N-330

De Biquipedia
Ir a la navegación Ir a la búsqueda
Recorriu d'a N-330.
Cartel d'a N-330.

A carreterra nacional 330 u N-330, conoixida como carretera d'Alicant ta Francia por Zaragoza,[1] ye una carretera d'o rete nacional de carreteras de l'Estau espanyol que va dende a ciudat d'Alicant, en o País Valenciano, dica la muga con Francia en o puerto de Somport, en Aragón. Pasa por villas y ciudatz importants d'as dos Comunidatz Autonomas, como Requena, Utiel, Teruel, Daroca, Zaragoza, Uesca y Samianigo.

Recorriu[editar | editar código]

A N-330 ranca en a Glorieta de la Estrella, en a ciudat d'Alicant, y enfila ta l'interior pasando por Mont-fort, Novelda, Elda, Xaix y Villena, tot coincidindo con o trazau de l'Autovía d'Alicant, A-31, dica plegar en Almansa en a provincia d'Albacet. Alavetz, a N-330 enfila ta norte, cara ta Requena, y dentra una atra vegada en o País Valenciano por Ayora y Cofrentes.

Fita miriametrica d'a N-330 que corresponde con o suyo kilometro 30.

A N-330 coincide con a N-3 dica Utiel. En Utiel, a carretera marcha en dirección ta Ademuz esnavesando por Sinarcas, Talayuelas, Landet y Santa Cruz de Moya. En o Rincón d'Ademuz a carretera pasa por a suya capital comarcal (Ademuz) y por o termín municipal de Torre Chusana, aon se l'achunta la N-420 que viene de Cuenca. Contino pasa por l'aldeya de mugas de Mas de Jacinto y dentra en Aragón por Libros.

En Aragón, a N-330 comienza seguindo o río Turia por as foces que traza ixe entre Libros y Villel, y dimpués contina paralela a o río por a val dica la ciudat de Teruel. En os arrabals de Teruel s'achunta con a N-234 que circumvala la capital por o sud, y formalment desapareixe subsumida en ixa atra carretera nacional, que contina ta Cella y Villar Cremado adintrando-se en a val de Xiloca de camín ta l'Ebro.

En Daroca, a N-234 y a N-330 se tornan a deseparar, marchando a primera cara ta Calatayú, y a segunda cara ta Carinyena. Pasa por Retascón, Villa-reyal de la Uerba y Paniza en a comarca de Campo de Daroca, y en pasando o puerto de Paniza (paralela a l'Autovía Mudéchar, anque más antiga que aquélla), pasa ta'l Campo de Carinyena y plega en Carinyena. Alavetz, a N-330 pilla por Longars, Muel, Botorrita y Cadret dica Quart de la Uerba, por aon que dentra en a ciudat de Zaragoza.

En a capital aragonesa, o trazau d'a N-330 ye a Vía Iberica, contino Paseyo Isabel la Catolica, Ferrando lo Catolico y Gran Vía dica la Plaza de Basilio Paraiso. Dimpués pilla por o Paseyo de Pamplona y María Agustín dica Escrivá de Balaguer, y por ixa carrera dica la plaza de la Ciudadanía a on s'achunta con a N-232. Por l'Av. Madrid se torna a achuntar con o Paseyo María Agustín, y por ixe se'n va ta la plaza Europa y trescruza l'Ebro por o puent de l'Almozara. Por a carrera d'a Val de Broto contina, pa achuntar-se con l'Avenita Os Perineus, pasa por debaixo d'a Z-40 y marcha por Parque Goya tornando-se a carretera de Uesca.

En o termin de Sant Chuan de Mozarrifar, a N-330 se funde en l'A-23, y d'allí ta Uesca no se conserva la suya numeración si que en o trazau antigo, N-330a, que va dende Villanueva de Galligo dica Zuera en paralelo a l'autovía, y dimpués dende Ontinar de Salz dica Uesca por Almudévar.

En Uesca capital, o trazau d'a N-330 ye l'Avenita de Martínez de Velasco, a de Chuan XXIII y a de la Paz. En o barrio d'a Universidat, a carrera de Sant Chuan Bosco se transforma en a carretera de Samianigo y asinas marcha d'a ciudat ista carretera. Recibe a N-240 que viene de Balbastro por a dreta en os arrabals de la Isuela, dirección Igriés.

En Arguis, a N-330 enfila ta trescruzar o puerto de Monrepós y asinas penetra en a comarca de l'Alto Galligo. Pasa por Belarra, a Nau, l'Hostal d'Ipiés y Rapún chusto enantes d'arribar ta Samianigo. En as afueras d'o barrio d'o puent de Samianigo recibe a N-260 por a dreta, que en ixe punto forma la variant Yebra-Fiscal.

En Samianigo, a N-330 ye l'Av. Uesca que remata en a Plaza d'Espanya. Alavetz contina como carrera de Sarrablo y se'n va en dirección ta Chaca como N-330a, seguindo o curso d'o río Tulivana dica Pardiniella y dentra en a Chacetania por Martillué.

En Guasa, ya prou cerca d'a capital chacetana, se bifurca una atra vegada, formando a N-330a que se transforma en l'Av. Perimetral en o casco urbano d'a ciudat, y dimpués tuerce ta norte como Avenita d'o Rechimiento de Galicia y l'Av. de Francia que atraviesan o centro de Chaca. L'atro camal esnaviesa por en norte d'a ciudat y ye la circunvalación norte. Os dos camals s'achuntan debaixo de l'Hespital y a partir d'ixe punto comienzan a seguir o río Aragón dirección norte, por Bergosa, Castiello de Chaca, Villanuga y Canfranc. Una segunda división en Canfranc produce a N-330a que puya ta Candanchú y dimpués trescruza o puerto de Somport por a montanya. Iste ye o trazau antigo. Actualment o trazau principal ye soterranio, y dende Canfranc-Estación pasa ta Francia por túnel.

Referencias[editar | editar código]

A N-330 en Castiello de Chaca.
  1. (es) Ley 37/2015, de 29 de septiembre, de carreteras. Consultau o 19 de febrero de 2019.

Se veiga tamién[editar | editar código]