Berrocal

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

berrocal granitico en La Pedriza (Sierra de Guadarrama, Comunidat de Madrit).

A la ezquierda se vei un berrocal producto de la meteorización fisica d'unas cuarcitas y que ha dau nombre a la localidat de Berrueco en lo Xiloca.

Un berrocal u borrocal ye una forma de lo terreno con piedras grans u un paisache a on abundan u destacan unas piedras grans. En Castiella se refieren a sobén a caos graniticos que s'han formau por meteorización esferoidal, en lo Sistema Iberico teruelano se refieren a tarteras, pedrizas y ríos de piedras d'atras litolochías.

Etimolochía

Las palabras berrocal y berrueco se consideran d'orichen celta, con presencia d'un sufixo -ueco < -ŎCCU, que acompanya a vegadas a palabras d'orichen prerromán. En lo "Diccionario d'Andolz documentan la palabra borruco d'uso actual en aragonés ribagorzano, podendo-se interpretar u cambio de sufixo por lo sufixo -uco < -UCCU. Manimenos tamién existe la posibilidat d'haber-se produciu lo fenomeno de metafonía antiga que afecta a palabras como pozo-puzo, tormo-turmo, fondo-fundo y atras. En la microtoponimia de Nuez d'Ebro trobamos Barruecos y val de Barrueco; tamién bi ha un Barruecos en lo termin municipal de Zaragoza.

En la Sierra d'Albarracín bel autor documentan l'uso de la palabra berrocal y la suya variant borrocal con lo significato aproximau de "tartera" u "costera de mont cubierta por grans bloques de piedra", y en concreto l'ALEANR rechistra este uso en Noguera y en lo norte de la Sierra d'Albarracín, a on abundan estas formacions.. Seguntes atras fuents l'uso de la palabra berrocal y la variant borrocal en la Sierra d'Albarracín s'aplica a los ríos de piedras (herencio de condicions periglacials cuan la zaguera glaciación). Los ríos de piedras son bien representaus en la Sierra d'el Tremedal: Bronchales, Oriuela, en las costeras de Caimodorro, y en Orea (Guadalachara). Como los ríos de piedras se forman por confluencia de tarteras en un fondón ye posible que a palabra berrocal s'aplique a los dos conceptos cheomorfolochicos. En Bronchales trobamos lo microtoponimo El Berrocal y/u El Borrocal en lo cabo sureste.

Veyer tamién

• Datos: Q13048521