Quercus humilis
| Caixico | ||||||||||||||||
 Quercus humilis | ||||||||||||||||
| ||||||||||||||||
| Quercus humilis Mill. | ||||||||||||||||
Quercus humilis ye una especie de caixico con caracteristicas intermeyas entre os caixicos marcescents y os caixicos comuns y tien muita facilidat pa hibridar con diferents especies de caixicos. Cheobotanicament ye una especie con submediterrania caracteristica.
Ye un arbol que por un regular tien una altaria de 10–15 m, encara que puede plegar dica os 20 y 25 m y a vegatas no pasa de 5. A corona ye irregular, ubierta y poco tupida, dixa veyer as brancas retuertas y protechitas por una crosta acrebazata y de color pardo-cenisa.
As rametas y as fuellas naixen pubescents. As fuellas son variables en textura, forma, lobulación y grau de pubescencia quan son desembolicatas de tot. Van dende coriacias a membranacias, y o contorno va dende obovato dica quasi eliptico, y ye freqüent una asimetría en a base. Bi ha cinco a hueito pars de niervos secundarios y atros tantos lolubos laterals, que pueden no ser egual de largura. O tomento con o que creixen se puet perder quasi de tot en o faz, pero en o embés se mantién encara prou denso. As fuellas tienen de meya entre 5–12 cm de largura, 3-6 d'amplaria y o peciolo, glabrescent en a matureza va dende 5 a 12 mm.
Distribución y habitat[editar | modificar o codigo]
A distribución bordeya a zona norte de l'aria de clima mediterranio dende Anatolia dica os Pireneus, ocupando amés zonas de Corcega. Cerdenya, Sicilia y bellas islas d'a Mar Echea. Por o norte plega dica o Europa Central, on tiende a restrinchir-se a las solanas, tenendo a suya distribución os enclaus més septentrionals en Polonia y Alemanya.
En Espanya Quercus humilis y as formas hibridas que se suposa que en derivan (Quercus cerrioides) ocupan prencipalment o eixe Pirenenco, tenendo a muga occidental en a cuenca alta de l'Ebro, por eixemplo en o redol de Vitoria, (pero l'aria compacta tien o cabo en Navarra), y a muga meridional en forma de tres enclaus en as Sierra de Prades, Cardó y Puertos de Bezeit, (luent d'un aria compacta que tien o cabo en o Montseny).
Se puet trobar en altarias dende o ran d'a mar dica os quasi 1900 m d'altaria, pero en os cabos d'este rango no forma selvas propias, y fa part de selvas dominatas por atros arbols. L'altaria topografica més tipica d'os caixicars de Q.humilis son os 400-1500, y excepcionalment os 1700.
Precisa de 600 mm anyals y bien repartitos tota l'anyata, fuera d'a isohieta d'os 140 mm en verano no forma selvas. Mientres que en Centroeuropa ocupa solanas, en a Peninsula Iberica ocupa pacos y zonas alteras, compensando macroclimas més secos.
Puede aguantar chelatas y calors estivals moderatas. A lo sud d'os Pireneus vive en zonas con temperaturas meyas en chinero dica –3 °C y 22 °C en agosto.
Ocupa gran variedat de suelos pero prefiere os suelos neutros y basicos, que predominan en l'aria iberica d'a suya distribución, con substratos de calsinera, salagón y almendrón. Ni requiere suelos profundos ni con guaire capacidat de retención d'augua, y puet creixer dica en suelos on aflora o substrato rocoso.
Formacions de Quercus humilis[editar | modificar o codigo]
Bells autors suposan que una selva matura d'este caixico no yera una masa cerrata y densa, y serían formacions claras on a luz podese entrar bien y lo argumentan basando-sen en que a corona ye poco tupida y a la desichencia de luz que tien pa creixer. D'os quatre caixicos marcescents ye o que rechita dende a zueca con mayor fuerza y lo que tien un desembolique estolonifero menos acusato. Bells autors matizan que a l'hombre li ha intresato este aclarato pa espleitar pasturas a la sombra d'os caixicos.
Os caixicars de Quercus humilis son una clara transición entre as selvas caducifolias y as selvas mediterranias. En os estrato arborio y arbustivo predominan as especies caducifolias, pero a diferencia d'as selvas caducifolias o matical ye bien desembolicato, lo que lo fa pareixito a las selvas mediterranias. O estrato herbacio ye bien desembolicato, lo que lo fa pareixito a las selvas caducifolias, encara que no bi ha terofitos.
O estrato arborio en condicions poco alteratas tien una altaria de 10–15 m, y una cobertura entre o 70 y 100%. As especies que acompanyan més a sobén a Quercus humilis en diferents clases de caixicars son Sorbus torminalis, a cerollera Sorbus domestica, Sorbus aria, os acirons Acer opalus, Acer campestre, Acer monspessulanum, os tilers Tilia platyphyllos y os latoners Celtis australis. A presencia de fayos u o caixico Quercus petrea ye en os ecotonos, en o primer caso con en o ecotono con o fayar con buixo. Os perenifolios més comuns son as carrascas, o taixo, o pin nasarro, y sobretot o pin royo. Estos dos pins pueden sustituir-lo en puestos con clima més continental u seco u quan l'hombre degrada o caixicar con a espleitación forestal.
O estrato arbustivo ye un matical contino que se desembolica bien por a poca densidat d'as coronas d'os arbols. A cobertura horizontal plega a lo 70-100 % encara sigan més lumerosas as especies caducifolias, en Europa Occidental l'acompanyant més cutiano d'o Quercus humilis ye un perennifolio, o buixo. De feito Braun-Blanquet describió o caixicar de Quercus humilis con buixo como asociación fitosociolochica en o macizo de Cévennes y sirvió pa clasificar-ie as selvas de Quercus humilis d'Europa occidental. As atras especies acompanyants més comuns son a senera (Amellanchier ovalis), os artos Crataegus monogyna y Crataegus laevigata, l'aranyón (Prunus spinosa), a tintilaina (Viburnum lantana), Lonicera xylosteum, Ligustrum vulgare, l'avellanera (Corylus avellana), Cornus sanguinea, Coronilla emerus y diferents galabarderas Rosa pimpinellifolia, Rosa arvensis, etc...
O estrato herbacio cubre entre o 40% y o 70 % d'a superficie y no bi ha que especies perens, de fueras d'a presencia de bell cheranio borde de cabo a quan. Especies que son posibles de trobar son: Helleborus foetidus, Primula veris columnae, Hepatica nobilis, Fragaria vesca, Stachys officinalis, Euphorbia amigdaloides, Galium vernum, Polygala calcarea, Pulmonaria longifolia, Hieracium murorum, Potentilla montana, Ranunculus nemorosus, Arum maculatum, Epipactis helleborine, Brachypodium phoenicoides, Brachyopodium sylvaticum, Poa nemoralis y Bromus erectus.
Entre as plantas tipo tuca trobamos a hiedra, a rubia, a nueza negra, Lonicera etrusca, Lonicera periclymenum y Clematis vitalba.