Ir al contenido

Ilesia de Sant Chuan d'o Toledo d'a Nata

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Ilesia de Sant Chuan
Situación cheografica
Estau
País
'
Situación Sant Chuan (a Fueva, Sobrarbe, Aragón)
Adreza
Coordenatas
Archidiocesi
Diocesi Balbastro-Monzón
Arcipestrau Sobrarbe-Ribagorza
Información cheneral
Advocación Sant Chuan Baptista
Culto Catolico
Orden
Rector
Vicario parroquial
2.º Vicario parroquial
Mosen
Propietario
Administrador
Director
Coste {{{coste}}}
Vesitable
Altaria
Pisos
Amplaria
Largaria
Superficie
Diametro
Aforo
Altaria s.r.m.
Atras
Alcance
Iluminación
Potencia
Arquitectura
Tipo Ilesia
Estilo Romanico
Función
Catalogación
Materials
Construcción
Construcción primera mitat d'o sieglo XII
Fundador
Inicio
Fin
Inauguración
Destrucción
Arquitecto
Incheniero estructural
Incheniero de servicios
Incheniero civil
Atros
Premios
Pachina web
Localización
Ilesia de Sant Chuan ubicada en Aragón
Ilesia de Sant Chuan
Ilesia de Sant Chuan
Ilesia de Sant Chuan en Aragón

A ilesia de Sant Chuan d'o Toledo d'a Nata ye una ilesia romanica d'a primera mitat d'o sieglo XII (carta de consagración de 1134[1]) consagrada a l'advocación de Sant Chuan Baptista, que se troba en a localidat de Sant Chuan (part d'o municipio d'a Fueva, Sobrarbe), en a provincia de Uesca. Anque la suya construcción ha gosau incluir diferents parts adhibidas a posteriori, a construcción con a forma actual s'escomenzó en o sieglo XII por partes de bel mayestro lombardo que no la remató, estando la mayor parte d'a construcción una obra de mayestros locals aragoneses.

A ilesia ha guardau uso como ilesia parroquial d'o lugar de Sant Chuan en tot tiempo, por el que se i han gosau adhibir estructuras y substituir partes a lo largo d'os sieglos. En l'actualidat, os expertos admiten que a ilesia puede basar-se en un templo orichinal d'epoca mozarabe,[1] u talment dica visigotico,[1] que s'habría quiesto reformar de tot en o sieglo XII, estando as remodelacions posteriors siempre addicions menors feitas sobre lo modelo romanico.

A ilesia tiene una nau sola, con l'abside triple con forma de tefla, muit particular en l'arquitectura d'o norte d'Aragón.[1] A nau, orichinalment entera, se va segmentar en bel momento deseparando-ne la parte frontal (que corresponde con o coro) ta dar-le emplegos civils, parte frontal que coincide con a frontera principal, con una paret interior que ha deixau ciego lo vano d'a puerta principal y a finestra d'o piso superior. En a planta inferior d'ixe espacio deseparau se i observan trazas de fullín en as penyas, lo que puede fer pensar que s'haiga feito fuego en l'interior. Un forau practicau en a frontera alto d'a finestra d'a planta superior fa pensar que se i puede haber instalau en bel momento una vigueta ta puyar-ie pesos, lo que fa pensar en un emplego como paller u amagazén ta la planta superior.

A nau contiene tamién una sola capilleta lateral, con o teito fendo forma de cúpula y pintau de motivos cheometricos, se comunica con a resta d'a nau por debaixo d'un arco, a on que tamén se i han puesto recuperar as pinturas, en connexión con as d'a cúpula, de motivos cheometricos. En ista capilleta lateral ye a on naixe a escalera que puya t'a planta superior que no ocupa si que os zaguers metros d'o coro en obrindo-se t'a nau con una barana balustrada. A capella ye o espacio a on que se troba la pila baptismal, con decoración exterior radial en a que se i troban esculpidos bels anchelez. A pila conserva trazas d'a pintura orichinal roya i negra, que tot cal decir-lo, no s'ha gosau restaurar si que en a cara que se concara con l'acceso a la ilesia y coincide con amás vesible cuan se i dentra.

En o coro se puede trobar dos pilas baptismals mas, anque de menor cualidat y parcialment empotradas en a paret que desepara l'antiga puerta principal d'a nau actual. En o centro d'iste espacio, protechida con una urna, se troba una piedra de cuarz blanca con una concavidat socavada en centro que fa de reliquiario. As reliquias d'a ilesia son dos fragmentos ósios d'aspecto humán que, d'alcuerdo con o personal que guida las vesitas, no s'ha puesto trobar treslau de quí ye que son.

Interior d'a nau, con l'altar.

L'altar disposa d'un abside triple, en o que s'han puesto recuperar pinturas murals en as dos capilletas laterals y en a cruz d'a vuelta, pero no en l'abside central. L'aria de l'altar se comunica con a nau con un arco que tiene pintaus en o rafe cualques d'os reis d'Israel seguntes l'Antigo Testamento, toz ellos asentaus, marcaus con o suyo nombre (enter u apocopau), y con bel elemento representativo que es identifica. Todas as pinturas s'han puesto datar en o sieglo XVI, amaneixendo por bel puesto d'os murals a calendada de mil cincocientos novanta y nueu.[1]

En a cruz d'a vuelta, que presenta arista apuntada (no pas plena) a l'estilo d'o romanico, i quedan cuatre espacios delimitaus de forma alto u baixo triangular, remarcaus porque se i ye pintada con rafe negro a nervadura d'a crucería. Istes cuatro espacios se van aprobeitar ta representar-ie os cuatre evanchelistas en usando-ie cuatre figuras que les son representativas en os cánons d'a iconografía cristiana medieval, lo dito «tetramorfos»: Sant Mateu con l'ánchel anunciador, Sant Chuan con l'aliga, Sant Marcos con o leyón, y Sant Lucas con un toro u buei. Os nombres de toz cuatre apareixen enters u apocopaus en un pergamín en cadaguna d'as ilustracions. El que ye mas singular ye que se troban escritos en romance y no pas en latín, y seguindo con os convencionalismos ortograficos de l'aragonés d'o sieglo XVI: «Sanct Matheu», «Sanct Ioan», «S. Marcos» y «Sanct Luc».

Abside dreito

[editar | modificar o codigo]

En l'abside en a dreita de l'altar i ye representau o Chudicio Final, con una escena central en a que un arcánchel (podría estar que Miguel, por a indumentaria militar) luita contra un diaple que ye tumbo en tierra, debaixo d'os peus d'o mensachero divino, en mirando d'influir en a balanza que decide o veredicto, y que ye en as mans d'o primer. Iste tipo d'estampa, tan común en a iconografía medieval, se considera tardana a finals d'o sieglo XVI, y tiene una equivalent (datada aproximadament en a mesma epoca) en o retablo d'a ilesia de Sant Vicient d'A Buerda tamién en Sobrarbe. En o dito Chudicio Final, os diaples y l'infierno se troban en dreta d'a luita central, y se i vei una representación de Lucifer (sinyor d'os infiernos) barbudo, peludo, de color royo y con os peus como un au de presa, a demés d'os clasicos cuernos de buco, con a particularidat de tener dos caras a demés d'a natural, la una en o peito y l'altra en a forcanadura. Tiene, a demés, dos alas como de muriciego en as que i mancan as membranas. O propio Lucifer mira ta quitar-se as almas d'a balanza con un fierro pleno de ganchos. Os diaples subalternos arrociegan por tierra las almas que lo suyo sinyor ha puesto pescar, cara t'a boca d'o Leviatán, representau en o recolón dreito de l'escenario.

Toz os diaples d'ista imachen siguen alto u baixo ixa mesma descripción, anque sin ni alas ni una tercera cara en a pitrera (ta distinguir-los de su sinyor), fendo diferencia con o retablo de Sant Vicient, a on que lo diaple ye verde con escratas, con un aspecto millor reptiliano que no de mamifero.

Infierno en a pintura d'o Chudicio Final.

Á la izquierda d'a luita, Sant Pero aguarda en a puerta d'o Cielo ta recibir-ie as almas bianhabidas que surten d'a balanza, y en un segundo vano en a zaga d'él se troba un ánchel que con un candil en a man aguarda ta conducir-las ta'l paraíso, representau en un tercer y cuarto cuadrants en os que as numerosas almas habitan.

Debaixo d'ixas escenas existe una finestreta central, y a cada costau, dos pinturas mas. En a izquierda, un retablo pintau a'l fresco representa lo martirio de Cristo, con a cruz en centro con a Virchen («Santa María A») y Sant Chuan («Sanct Joan») que le ploran, y dos santas en os cuadrants laterals; Santa VaronicaLa Varoniqua») que aguanta o Santo Linzuelo con a cara de Chesucristo marcada, y Santa María MadalenaS. Maria Ma.») con expresión de constricción. Debaixo d'ellas, tres vanos mas, d'identicas dimensions toz tres, concaben lo un a Sant ChaimeS. Haime») en a suya variant de pelegrín, Santa CaterinaS. Catherina») con a rueda y a espada que representan o suyo martirio, y un tercer santo dificil d'identificar, pus i tiene o nombre apocopau como «S. Torn.», pero que podría estar Sant Tomás d'Aquino (santo muit popular en o sieglo XVI) u Sant Sadurnín de Tolosa[2] (un mártir bien quiesto en as rechions que rodeyan o Pireneu) porque omne le i representa con habitos relichiosos y una ilesia u monesterio dezaga.

En o costau dreito de l'abside, cuatre escenas biblicas i son representadas. La primera ye la d'Adán y Eva en o paraíso, debant d'a manzanera que teneban viedada, y en a que se i representa la sirpient con cabeza humana. A segunda ye la d'a intervención de l'ánchel qui atura con as mans a espada d'Abraham cuan s'aprestaba a matar a Isaac, su fillo. A tercera pareix que se tracta d'un tormento de Chob, anque no s'identifica con claridat cual be d'estar, se i lei en un pergamín en a part superior d'a escena «Job bona omnia dissipat Satan et eius liberos percutit expetita facultate [...] (ilechible) laudat Deum in sua aflictionem». A cuarta escena representa la petición de clemencia d'un rei u bel noble (i hai una corona en tierra), que se troba con un ánchel que arriba a buscar-lo con una espada en una man y una calavrera en l'altra, chusto cuan plega de matar a una persona, que chace en tierra con una flecha en o peito. Como en a imachen anterior, un pergamín con a leyenda en latín i diz «Miserere, mei Deus. Secundum magna» (oración habitual de constricción, que significa «Apiada-te de yo, Dios mío». y que se contina con el que pareix que ye una oración fragmentada, que habría d'estar «Secundum magnam misericordiam tuam», «Seguntes a gran misericorida tuya»). En chunto ixas dos oracions conforman o salmo Num. 51 d'a Biblia.[3]

Abside izquierdo

[editar | modificar o codigo]

L'abside que se troba en a izquierda de l'altar tiene como escena prencipal un Dios en Machestat, pintau como Lo Pai de Chesucristo, con forma humana, que refirma con as mans a cruz en a que i han clavau a su fillo. Debaixo d'os peus, se i puede veyer un orbe (esfera que representa o Mundo) que Él sinyorea. Una corona con o numer maximo d'aniellos (tres) el fa identificador como Dios, y a cada costau se i vei un cocullo de bella especie emblematica de flors, que omne no ha puesto identificar.

Iste Dios en Machestat se troba delimitau en un cerclo de nubles. Cuatro circulez mas chicorrons se troban a la una, a las cinco, a las siet y a las once de lo dito cerclo central, y contiene cadagún bels querubins, representaus a las modas medievals como cabecetas con alas. Istes ánchels son presos como es mas proximos a Dios en a hierarquía, y por ixo se's i representa tan apegaus a él.

Á cada costau d'o conchunto central, un cerclo de nubles de mida meyana concabe la figura d'un santo. En a izquierda como es i vei l'espectador, Santa María progando. Y a la dreita, Sant Chuan Baptista en identica actitut.

As escenas inferiors se van trobar mas fragmentadas que en l'abside dreito, por el que no se i vei garra entera que resulte significativa, anque pareix que todas parlaban d'a vida y miraglos de cualques santos.

Referencias

[editar | modificar o codigo]
  1. 1,0 1,1 1,2 1,3 1,4 (es) «Toledo de Lanata» en a pachina RomanicoAragonés.com, consultada lo 15 d'octubre de 2010.
  2. «Saturnín» como antroponimo ye una variant observable en bellas parlas aragonesas que tienden a conservar as consonants xordas entre vocals -p. ex. a ilesia de Sant Saturnín en Oto (val de Broto)-, que se diferencia de l'habitual «Sant Sadurnín/o» d'a mayoría de dialectos de l'aragonés. Podría haber estau asinas en a parla local en A Fueva en o sieglo XVI, y haber-ie evolucionau a «Sadurnín» posteriorment.
  3. (es) Salmo 51 en espanyol; consultau o 16 d'octubre de 2010

Vinclos externos

[editar | modificar o codigo]