Cinclus cinclus

De Biquipedia
Cinclus cinclus
Eurasian White-fronted Dipper, C cinclus.JPG
Torda aguadera (Cinclus cinclus)
Denominacions populars
Torda aguadera, aguadera, torda nadadera, torda d'augua, torda d'aigua, torlla d'aigua, anadeta[1]
Estato de conservación
Status iucn2.3 LC.svg
Seguro (IUCN)
Clasificación scientifica
Eukaryota
Animalia
Chordata
Aves
Passeriformes
Cinclidae
Cinclus
C. cinclus
Descripción
Cinclus cinclus
LINNAEUS, 1758
Distribución cheografica
Cinclus cinclus01 distr-2.png
Distribución.

A torda aguadera,[2] simplament aguadera,[2] torda nadadera[2] u torda d'augua[2] (nombre scientifico: Cinclus cinclus (L., 1758)) ye una au paseriforme d'a familia Cinclidae, propia de torrents, ríos y barrancos d'augua limpia en Europa y Asia.

Descripción[editar | modificar o codigo]

A torda aguadera no ye una verdadera torda; a penar d'ixe nombre no ye sisquiera un miembro d'a familia Turdidae, y fa parte d'a familia Cinclidae por contra. Se tracta d'una paseriforme (paixaro) d'entre 17 y 18 centimetros de largaria y entre 50 y 70 gramos de peso,[3] con o pico recto y apuntau ta debant y as zarpas con tres didos rectos, firmes, ta debant y uno a la contra, recto, ta dezaga, y una postura y forma corporals que fan recordar vagament a las tordas d'o chenero Turdus.

Tiene o cuerpo robusto, arrochau, con a cabeza graniza y as alas y a coda prou curtas. A coda tiene forma quadrada y a debanta por alto d'o cuerpo con freqüencia (cosa rara entre as tordas d'o chenero Turdus, en comparanza). As patas son recias, fuertes y prou grans. O pico ye de color negra, recto y punchudo.

As colors son marrón lasa por alto, que va tornando-se cada vegada más negra pizarra a mesura que s'amana t'a coda de l'animal, y una gran malla blanca que va dende a barbeta dica lo peito por tot lo papo de l'animal. Puet tener una faixa royisca en o peito,[3] que desepara la taca blanca contra la tripa negra d'o paixaro.

Habitat[editar | modificar o codigo]

L'aguadera ye un paixaro extremadament dependient de l'augua. Vive siempre arredol d'os ríos y torrents d'auguas vivas y bien oxichenadas, a on que troba lo suyo alimento, y fa niedo en as riberas, ya sía en foratos entre as penyas, ya sía en puents, azutz y atras construccions humanas.[3]

De regular, s'asocia con os corsos d'augua de montanya porque son a on que l'augua ye más viva y limpia. Manimenos, en o departamento francés d'os Pireneus Orientals y en a isla de Corcega s'ha documentau que nidifican a poca altaria sobre o livel d'a mar, 200 msnm en os Pireneus y 100 m en a isla mediterrania, siempre que as condicions les ne permitan.[3] Quan o medio ye favorable encara pueden vivir en planas y en estanyos.[3]

Alimentación[editar | modificar o codigo]

L'aguadera ye una au insectivora, que consume una gran cantidat d'insectos aquaticos y as suyas nimfas, como cucas de remo y teixidors, escarabachos d'augua y as suyas larvas, moluscos como caragols d'augua y mesmo bell peix chicorrón si el puet pillar. Tamién pesca cabezudos de ranas y zapos, y crías de cullebras que plegan de naixer.

Comportamiento[editar | modificar o codigo]

Torda aguadera cantando.

A torda aguadera ye una au aquatica, condición ni mica común entre as Passeriformes.[3] Tiene o plumache totalment impermeable, y lo emplega pa capuzar-se en l'augua y bate as alas pa propulsar-se. Tamién puede dentrar en l'augua caminando lindingo-lindango y va submerchendo-se miqueta a miqueta.

Captura lo suyo alimento tanto debaixo de l'augua como difuera: pilla insectos en volido, ranca moluscos d'as penyas, etc. Ye un animal muit territorial y no tolerará que garra atro miembro d'a suya especie invada lo suyo territorio, que sole comprender entre 1 y 1,2 km de ribera d'un troz de río.[3]

Ye una au resident en a mayoría d'a suya aria de distribucción mundial. Nomás en bells países d'o norte d'Europa (Suecia, Finlandia y as Republicas balticas) i ha poblacions a on que os eixemplars emprendan una curta migración en l'hibierno, dende as zonas de montanya cara t'as planas, pa mirar d'evitar-se la chelada de l'augua.[3]

Imáchens[editar | modificar o codigo]

Referencias[editar | modificar o codigo]

  1. (an) Diccionario ortografico de l'aragonés (Seguntes la Propuesta Ortografica de l'EFA). Versión preliminar. Estudio de Filología Aragonesa. ISSN 1988-8139. Octubre de 2022.
  2. 2,0 2,1 2,2 2,3 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza, 2004. ISBN 978-84-8986-235-7
  3. 3,0 3,1 3,2 3,3 3,4 3,5 3,6 3,7 (es) Losange, Aves de España y Europa. Susaeta Ediciones. Madrid, 2012. ISBN 9788499281407

Vinclos externos[editar | modificar o codigo]