N-260
A carretera nacional 260 u N-260, tamién dita Eixe Pirinenco[1], ye una carretera d'o rete nacional d'Espanya que trescruza lo Pirineu dende lo municipio catalán de Portbou dica la ciudat aragonesa de Samianigo, a on que converche con a N-330.
Recorriu
[editar | modificar o codigo].JPG)
A N-260 escomienza en a muga con Francia en o municipio costero de Portbou (Chirona) y marcha enta Figueras por Llançà y Garriguella. En Figueras tien enlaces con a N-II y con l'Autopista d'a Mediterrania AP-7. Contino, sigue ruta enta l'interior y esnaviesa por Navata y dende Besalú dica Olot ye desdoblada como A-26.
Pasa por Vallfogona de Ripollès y Ripoll, a on enlaza con a C-17 y con a N-152, con a cual comparte lo trazau dica Puigcerdà, y dimpués contina de camín enta la provincia de Lleida.
En a provincia de Lleida i dentra por Bellver de Cerdanya y contina por el Pont de Bar dica la Seu d'Urchel. En la Seu tiene enlace con a N-145 que enfila enta Andorra. Dimpués, se'n va enta Vilamur (Soriguera), Sort, Gerri de la Sal, la Pobla de Segur, Senterada y Sarroca de Bellera. En Pont de Suert se troba con a N-230 que comunica la ciudat de Leida con a val d'Arán, y s'achuntan as dos pa fer camino paralelo a la Noguera Ribagorzana dica que se desepara y la N-260 penetra en a provincia de Uesca por o termin municipal de las Pauls.
Esnaviesa por o coll de Fadas en o termin de Bisagorri y alavez dentra en a val de Benás por o mont d'Urmella y va enta Castilló de Sos. En Castilló se mete en o congosto de Ventamillo, tot seguindo la Esera, dica Seira y Campo. En os arredols d'a villa de Campo s'esbarra de camín enta Sobrarbe por la Foradada d'el Toscar, mientres que a calzada principal que sigue enta Graus se transforma en l'A-139.
Trescruza lo collau de Foradada y esnaviesa por a Fueva en paralelo con a sierra Ferrera, pasando por debant de a Cabezonada, Sant Per de Toledo d'a Nata y Fuendecampo, sigue de camín enta l'Aínsa por Arro, Usana y Banastón. En a villa de l'Aínsa trescruza la Cinca y forma o cruce con l'A-138.
De l'Aínsa marcha enta Boltanya y dimpués enta Fiscal seguindo l'Ara, pasando por a cerrada de Chanovas y os túnels de Baluport. Pasa por la Velilla, la Cort, Santolaria d'Ara y Arresa. En Fiscal se desdobla, y mientres que o trazau principal remonta lo barranco de Sant Salvador y forma la variant Yebra-Fiscal de nueva construcción, un segundo camal (que enantes yera o solo que i habeba) sigue enta Sarvisé, Broto y Torla y dimpués cruza lo puerto de Cotefablo baixo la denominación de N-260a, y se'n va dimpués enta Biescas por Yesero.
O trazau principal ingresa agora en l'Alto Galligo por os túnels que han foradau a sierra de Canciás, por debaixo d'o puerto de Petralba. A N-260 pasa alavez por a val de Basa entre Fandiello y Orús, plega enta Sant Chulián de Basa y Yebra, y remata en a boca d'a val en o barrio d'o puent de Samianigo, a on que s'achunta con a N-330 pa seguir ya de camín enta Chaca con ixe atro nombre.
Puntos problematicos
[editar | modificar o codigo]Anque a carretera ha teniu inversions y milloras considerables, como pasó en 2012 con a inauguración d'a variant Yebra-Fiscal que redució considerablement o trafico por o túnel de Cotefablo, tiene encara numerosos puntos en os que se demanda milloras. En Aragón son destacables:
- O trampo entre Castilló de Sos y Campo por o congosto de Ventamillo, muit estreto y encaixonau con a penya, sin senyalización central en a calzada, considerau capital por os vecins y empresarios de Ribagorza porque ye l'acceso mas important enta la val de Benás y actualment no permite que se i cruce dos cambions u autobuses.[2] Dezaga d'a execución d'unas obras entre noviembre de 2019 y l'hibierno de 2024, entre las poblacions de Campo y Seira (chusto antes d'o congosto de Ventamillo), s'enampló l'amplaria d'a carretera y se realizoron dos túnels de 265 metros y 540 metros de longaria, ta millorar a seguridat en a carretera.[3][4]
- O trampo entre Fiscal y Boltanya, con calzada deficient y estreta en bels puestos, con trangos muit angostos en curva en a cerrada de Chanovas que causan serios problemas a los vehiclos pesaus y mesmo a los de transporte escolar.[5]
Referencias
[editar | modificar o codigo]- ↑ (es) Ley 37/2015, de 29 de septiembre, de carreteras. Consultau o 19 de febrero de 2019.
- ↑ (es) Noticia El Ejecutivo aprueba la licitación del acondicionamiento de la N-260 entre Congosto de Ventamillo y Campo, en l'Heraldo de Aragón de 14 d'aviento de 2018. Consultada o 19 de febrero de 2019.
- ↑ (es) Rubén Darío Núñez: Fomento arranca las esperadas obras de la N-260 entre Campo y el Congosto del Ventamillo a cinco días de las elecciones, en Heraldo de Aragón, 5 de noviembre de 2019.
- ↑ (es) María José Villanueva: Abren al tráfico los dos túneles de la N-260 entre Campo y el Congosto del Ventamillo, en Heraldo de Aragón, 9 d'aviento de 2024.
- ↑ (es) La mejora de la N-260 de Balupor a Fiscal requiere más de 57 millones de inversión de l'Heraldo de Aragón de 16 d'aviento de 2018. Consultada o 19 de febrero de 2019.
