Galerida cristata

Galerida cristata
Cogullada común (Galerida cristata)
Denominacions populars
cogullada / cucullada, cocollada, cocullada, cuculla, cugullada
Estau de conservación
Seguro (IUCN)
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Aves
Orden:	Passeriformes
Familia:	Alaudidae
Chenero:	Galerida
Especie:	G. cristata
Descripción
Galerida cristata LINNAEUS, 1758
Distribución cheografica
Distribución.

A cogullada u cucullada (nombre cientifico Galerida cristata (L., 1758)) ye un au paseriforme d'a familia Alaudidae, tipica d'espacios ubiertos y que prefiere habitats mas secos que atras alaudidas.

Ye una especie común en campos de cultura, estepas y semidesiertos en Europa, Asia y Africa dica o ecuador. Ye un paixaro sedentario, que no migra entre estacions.

Descripción

A cogullada ye un paixaro de 17 centimetros de lonchitut, que pesa entre 37 y 49 gramos. Se pareix a saber-lo a la suya parient l'aloda, con a cual a sobén comparte habitat y costumbres, por lo cual muita chent as confunde. Manimenos, o cuerpo d'a cogullada ye mas robusto y no pareix tan gracil como l'aloda, y a cresta de plumas que pueden alzar, alto d'a cabeza, ye mas larga y vistera en ista especie, sin que deixe de veyer-se nian cuan ye baixada.

O plumache ye marrón u pardo, menos pigau que en atras alaudidas. No tienen dimorfismo sexual; tanto a fembra como lo masclo tienen as mesmas mida y color. Toz os adultos cantan, y lo fan a sobén puyaus en una penya, un muro u cualsiquier atro puesto mas alto que o terreno a on viven.

Alimentación

Como as demás alaudidas, as cogulladas son granivoras principals, y s'alimentan de granos y simients que troban por o suelo. Son caminaderas, y marchan grans distancias por tierra mirando-se l'alimento. Manimenos, como son paixaros que prefieren os terrens secos y os baldanos mas que atros, ambients an que no i ha tanta hierba, son oportunistas con o que troban y consumen tamién muitos insectos y atros invertebraus.

As cogulladas consumen mas insectos que especies parellanas suyas, como l'aloda, mesmo fueras d'a temporada de reproducción.

Habitat

A cogullada habita en espacios ubiertos, preferentment secos y con poca vechetación, dende dunas chunto a la mar dica catarrals y pedrosas. Se troba tamién en uebras y yermos humanizaus, en a periferia d'as ciudaz y mesmo no ye raro trobar-se-ne de paso en espacios como un aparcamento.

Fa niedo debaixo d'un arbusto u bella mata de hierba, a sobén con o suelo esgarrapau y sin nian amagar-lo. A fembra mete de 3 a 5 uevos y os coba sola mientres 12 días.

Imáchens

• 
• 
• Cucullada cantando.
• 

Se veiga tamién

• Cogullada.
• Aloda.
  • Aloda común.
• Calandra.
  • Calandra común.
• Alaudidae.
• Paixaro.

Vinclos externos

• Se veigan as imáchens de Commons sobre coculladas.
• Wikispecies tiene un articlo sobre Galerida cristata.

• Datos: Q26982
• Multimedia: Galerida cristata / Q26982
• Especies: Galerida cristata