicional

En la Cuenca Mediterrania puet formar selvas a on domina lo estrato arborio, los carrascals. En lo paisache de lo Semontano Pirenenco y bella depresión prepirenencas la vechetación natural ye lo carrascal, y encara ye bien representau. Manimenos l'acción humana ha favoreixiu que lo Pin borde, de creiximiento mes rapido li haiga preso puesto.

Las ballotas de bella variedat son dulces y las gosaba minchar d'antes la chent. En Extremadura y Andalucía (y antismás en Teruel) los tocins de raza iberica minchaban ballotas, que teneban acidos grasos insaturaus como l'acido linoleico, que dimpués s'acumulaban en lo blanco de la suya carne, con lo que dan un pernil de gran calidat.

La fusta ye d'alto poder calorifico y se fa servir pa fer carbón vechetal.

Por estar una versión mediterrania de lo caixico, ye sagrau pa las culturas antigas indoeuropeas como griegos y romanos, y ye l'árbol de Zeus u Chupiter, igual que en atras tradicions de Centroeuropa u mes luent, lo caixico ye l'árbol de los dioses de la tronada locals. Amanix en las tradicions y leyendas aragonesas, y dica en lo suyo escudo, pus l'Árbol de Sobrarbe ye una carrasca. Tamién ha dau nombre a lo lugar sobrarbés de Lecina.

Etimolochía

La palabra carrasca ye prerromana, de posible orichen sorotaptico y corradical con lo catalán garriga. Carrasca ye una palabra muito estendillata en lo centro d'a Peninsula Iberica porque s'emplegaba en mozarabe y arabe hispano.

La palabra lecina ye d'orichen latín y se relaciona con lo castellano encina y lo catalán alzina. Seguntes Joan Coromines, en Catalunya la deseparación de l'aria on se diz alzina y l'aria on se diz carrasca coincide en part con la deseparación entre la Catalunya Nueva y la Catalunya Viella. Bels botanicos catalans siguen la convención de dicir la subespecie ilex como alzina y la subespecie ballota como carrasca aproveitando lo feito que la primera se troba mes que mes en l'aria termediterrania humida y submediterrania de lo nord-este y la segunda en l'aria en l'ueste y sud, pero en catalán las dos palabras son cheosinomimos y la chent no diferencia subespecies ni por caracteristicas ni por emplego.

En Aragón tamién podió desvenirse que lecina fuese lo nombre emplegato en que no ocuporon los musulmans y carrasca lo nombre en las arias mes baixas y mediterranias que si que ocuporon, porque lecina s'emplega mes que mes en lo norte, pero no ye tan claro como en lo caso catalán porque la palabra carrasca tamién s'ha documentato en las vals mes altas de lo Pireneu axial.