N-240

De Biquipedia
Ir a la navegación Ir a la búsqueda
A N-240 en plegando ta Berdún (Chacetania), un día de cielo laso d'hibierno.

A carretera nacional 240 u N-240, conoixida como carretera de Tarragona ta San Sebastián y Bilbao y en muitos lugars d'a provincia de Uesca simplament como carretera de Tarragona, ye una carretera d'o rete nacional de carreteras d'o Estau espanyol que trescruza as provincias de Tarragona y Leida en Catalunya, a de Uesca en Aragón, Navarra y as provincias d'Alava y Vizcaya en o País Vasco, entre o suyo recorriu dende a ciudat de Tarragona dica Bilbau.

En Aragón a carretera pasa por villas y ciudatz importants como Binéfar, Monzón, Balbastro y Uesca. En as afueras de Uesca capital se desdobla con a N-330 dica Chaca por Monrepós, aon se torna a deseparar y sigue marcha ta la muga con Navarra.

Recorrito[editar | editar código]

En Catalunya[editar | editar código]

A carretera naixe en a plaza Imperial Tarraco de Tarragona. A-escape pilla dirección ta Valls y ye l'Avenita Principat d'Andorra d'a capital tarraconense, contino carrer de Valls dica salir d'a ciudat y meter-se paralela a o río Francolí. Esnaviesa por debaixo de l'AP-7 cerca d'o parache de l'aqüeducto romano de Tarragona u Pont del Diable, y sigue de camín ta la capital de l'Alt Camp por o nuclio de Sant Salvador y os termins municipals de Perafort y Vallmoll. A nacional circumvala Valls por difuera, por l'este, dica la pedanía de Masmolets, aon pilla y se mete paralela a o torrent del Sarraller y s'enfila ta trescruzar o coll de Lilla por o lugar de Fontscaldes.

En o coll de Lilla, a N-240 abandona la comarca d'Alt Camp y se mete en a Conca de Barberà pa baixar en altura tot contino dica la villa de Montblanc, por a man interior d'a litoral catalana. En o termino municipal de Montblanc, a carretera recupera la paralela con o río Francolí, y se fa paralela tamién con l'autopista AP-2 y con a linia ferria 200 d'Adif. Alavetz pasa por a Espluga de Francolí y deixa la comarca por Vimbodí i Poblet. En o termino de Vinaixa, a N-240 s'adintra de vez en a comarca d'as Garrigas y en a provincia de Leida.

A nacional contina baixando cara ta o plano de Leida por Les Borges Blanques, lugar aon que no dentra sino que lo circumvala por o sud, y s'amana ta la capital leidatana por Juneda, mesmo como fa o ferro-carril. En Leida capital, a N-240 s'extingue en a circumvalación de l'Acceso Este ta Leida (u LL-11) dende que la fizon, y torna a amaneixer por l'atro costau d'a ciudat en l'Avenita de l'Alcalde Rovira Roure. Enantes, s'achuntaba con o trazau d'a N-II que i arriba dende Barcelona y con a N-230 que marcha ta la val d'Arán y feban a vuelta de conchunta por o paseyo de Ronda, despartindo-se a boniquet; primer a N-II de camín ta Fraga por Alcarràs en a plaza de l'Exercito, luego a N-240 cara ta Binéfar por Almacellas y, en zagueras ya, a N-230 dirección ta Benabarre por Torrefarrera, Alguaire y Alfarràs, en a Plaza Europa d'a ciudat.

A carretera N-240 abandona Catalunya por o municipio d'Almacellas, y contino dentra en Aragón por o d'Altorricón.

En Aragón[editar | editar código]

Dende Altorricón, a carretera sigue dica la capital d'a Litera paralela a la A-22 y a la linia ferria, y anque en l'actualidat y gracias a lo trazau d'ista atra ya no i dentra, enantes se meteba en Binéfar como carrera d'Almacellas y luego carrera de Zaragoza. En Binéfar se desepara d'o ferrocarril, pero marcha d'a localidat encara paralela con l'A-22, d'a qual se desepara más t'adebant, una vegada s'ha pasau o canal de Zaidín.

Alavetz, a N-240 mete rumbo ta la ciudat de Monzón, en a qual se fica por l'Av. de Leida y trescruza la Sosa, metendo-se paralela con o río a continación dica arribar ta l'Azucarera, a ran d'a qual se transforma en a carretera de Balbastro y chira de camín ta ixa ciudat. En pasando por Monzón, a carretera esnaviesa por adebant d'os Salesianos y d'os antigos edificios de viviendas d'a Hidro-Nitro, y alavetz trescruza por o puent d'a Cinca tot deixando dezaga la ciudat d'o Castiello templero más important d'Aragón.

Dimpués de Monzón a N-240 remonta o río Cinca dica Balbastro, pasando por Castillón d'o Puent. En l'actualidat no fa si que bordeyar a capital semontanesa, pero enantes se i meteba por o centro. Quan ye pasada Balbastro, a nacional s'en va ta Peraltiella seguindo aguas-t'alto lo Vero y dimpués pasa por o termino municipal d'Ascellas-Ponzano, chusto entre os dos lugars que le dan nombre. Entre o nuclio d'Ascellas y o d'Angüés, a nacional pasa por debaixo d'o viaducto de l'A-22 y trescruza l'Alcanadre. En Angüés deixa definitivament dezaga o Semontano de Balbastro y se mete en a comarca de Plana de Uesca.

Un puent d'a N-240 sobre a parte aragonesa d'o entibo de Yesa, entre una sequera.

Por a Plana de Uesca a N-240 va perdendo altura poquet a poquet, tot pasando por o lugar d'as Viliellas, luego por Sietemo (en o termino municipal d'o qual pasa por alto d'o Guatizalema), y plega dica o calcil d'o Castiello de Mont Aragón chusto en sud de Loporzano. Alavez pilla paralela con o río Flumen y s'amana ta Uesca capital por Quicena, bordeyando la capital por o norte, y desenvoca en a N-330 de Chaca y o puerto de Monrepós en a ribera de l'Isuela. Ya como N-330 trescruza o puerto de Monrepós (por os termins municipals de Yequeda, Arguis y por l'atro canto Samianigo) y por Pardiniella y Martillué pasa dende l'Alto Galligo ta la Chacetania y desciende cara ta Chaca seguindo o río Gas por Guasa.

En o sud d'a ciudat de Chaca recupera la denominación de N-240 y se mete paralela a o río Aragón dirección ta Navarra, seguindo la Val Ancha. En Puent d'a Reina de Chaca recibe l'A-176 que viene d'Embún, Val d'Echo y Ansó y l'A-132 que i plega dende a Galliguera por Bailo y Riglos. A carretera sigle por a Val Ancha por Berdún y recibe l'A-1602 que baixa d'Ansó por Biniés y o parache tan destacau d'a suya foz.

Plega en a coda d'o entibo de Yesa entre Sigüés y o lugar d'Escó, por aon ye paralela a l'A-21. Entre Sigüés y o lugar siguient, Tiermas, a carretera pisa la provincia de Zaragoza por una vegada y a continación sale d'Aragón pa capuzar-se en Navarra.

En Navarra[editar | editar código]

En a Comunidat Foral, a N-240 pierde ixe nombre y pasa a nombrar-se N-2420. Dentra en o municipio de Yesa por debaixo d'o Monesterio de Leyre y sigue paralela con l'A-21 por Liédena, aon se desdobla con aquella. Torna a amaneixer en o termino de Lezáun, contina por Mont-reyal de Navarra y asinas dica Noáin.

Circumvala la capital navarra, Pamplona, baixo lo nombre d'A-15, sigue como autopista AP-15 dica o municipio d'Irurzun, aon se desbarra momentaniament y recupera o suyo nombre de N-240 pa atravesar os lugars d'Aizkorbe y o propio Irurzun, y remata sobre l'Araquil en l'autovía A-10, que dentra en o País Vasco por Alava.

En o País Vasco[editar | editar código]

A N-240 no existe como tal en o País Vasco dica plegar en Vitoria. En o tramo dende a muga navarra dica la capital alavesa a carretera nacional s'ha substituiu por una autovía, l'A-1, y no ye dica plegar en Gamarra, en os arredols de Vitoria, que torna a apareixer.

Dende Vitoria, a N-240 prene dirección ta Vizcaya y en sale por Gamarra Nagusia, Miñano Goien, Goiain y Villarreal. Entre Ubide y Altzusta comienza a baixar ta la cuenca de Bilbau, pasa dimpués por o municipio d'Areatza y dimpués por Arantzazu. En o termino municipal d'Igorre a carretera nacional dentra en a cuenca d'o río Arati, que ya ye afluent d'o río Nervión.

Por os lugars de Lemona, Bedia y Usánsolo a carretera dentra en a comarca vizcaína de Gran Bilbau, a traviés d'o municipio de Galdakao. Contina baixando entre os brazos d'o Nervión en o termin municipal de Basauri, aon se funde con a N-634, y con ixe nombre remata en a capital.

Se veiga tamién[editar | editar código]